بەئامادەبوونی سەرۆكی حكومەتی هەرێمی كوردستان مەراسیمی كردنەوەی شەقامی 120مەتری هەولێر كرایەوە. ئەو شەقامە نزیك دەساڵە كاری تێدادەكرێت و درێژییەكەی 34كیلۆمەترەو وەك پشتێنەیەكی بازنەیی بەدەوری هەولێردا دەسوڕێتەوەو هیچ ترافیك و وەستانێكی تێدا نییە. جێی باسە شەقامەكە وەك پڕۆژەیەكی گەورە لەوادەی خۆیدا دواكەتووەو هەروەك لەبەدواداچوونی پەیامنێری "سایتی رێگاى كوردستان"دەركەوتووە، هەرچەند مەراسیمی تەواوبوونی بۆكرا، بەڵام لەسەر رێگەی كەسنەزان و لای گەڕەكی هەولێری نوێ‌ تادەگاتەوە پشت شوقەكانی جیهان لەسەر رێگەی كەركوك ئەو شەقامە لەو مەودا درێژەدا هیچی تەواونەكراوەو هەندێك شوێنی تەنها خۆڵڕێژو هەندێك جێی دیكەشی هەر كاری تێدا نەكراوەو گردو زبڵدان و زەوی رووتەنە. لەكاتێكدا ئەو جێگایانەی كە تەواونەكراوە جەنجاڵترین و هەستیارترین شوێنەو پڕە لەكارگەو هێڵی هاتنە و چوون بۆ بەغدا و كەركوك و رۆژانە قەرباڵغییەكی زۆری هەیە و تەنانەت رووداوی هاتووچۆش روودەدات.

رێكخراوی زانكۆ لاین بۆ گەشەپێدانی زانستی راگەیەنراوێكی تیایداهاتووە" داوای لە وەزارەتی خوێندنی باڵاو توێژینەوەی زانستی حكومەتی هەرێمی كوردستان كرد، كەفشاری جددی بۆ سەرفكردنی دەرماڵەی خوێندكاران بكات. 

لەراگەیەنراوەكەدا ئاماژە بەوەدەكات" بەهۆی قوڵبوونەوەی قەیرانی دارایی لەهەرێمی كوردستان ژیان و گوزەرانی خوێندكارانی زانكۆ وپەیمانگاكان وەك هەمو چین و توێژەكانی تر تادێت خراپتر دەبێت. ئەوەشدەخاتەڕوو" مەترسی پەككەوتنی پڕۆسەی زانست‌ و فێركردن و وازهێنانی بەكۆمەڵ لەنێو خوێندكاران لەئارادایە، هەمو ئەو هۆكارانەش پەیوەستن بەخراپی ئاستی بژێوی‌ و كەمدەرامەتی خوێندكاران‌ و لەهەمان كاتیشدا بێچارەسەر مانەوە و بێدەنگی لایەنە پەیوەندیدارەكان زیاتر خوێندكاری بێ هیوا و بێ ئومێد كردوە لەبەردەوامیدان بەپرۆسەی خوێندن".

لەكۆتایی راگەیەنراوەكەدا دەڵێت" داوا لەوەزارەتی خوێندنی باڵا‌و وەزارەتی دارایی حكومەتی هەرێم دەكەین كە هەرچی زوە كاربكەن بۆ چارەسەركردنی ئەو دۆخە ناهەموارەی هاتۆتە پێش بەتایبەتیش كاركردنی جددی بۆ سەرفكردنی دەرماڵەی خوێندكاران كەزیاتر لەساڵێك و 4 مانگە هیچ بڕە دەرماڵەیەك نەدراوە بە خوێندكاران.

 

 

رۆژی 27ی كانوونی یەكەمی 2016 حكومەتی توركیا پرۆسەی دادگاییكردنی ئەو كەسانەی دەستیپێكرد، كە بەبەشداریان لەكودەتاكەی 15ی تەمموزی 2016 تۆمەتباركراون و لەزیندانەكاندان. ئەمەو رەنگبێت 29 ئەفسەری پۆلیسیش سزای زیندانی جیاجیایان بەسەردا بسەپێنرێت، هەتا بەحوكمی زیندانی هەتاهەتایی.

لەتوركیادا 40هەزار كەس بەتۆمەتی بەشداربوون لەو كودەتایە دەستگیركراون و زیاتر لە 100 هەزار كەسیش لەكارەكانیان دوورخراونەتەوە.

هاوكات لەنێو ئەفسەرە تۆمەتبارەكاندا 3 ئەفسەری فڕۆكەوانی هەن و تۆمەتبارن بەوەی كەملكەچی فەرمانی سەربازی نەبوون، كاتێك داوایان لێكراوە هێزە تایبەتەكان بگوێزنەوە بۆ پارێزگاریكردن لە كۆشكی سەرۆكایەتی رەحەب تەیب ئەردۆغان لە ئەستەنبوڵ.

دادوەرێكیش رایگەیاند" هەركەسیك بەبەشداریكردن لە كودەتاكەدا تۆمەتباربێت، پێویستە دادگاییەكی دادپەروەرانە بكرێت، سزای توندی ئەو كەسانەس بدرێت كە تاوانبار دەكرێن، چونكە خیانەتی گەورەیە لەدژی دەوڵەت.

.

دانیشتوانی گوندەكانی بناری بەمۆ و خۆشك هەڵمەتێكی واژۆ كۆكردنەوەیان دژ بەكورەزایەكی وەسمان بەگی سەرۆكی پێشووی عەشیرەتی شەرەفبەیانی دەستپێكرد. هەڵمەتی كۆكردنەوەی واژوو گوندەكانی هۆرێن و شێخان بەمۆی گرتۆتەوەو تاوەكو ئێستا 9000 هەزار واژوو كۆكراوەتەوەو بەنیازن پیًشكەش بە داواكاری گشتی خانەقینی بكەن و سكاڵای یاسایی لەدژ سەرتیپ محمەد رەشید بەگ بكەن، كە بەنیازی دروستكردنەوەی سەرۆك عەشرەتە لەكاتێك لە عێراق یاسای عەشائیری بوونی نەماوە. جێی باسە لەدوای شۆرشی جوتیارانی هۆرێن و شێخان رووخانی سیستەمی دەرەبەگایەتی سەرۆكی عەشیرەتی شەرەفبەیانی بوونی نەما.

ئەمەو پێش ئێستا سەرتیپ محەمەد رەشید بەگ لەدەرەوەی وڵات گەڕایەوەو لەلایەن چەند حزبێكی دەسەڵاتدار هاوكاری كرا بۆ ئەوەی بكرێتەوە بە سەرۆك عەشیرەتی شەڕەفبەیانی، لەدوای ناڕەزاییەكان سەرتیپ محەمەد رەشید لەلایەن چەند كەسێكی كەم بە سەرۆك عەشرەت دانراو بەبێ ئاگاداری ئاسایش مۆری سەرۆك عەشیرەتی دروستكردووە .

مامۆستایانی ناڕازی لەگەرمیان لەبەیاننامەیەكدا رایدەگەیەنن" لەكاتێكدا كە لەكۆتایی وەرزی یەكەم نزیك دەبینەوە و بارودۆخی ئابوری مامۆستایان بەتایبەتی و فەرمانبەران و چین و توێژەكانی كۆمەڵگا بەگشتی ڕوو لە خراپتربوون دەكات، كەچی سەرباری ئەم دۆخە خراپە دەسەڵاتداران دەستبەرداری دزی و تاڵانكردنی سامانی وڵات و خەڵك چەوساندنەوە نەبوون. خەمساردی و بێباكی دەسەڵات وڵاتی لە لێواری داڕووخان نزیك كردووەتەوە، بەشێوەیەك وڵات لەڕووی پەروەردەیی و ئابوری و سیاسی و رۆشنبیریەوە خەریكە بەتەواوەتی دادەروخێت و هیچ حیزب و بەرپرسێكیش هەست بەم مەترسیە گەورەیە ناكات.

ئێمە وەكو مامۆستایانی نارازی و مافخوراو جەخت لەسەر ئەوەدەكەینەوە، كە بەپێچەوانەی بەرپرسە وڵات وێرانەكارەكان، ئێمە وڵاتی خۆمان خۆشدەوێت و بەشانازییەوە خزمەتی دەكەین، بەتایبەت لەم دۆخەدا پێمانوایە بایكۆت و داخستنی دەرگای قوتابخانەكان خزمەتێكی گەورەیە بە كۆمەڵگاكەمان و هەوڵێكە بۆ بەئاگاهێنانەوەی كۆمەڵگا لەخەوی غەفڵەت لەبەرانبەر ئەو هەموو زوڵمەی كە چینێكی دەسەڵاتدار 20 ساڵە لێیدەكات مامۆستایانی ناڕازی لەبەیاننامەكەدا جەخت لەسەر بایكۆت و نارەزایەتی دەكەنەوە.