ئەمە بڵاوبكەوە
FaceBook  Twitter  

چاوه‌كانمان ئه‌رك و فرمانی زۆریان ده‌كه‌وێته‌ سه‌ر. چاوه‌كان له‌گه‌ڵ مه‌ودا دوور و نزیكه‌كان خۆیان ده‌گونجێنن، زانیارييه‌كان بۆ مێشك ده‌گوازنه‌وه‌ بۆ ئه‌وه‌ی بیانكات به‌ وێنه‌. 

چاو له‌كاتی خوێندنه‌وه‌دا زۆر به‌ وردی كار ده‌كات، ئه‌مه‌یان له‌ رۆژدا كارێكی ئاسانه‌، به‌ڵام له‌ شه‌ودا ده‌بێت چاو خۆی له‌گه‌ڵ رووناكی كه‌م بگونجێنێت، له‌به‌رئه‌وه‌ی‌ كاره‌كه‌ی قورستر ده‌بێت، چونكه‌ ناتوانێ وێنه‌كان به‌ روونییه‌كی ته‌واو ببینێت.

له‌ ژوورێكی تاریكدا كاتێك ته‌ماشای وێنه‌یه‌كی جووڵاو ده‌كه‌ین، چاو زووتر ماندوو ده‌بێت و ده‌بێته‌ هۆی سه‌رئێشه‌، هه‌ربۆیه‌ پزیشكانی چاو ئامۆژگاریمان ده‌كه‌ن كه‌ ده‌بێ له‌ كاتی ته‌ماشاكردنی ته‌له‌ڤیزیۆن سه‌رچاوه‌یه‌كی رووناكی دیكه‌ هه‌بێت.

له‌كاتی ته‌ماشاكردنی ته‌له‌ڤزیۆن زۆر به‌ كه‌می چاوه‌كانمان ده‌تروكێنین، به‌تایبه‌تی كاتێك له‌ نزیكی شاشه‌ داده‌نیشین، ئه‌مه‌ش واده‌كات به‌ تێپه‌ڕبوونی كات هه‌ست به‌ سووتانه‌وه‌ و سووربوونه‌وه‌ی چاوه‌كانمان بكه‌ین. له‌و رووانگه‌وه‌ ئامۆژگاری ده‌كرێین، لانیكه‌م له‌ دوورى ٣ مه‌تر له‌ ته‌له‌ڤزیۆن دابنیشین.

بۆ پاراستنی سه‌لامه‌تی چاوه‌كان، ده‌بێت هه‌ندێ گۆڕانكاری بكه‌ین، ئه‌مه‌ش به‌ واتای ئه‌وه‌یه‌ كه‌ ده‌بێ هه‌رده‌م ته‌ماشای مه‌ودای دوور بكه‌ین و تروكاندنی پێڵووه‌كان له‌م باره‌دا زۆر گرنگن، چونكه‌ یارمه‌تیده‌ره‌ بۆ بڵاوبوونه‌وه‌ی شله‌ی فرمێسك كه‌‌ مادده‌ پێویسته‌كان بۆ چاو دابین ده‌كات و، چاو له‌ وشكبوون ده‌پارێزێت.

ئه‌و كه‌سه‌ی بۆ ماوه‌یه‌كی زۆر له‌ ژێر رووناكییه‌كی كزدا ده‌خوێنێته‌وه‌، كتێب‌ له‌ چاوه‌كانی نزیك ده‌كاته‌وه‌ بۆ ئه‌وه‌ی بتوانێ بخوێنێته‌وه‌، ئه‌مه‌ چاوه‌كان ماندوو ده‌كات و ئه‌ركه‌كانی دووبه‌رابه‌ر ده‌كات به‌شێوه‌یه‌كی كاتیی، به‌ڵام چاوی ساغ هه‌رزوو پاش كه‌مێك حه‌سانه‌وه‌ ده‌گه‌ڕێته‌وه‌ سه‌ر بار سروشتی خۆی. هه‌ربۆیه‌ پزیشكان ئامۆژگاریمان ده‌كه‌ن ناوه‌ ناوه‌ چاوه‌كانمان بحه‌سێنینه‌وه‌.