ئەمە بڵاوبكەوە
FaceBook  Twitter  

قسەكردن لەكاتی نووستندا Somniloquy حاڵەتێكی باوە، بە پێی ئامارە زانستییەكان نزیكەی نیوەی منداڵان بەلای كەم ساڵی جارێك لەكاتی خەودا قسەدەكەن، 10%ی منداڵان هەموو شەوێك لەكاتی نووستندا قسەدەكەن، هەروەها نزیكەی 67%ی گەورەكان بەلای كەم هەر 3 مانگ جارێك لەكاتی نووستندا قسەدەكەن. قسەكردن لەكاتی خەودا بە گرفتێكی خەو هەژماردەكرێت و لەوانەیە كە لە هەر قۆناغێكی نووستندا رووبدات. گرفتەكە مەیلێكی خێزانی هەیە و زیاتر دوچاری پیاوان دەبێت، هۆكارە هاندەرەكانی بریتین لە: كەمخەوی، خواردنەوەی ئەلكهول، زیانی لابەلای هەندێك دەرمان، سترێس، پەستی، خەمۆكی. گرفتەكە هەندێك جار هاوكات دەبێت لەگەڵ گرفتی تری خەو وەكو پیادەڕۆیی لەكاتی خەودا Sleepwalking، كابوس، هەناسەڕاوكێ لەكاتی نووستندا Sleep apnea، گرفت لە جوولاندنەوەی خێرای چاوەكان لەكاتی خەودا REM. لە هەندێك حاڵەتی دەگمەنیشدا، قسەكردن لەكاتی خەودا پەیوەستە بە نەخۆشیی دەروونی یان پەركەم لەكاتی خەودا. ئەگەر قسەكردن لەكاتی خەودا بە كەمی رووبدات كە هاوكات نەبێت لەگەڵ گرفتی تری پەیوەست بە خەو ئەوا پێویست بە نیگەرانی ناكات، بەڵام ئەگەر گرفتەكە زوو زوو دووبارە بێتەوە و هاوكات بێت لەگەڵ لەخەو هەڵسان و هەستكردن بە ماندووبوون و هیلاكی یان دڵتوندی ئەوكاتە پێویست بە سەردانی دكتۆر دەكات.