پەیامنێرمان لە نزیك روداوەكەی بینایەی پارێزگای هەولێر بە رێگای كوردستانی راگەیاند: دوو لەو چەكدارانەی هێرشیان كردە سەر بینایەی پارێزگای هەولێر كوژراون و لە ماوەیەكی كورتدا چەكدارەكەی دیش دەكوژرێت و بینایەكە كۆنترۆڵ دەكرێتەوە.

پەیامنێرەكەمان گوتی: هەرسێك چەكدار ریشدار بوون و درووشمی ئەڵڵاهو ئەكبەریان گوتۆتەوە.

شایەنی باسە ئەمڕۆ پێش كاتژمێر هەشت، سێ‌ چەكداری نەناسراو هێرشیان كردە سەر بینایەی پارێزگای هەولێرو پۆلیسێكیان بریندار كردوو توانیان دەست بەسەر بینایەی پارێزگادا بگرن، هەرزووش لەلایەن هێزەكانی ئاسایش و پۆلیسەوە هێرشیان كرایە سەرو تا ئامادەكردنی ئەم هەواڵە تەقە لەنێو بینایەكەدا بەردەوامە.

خۆپیشاندانەكانی ئەو دواییەی شارەكانی عێراق دەنگدانەوە‌و قورساییەكی گەورەی لەسەر ئاستی عێراق‌و كوردستان لێكەوتەوە، بگرە نەتەوە یەكگرتووەكان‌و وڵاتە یەكگرتووەكانی ئەمریكاشی هێنا سەر خەت‌و داوایان لە حكومەتی عێراق كرد كە داواكارییەكانی خەڵك جێبەجێ‌ بكات‌و خۆی لە بەكارهێنانی توند‌و تیژی دژ بە خەڵك بپارێزێت، بۆ شرۆڤەكردن‌و زیاتر بەرچاو روونی خوێنەرانمان بە پێویستمان زانی دیمانەیەكی تایبەت بە ماڵپەڕی رێگای كوردستان لەگەڵ (زیرەك كەمال) چاودێری سیاسی ساز بكەین.

هێرش مەغدید

-بەشێكی زۆر لە شارە گەورەكانی ناوەڕاست‌و باشووری عێراق دانیشتوانەكەی هاتوونەتە سەر شەقام‌و یەخەی ناڕەزایی‌و بێزارییان بەرامبەر حكومەتی عێراق دادڕیوە تۆ فاكتەرەكانی ئەو بێزارییەی خەڵك بەو هەموو تووڕەبوونە لە چیدا دەبینی؟

+ئەوەی ئێستا لە عێراق دەگوزەرێت وەكو تۆ دەیڵێیت بێزاری میللەتە بەرامبەر بەو حكومەت‌و دەسەڵاتە سیاسییانەی عێراق كە لە (2003)ەوە جڵەوی حوكمڕانی عێراقیان بەدەستەوە گرتووە‌و بەڵام نەیانتوانیوە بەڵكو ئەو حكومەتانە نەیانویستووە تەنانەت سەرەتایترین مافە مەدەنی‌و كۆمەڵایەتی‌و خزمەتگوزارییەكان خەڵك دابین بكەن، بەراستی مایەی كارەسات‌و پێكەنینیشە كە خەڵكی بەسڕا كێشەی ئاویان هەبێت!! كە خۆی لە كەناری دەریایە، كێشەی سووتەمەنی هەبێت كە 80%ی نەوتی عێراق لەو شارەیە‌و لەوێشەوە بۆ دنیا بەڕێدەكرێت، جگە لەمەش گرفتی بێكاری لەو شارەدا بە ئەندازەیەكی ترسناك تەشەنەی كردووە‌و لاوان‌و خەڵكی شار بێ‌ ئیش‌و كار دەسوڕێنەوە‌و كەچی حكومەتی عێراق دەستی كار لە ئێران‌و وڵاتانی تر دەهێنێت، چونكە ئەو بیانیانە بە مووچەیەكی كەم رازی دەبن، بیرت نەچێت جاران سەوزە‌و میوە‌و بەرهەمی كشتوكاڵی‌و خورمای بەسڕە بۆ بەشی زۆری وڵاتانی رۆژهەڵاتی ناوەڕاست دەڕۆیشت، بەڵام ئێستا خورماو میوە لە ئێرانەوە بۆ بەسڕا دێت. دیارە هەردوو كەرتی بەرهەمهێنانی نەوت‌و كشتوكاڵا لە دەرەنجامی نەبوونی سیاسەتێكی روونی ئابووری‌و تەشەنەكردنی گەندەڵی وێران كراون.

-هەست ناكەی خۆپیشاندانەكانی ئەو جارەی خەڵكی عێراق جۆرێك لە دامەزاروەیی‌و رێكخراوەیی پێوە دیارەو رابەرانی خۆپیشاندانەكەش خەڵكانی رۆشنبیر‌و هۆشیارن‌و دروشمەكانیشیان گوزارشتە لە ئاستێكی بەرزی فیكری‌و مەعریفی؟

+با سەد دەرسەد راستە، دروشمی خەڵكی هێمای راپەڕینی پێوەدیارە، چونكە داواكاری كۆمەڵایەتی‌و خزمەتگوزاری تێپەڕاندووە‌و خۆی لە راپەڕینێكی چینایەتی‌و فیكریدا بەرجەستە دەكات، بۆ نموونە (علمانیە علمانیە لاسونیە لا شیعیە)، (بأسم الدین باگونا الحرامیە)، (ایران برە، عراق حرە)، (مانرید مسۆل ملتحی نرید مسۆل یستحی) ئەمانە هەموویان دەلالەت لەوە دەكەن خەڵكی عێراق نەك هەر شێوازی حوكمڕانی، بەڵكو ئایدیۆلۆژیای‌و فیكر‌و سیستەمی مەزهەبگەرایشی رەتدەكەنەوە، خەڵكی لەو راستییە تێگەیشتوون كە عێراق نە لە رووی ئابووری نە لە رووی سیاسی‌و داڕشتنی بڕیاری سیاسی دەوڵەتێكی سەربەخۆ نییە‌و بگرە هێڵە گشتییەكانی حوكمڕانی عێراق لە (2003)ەوە ئێران دایڕشتووە‌و هەر ئێرانیش بەڕێوەی دەبات. نەك هەر ئەوە ئێران پلانێكی ئابووری بازرگانی وەهای داڕشتووە كە عێراق بۆ بەرهەمهێنان‌و بەدەستهێنانی بچووكترین ئامرازی كار‌و پێداویستی ژیان چاوی لە دەستی ئێران بێت‌و بگرە وەكو شارێكی ئێرانی سەیری عێراق دەكات‌و خستویەتییە ژێر ركێفی خۆی، ئێران بە رێگای گەورە سیاسی‌و دەست‌و پێوەندە بازرگانییەكانی خۆی كەرتی كشتوكاڵی لە عێراق وێران كردووە‌و لاوان كە سەرچاوەی وزە‌و كار‌و داهێنانن بەشی زۆریان لە دەرەنجامی نەبوونی راپێچی ناو گروپ‌و میلیشیا شیعییەكان كراون، بەمەش بەشی زۆری زەوی‌و زاری بەسڕا كە بە درێژایی مێژوو كانگای بەرهەمهێنانی دانەوێڵە‌و بەشی زۆری سەوزە‌و میوەی عێراق‌و وڵاتانی دراوسێش بوو،ئێستا ئەو زەوییانە لە دەرەنجامی بەكارنەبردنیان بوونەتە خاكەدێم‌و بیابانێكی وشكەڵان.

-پرسیارێك لای من‌و زۆرێك لە چاودێرانی سیاسی ئەوەیە كە بۆچی ئەوجارە خۆپیشاندانی خەڵك بەزۆری لە بەسڕاو نەجەف بوو؟ واتا بۆچی دانیشتوانی ئەوو دوو شارە بەو هەموو گوڕوتینەوە رژانە سەر شەقام

+راستە، هۆیەكەی بۆ ئەوە دەگەڕێتەوە كە خۆپیشاندانی ئەو جارەی خەڵك ئامانج‌و توڵایەكی ستراتیژی پێوە دیارە, هەڵبژاردنی ئەو دوو شارەش بۆ خاڵی خۆپیشاندان زیرەكی‌و وردبینییەكی زۆری پێوە دیارە، بەسڕا پایتەختی ئابووری عێراقە‌و بڕیارە پەرلەمانیش لە رووی یاسایی ئاوا بیناسێنێت، بۆیەش خرۆشان‌و هاتنەسەر شەقامی خەڵكی بەسڕا لێدانی ئەو بەرنامە‌و عەقڵیەتە ئیدارەییە ئابووریەیە كە حوكمڕانانی عێراق بەڕێوەی دەبەن‌و رەتكردنەوەی ئەو شێوازی كاركردنەیە كە ئابووری ئێستای عێراق كۆڵەگەكانی لەسەر بونیاتناوە، هەروەها خۆپیشاندانی دانیشتوانی نەجەفەیش بەو هەموو گوڕ‌و تین‌و بێزارییەی كە پێیانەوە دیارە، لێدانی خەڵكی نەجەفە لەو مۆدێلە سیاسییە مەزهەبیەیە كە هێڵە گشتییەكانی سیاسەتی حوكمڕانی عێراقی پێ‌ داڕێژراوە، تێكشكاندنی رەمزیەت‌و سونبڵی دەسەڵاتی مەزهەبگەرایی شیعەیە، كە بەشی زۆری شیعەكانی دنیا بە پایتەختی خۆیان دەزانن.

بە كورتی خۆپیشاندانی ئەمڕۆی كۆمەڵانی خەڵكی عێراق شكست‌و فەشەلی ئەو حوكمڕانییە سیاسییەی عێراقە كە هێزی خۆی لە چەك‌و میلیشیا‌و هەیبەتی هۆی لە دروشمی مەزهەبی‌و كەسایەتی مەعنەوی خۆی لەوابەستەیی بە ئێراندا دەبینێتەوە، فەشەلی ئەو حكومەتەیە كە ئایدیۆلۆژیا‌و بەهاكانی پێ‌ لە مرۆڤ گەورەترن‌و مرۆڤ لای ئەو كۆیلەیەكی مل بەتۆقی گوێڕایەڵە نەك بوونەوەرێكی خاوەن ماف‌و رێز. 

لە عێراق ئەمڕۆ نرخ‌و بەهای ئیمان لەسەرووی نرخەكانی ژیانەوەیە، نرخی مەزهەب لەسەرووی ماف‌و شكۆی مرۆڤە، لە عێراق پێگە‌و رێزی مرۆڤ بەو پابەندبوونە دیاری دەكرێت كە بە مەزهەب هەیەتی، راستە عێراق دەستووری هەیە‌و تاڕادەیەك كۆمەڵێك ماددەی باشیشی تێدایە، بەڵام ئەوەی لەسەر زەمینی واقیعدا هەیە عێراق دەوڵەتی میلیشیایە.

-پێت وایە حكومەتی عێراق بتوانێت خواست‌و داواكارییەكانی خەڵك جێبەجێ‌ بكات؟ ئەگەر نەشیكات دەتوانێت بەر بەو ناڕەزایی‌و هاتنە سەر شەقامەی خەڵك بگرێت بە زەبری هێز؟

+لەو چەند رۆژەی دوایی راپەڕینی خەڵكی عێراق هەندێك بڕیاری حكومەتم گوێ‌ لێ‌ بوو كە تایبەت بوو بە وەڵامدانەوەی خەڵك بەراستی مایەی پێكەنینە!! (سەعد حدیسی) وتەبێژی حكومەتی عێراق دەڵێت حكومەت لەمەوپاش بۆ چارەسەرەكردنی كێشەی بێ‌ ئاوی بە تانكەر ئاو بەسەر دانیشتوانی بەسڕادا دابەش دەكات، بۆ چارەسەركردنی كێشەی كارەباش بەنیازین گرێبەست لەگەڵا حكومەتی سعودیە بكەین، كە ئەمەش هەم لەسەر داهات‌و میزانیەی ئەو دوو شارە دەكرێت‌و هەم لەلایەكیش خۆدزینەوەی حكومەتە لە چارەسەركردنی كێشەكان بەشێوەیەكی بنەڕەتی، جگە لەمەش ئەگەر حكومەتی عێراق هۆی لە داواكاری خەڵك بدزێتەوە‌و بیەوێت بە زەبری هێز خواست‌و داواكاری خەڵك سەركەوت بكات، دەشێت بۆ ماوەیەكی كاتی شەقام خامۆش بكاتەوە، بەڵام دواتر جەماوەر بە دروشم‌و بەرنامە‌و داواكاری گەورەتر‌و بەجۆش‌و خرۆشێكی ترەوە‌و دێنەوە سەر شەقام‌و رایكاڵانەتر رووبەڕووی حكومەت بێتەوە‌و دواتر ببێتە مایەی زیاتر داڕووخانی عێراق لە رووی ئیداری‌و ئابووری‌و سەقامگیری سیاسی.

بەرێوەبەرایەتی پۆلیسی هاتوچۆی سلێمانی رایدەگەیەنێت، لە رووداوێکی هاتوچۆدا کەسێک گیانی لەدەستداوە.

رۆژی یەكشەممە 22ی تەموزی 2018 بەڕێوەبەرایەتی پۆلیسی هاتوچۆی سلێمانی لە راگەیەندراوێکدا بڵاویکردەوە، لە ئەنجامی رووداوێکی هاتوچۆ لەسەر رێگای خەلەکان – دوکان کەسێک گیانی لەدەستداوە و کەسێکی دیکەش بریندار بووە.

پۆلیسی هاتوچۆی سلێمانی راشیگەیاندووە، کاتژمیر 12:35 خولەکی پاشنیوەڕۆی ئەمڕۆ لە نزیک گوندی فیزەڵە و لەسەر ڕێگای خەلەکان – دوکان، پێکدادان لە نێوان دوو ئۆتۆمبێل لە جۆرەکانی تۆیۆتا (هایلۆکس) و کیا (سپۆرتاج) ڕوویداوە و بەوهۆیەشەوە شۆفێری هایلۆکسەکە گیانی لەدەستداوە و شۆفیری کیا سپۆرتاجەکەش بریندار بووە.

هەر لەراگەیەندراوەكەی پۆلیسی هاتوچۆی سلێمانی هاتووە، هۆکاری ڕووداوەکە بۆ تیژڕه‌وی ‌و كۆنترۆڵ له‌ده‌ستدانی كیا سپۆرتاجه‌كه دەگەڕێتەوە كه‌ به‌و هۆیه‌وه‌ چووه‌ته‌ سایدی به‌رامبه‌ر ‌و خۆی به‌ ئۆتۆمبێله‌كه‌ی دیكه‌دا كێشاوه‌.

تاهیر عەبدوڵڵا، جێگری پارێزگاری هەولێر بە ماڵپەڕی رێگای كوردستانی راگەیاند: "سەرلەبەیانی ئەمڕۆ دوو چەکدار چوونەتە نێو باڵەخانەی پارێزگا و پۆلیسێک بە تەقەی ئەو دوو چەکدارە بریندار بووە".

جێگری پارێزگاری هەولێر بە رێگای كوردستانی راگەیاند: "هێزەکانی ئاسایش چواردەوری بینای پارێزگایان دەورەداوەو بەدوای ئەو چەکدارانەدا دەگەڕێن".

كاك تاهیر گوتی: ئاسایش باڵەخانەکەیان کۆنترۆڵکردووە و بەدوای ئەو دوو چەکدارەدا دەگەڕێن.

پەیامنێرمان لە نزیك شوێنی روداوەكە پێی گوتین: دوو چەكدارەكە گومانی داعشیان لێدەكرێت و هێزەكانی ئاسایش و پۆلیسیش چوونەتە ناو باڵەخانەكەوەو ژوور ژوور لێیان دەگەڕێن.

 

نیوەڕۆی ئەمڕۆ بوومەلەرزەیەکی بەهێز هەولێر، سلێمانی، هەڵەبجە، گەرمیان و راپەڕین-ی لە هەرێمی کوردستان هەژاند.

رۆژی یەكشەممە 22ی تەموزی 2018 بەڕێوەبەرایەتی كەشناسی و بومەلەرزەزانی ھەرێمی كوردستان لە راگەیەندراوێكدا ئاشكرای كرد، "كاتژمێر 13:07 خولەك ئەمڕۆ 22/7/2018 بوومەلەرزەیەك لە رۆژھەڵاتی كوردستان تۆماركراوە لە ناوچەی تازە ئابادی كرماشان بە قوڵایی 5.7كم بە گوڕی 5.9 پلەی رێختەر لە زۆربەی شارەكانی كوردستان ھەستی پێكراوە و ھیچ زیانێكی نەبووە".

لەلایەكی دیكەوە ناوەندی تۆمارکردنی بوومەلەرزەی ئێران بە میدیاكانی وڵاتەكەی راگەیاند، لەکاتژمێر 14:37 خولەک بەکاتی تاران کە دەکاتە کاتژمێر 13:07 خولەک بەکاتی هەولێر، بوومەلەرزەیەک بەگوڕی 5.9 پلەی ریختەر تازئاوای کرماشانی هەژاند، هەروەها لەکاتژمێر 14:43 خولەک جارێکی دیکە بوومەلەرزە بە پلەی 3.4 پلەی ریختەر تازئاوای کرماشانی هەژاندووەتەوە.

هەرێمی کوردستانیش کەوتووەتە ژێر کاریگەریی بوومەلەرزەکەی کرماشان، لە پارێزگاکانی سلێمانی، هەڵەبجە، کەرکووک، هەولێر و لە ئیدارەکانی گەرمیان و راپەڕینیش هەستی پێکراوە.

بەپێی ئاژانسی هەواڵی فەرمی ئێران، بەهێزی بوومەلەرزەکەی تازەئاوای کرماشان وایکردووە لە شارەکانی دیکەی پارێزگاکەش بوومەلەرزە رووبدات و ئێستا بەشێکی زۆر لە خەڵکی رۆژئاوای پارێزگای کرماشان لە دەرەوەی ماڵەکانیانن.

قایمقامی تازئاوای کرماشان رایگەیاند: "تاوەکو ئێستا بەهوۆی بوومەلەرزەکەوە 15 کەس برینداربوون و چەندین خانوو لەو ناوچانەی کە خانووەکانیان کۆنن رووخاون".