ئەمە بڵاوبكەوە
FaceBook  Twitter  

بەپێی توێژینەوەیەك كە لەلایەن زانایانی ئێرلەندا ئەنجامدراوە، زیاتر لە نیوەی ئەو ژنانەی كە لە پەتای كۆڤید-19 چاكدەبنەوە، بۆ ماوەی زیاتر لە 10 هەفتە هەست بە هیلاكی و بێهێزی بەردەوام دەكەن، لە هەندێك لە ژنانیشدا ئەو كاریگەرییەی كۆرۆنا بە رونی لەسەریان دەردەكەوێت.

پێشتر لە چەندین توێژینەوەدا ئەوە خراوەتەڕو، كە كۆرۆنا چەندین جۆر كاریگەری درێژخایەن لەسەر ئەو كەسانە جێدەهێڵت، كە توشی پەتاكەبون و پاشان چاكبونەتەوە، ئاستی دەركەوتنی ئەو كاریگەرییانە لە كەسێكەوە بۆ كەسێكی دیكە دەگۆڕێت، تەمەن و دۆخی تەندروستی نەخۆشەكان، رێژەی كاریگەرییەكان و درێژی مانەوەیان دیاریدەكات.

زانایانی ئێرلەندا لە توێژینەوەیەكدا كە لەسەر 128 توشبو بە ڤایرۆرسی كۆرۆنا لە یەكێك لە نەخۆشخانەكانی وڵاتەكە ئەنجامیانداوە ئاشكرایانكرد، زیاتر لە 52% چاكبوەكان پاش تێپەڕبونی 10 هەفتە لە تێپەڕاندنی پەتاكە بەدەست بێهێزی و هەستكردن بە هیلاكی بەردەوام دەناڵێنن.

بەپێی دەرئەنجامەكانی توێژینەوەكە، دەركەوتوە 67% ئەو كەسانەی كە لە دوای چاكبونەوە لە پەتای كۆڤید-19 هەست بە ماندوبون دەكەن ژنانن.

ئاماژە بەوەشكراوە، دەركەوتنی ئەو كاریگەریانە لەسەر توشبوانی كۆرۆنا پەیوەندی بە مانەوەی كەسەكە نییە لە نەخۆشخانە لەكاتی نەخۆشییەكە، بەڵكو كاریگەرییەكە لەسەر ئەو كەسانەی كە لە ماڵەكەی خۆیان چاكدەبنەوە، لەگەڵ ئەو كەسانەی كە لە نەخۆشخانەكاندا دەمێننەوە وەك یەك وایە.

لەسەر ئاستی جیهان، تا ئێستا زیاتر لە 30 ملیۆن و 734 هەزار و 956 توشبوی كۆرۆنا تۆماركراوە، لەو ژمارەیەش 22 ملیۆن و 362 هەزار و 347 كەس چاكبونەتەوە، هاوكات 657 هەزار و 189 كەس گیانیانلەدەستداوە.