راوێژكاری سه‌ركۆماری ئێران ئەو مەرجە ئاشكرا دەكات كە وڵاتەكەی بۆ گفتوگۆ له‌گه‌ڵ ئه‌مریكا داینا.

رۆژی سێشەممە 31ی تەموزی 2018 یه‌كه‌م كاردانه‌وه‌ به‌رامبه‌ر روونكردنه‌وه‌كانی دۆناڵد تره‌مپ سه‌رۆكی ئه‌مریكا، ئه‌بوتوراب راوێژكاری سه‌ركۆماری ئێران له‌ روونكردنه‌وه‌یه‌كدا كه‌ له‌ هه‌ژماری تایبەتی خۆی له‌ تۆڕی کۆمەڵایەتی تویته‌ر بڵاویكرده‌وه‌، رایگه‌یاند "رێزگرتن له‌ گه‌لی ئێران، كه‌مكردنه‌وه‌ی دوژمنایه‌تییه‌كان و گه‌ڕانه‌وه‌ی ئه‌مریكا بۆ رێككه‌وتنی ئه‌تۆمی زه‌مینه‌ی گفتوگۆ و كۆبوونه‌وه‌ پێکدەهێنێت".

دۆناڵد تره‌مپ سه‌رۆكی ئه‌مریكا، له‌ میانی كۆنگره‌یەکی رۆژنامه‌وانیدا له‌ كۆشكی سپی كه‌ له‌گه‌ڵ سه‌رۆكوه‌زیرانی ئیتاڵیا، جوزیبی كۆنتی ئه‌نجامیدا، ئاماژه‌ی به‌وه‌ كرد كه‌ ده‌كرێت له‌گه‌ڵ سه‌ركۆماری ئێران، حه‌سه‌ن روحانی كۆببێته‌وه‌ و، رایگه‌یاند "ئه‌گه‌ر ئێران بخوازێت ئه‌وا به‌دڵنیاییه‌وه‌ كۆده‌بینه‌وه‌. كێشه‌یه‌ك نییه‌ له‌ گفتوگۆكردن له‌گه‌ڵ كه‌سانی دیكه‌دا. به‌تایبه‌تی كاتێک بابەتی جەنگ و مردن لەئارادایە له‌گه‌ڵ ئه‌و كه‌سانه‌دا كۆده‌بینه‌وه‌. كێشه‌یه‌ك له‌وه‌دا نییه‌. له‌گه‌ڵ سه‌رۆكی كۆریای باكووریشدا كۆبوومه‌وه‌. له‌به‌رئه‌وه‌ مه‌رجی پێشوه‌خته‌ نییه‌ بۆ كۆبوونه‌وه‌ له‌گه‌ڵ روحانی".

دۆناڵد ترەمپ، سەرۆکی ئەمریکا رایگەیاند، وەک چۆن لەگەڵ سەرۆکەکانی کۆریای باکوور و رووسیا کۆبووەوە، لەگەڵ ئێرانیش كۆدەبمەوە ئەگەر بیانەوێ.

لە کۆنفرانسێکی رۆژنامەوانیدا لەگەڵ سەرۆکوەزیرانی ئیتاڵیا لە کۆشکی سپی، دۆناڵد ترەمپ رایگەیاند "بۆ کۆبوونەوە لەگەڵ کەسانی دیکە بەتایبەتی کە بابەتی جەنگ و مردن لەئارادایە، ئامادەین کۆببینەوە، هیچ کێشەمان لەگەڵ کۆبوونەوە نییە. لەگەڵ سەرۆک کیم کۆبووینەوە و نۆ مانگە گوێبیستی تاقیکردنەوە مووشەکییەکانی کۆریای باکوور نەبووین. بەڵام میدیا ساختەکان رووماڵی ئەوە ناکەن. هەروەها کۆبوونەوەیەکی باشم لەگەڵ سەرۆک پووتین ئەنجامدا کە پەیوەندی بە داهاتوو و سەلامەتی و گەشەی ئابووری و پارێزگاریکردن لە ئیسرائیل و هەوو لایەنەکانی دیکە هەیە. کۆبوونەوەیەکی باشمان لەگەڵ ناتۆ ئەنجامدا و دوای ئەوە سەدان ملیار دۆلاریان بۆ سیستەمی بەرگری زیادکرد".

لەبارەی کۆبوونەوە لەگەڵ حەسەن رووحانی، سەرۆککۆماری ئێران، ترەمپ گوتی "بەدڵنیاییەوە لەگەڵ ئێرانیش کۆدەبمەوە ئەگەر بیانەوێ کۆببینەوە. ئینجا نازانم ئاخۆ ئامادەن یان نا، ئێستا بە دۆخێکی سەختدا تێپەڕدەبن. بەڵام کۆتاییم بە رێککەوتنی ئێران هێنا کە رێککەوتنێکی گەمژانە بوو. پێموایە ئەوانیش لەکۆتاییدا دەیانەوێت کۆببنەوە. هەر کاتێک ئامادەبن من ئامادەم، پێموانییە کۆبوونەوە لە لاوازی یان بەهێزی من بێت. ئەگەر بتوانین شتێک رێکبخەین واتاداربێت، بەفیڕۆدانی کاغەز نەبێت. بەدڵنیاییەوە ئامادەی ئەو جۆرە کۆبوونەوەم. هیچ مەرجی پێشینەم نییە".

 

 

بانکی ناوەندی ئێران ئاشكرای دەكات، دابەزینی بەهای تمەن بەشێکە لە پیلانی دوژمنانی کۆماری ئیسلامی ئێران.

رۆژی دووشەممە 30ی تەموزی 2018 بانکی ناوەندی ئێران راگەیێندراوێکی لەبارەی دابەزینی پێوانەیی نرخی تمەن بەرامبەر دۆلار بۆ سەروو 11 هەزار تمەن بڵاوکردەوە و رایگەیاند، ئەو دابەزینە لەگەڵ راستییەکانی ئابووری ئێران یەکناگرێتەوە.

بانکی ناوەندی ئێران لە راگەیەندراوەكەیدا ئاماژەی بەوەشكردووە، دابەزینی بەهای تمەن بەشێکە لە پیلانی دوژمنانی کۆماری ئیسلامی ئێران

رۆژی یەکشەممە 29ی تەموزی 2018، نرخی دۆلار و زێڕ لە ئێران رێژەیەکی پێوانەیی تۆمارکرد و نرخی هەر دۆلارێک بەرامبەر تمەن بۆ سەرۆ 11 هەزار تمەن بەرزبووەوە و نرخی لیرەی ئێرانیش ناسراو بە سکەی ئیمامی لە رۆژێکدا 500 هەزار تمەن بەرزبووەوە.

ڕێناس گەرمیانی

بەرپرسی پێشووی ڕاگەیاندنی قایمقامیەتی خورماتوو تێكشكاندنی پەلامارێكی چەكدارانی داعشی لە سنوری پارێزگای سەڵاحەدین ڕاگەیاند.

محەمەد فایەق بەرپرسی پێشووی ڕاگەیاندنی قایمقامیەتی خورماتوو لەمبارەیەوە بە (ڕێگای كوردستان)ی ڕاگەیاند:- بەرەبەبانی ڕۆژی 30/7/2018 ژمارەیەك چەكداری داعش هەڵیانكوتاوەتە سەر كێڵگە نەوتییەكانی ناوچەی عەلاسی سەر بە پارێزگای سەڵاحەدین ودوای شەڕێكی سەخت ئەو پەلامارە لە لایەن پاسەوانانی گێڵگە نەوتییەكەو پۆلیسی ئیتحادییەوە تێكشكێنرا.

گوتیشی:- لەو شەڕوپێكدادانەدا هیچ كوژراو بریندارێك لە هەردوولا نەكەتەوە تەنها زیانی مادی نەبێت كە بەر كێڵگەكە كەوتووە .

بانكی ناوەندی عێراق كۆی بڕی پارەی وەرگیراو و خەرجییەكانی وەزارەتی دارایی لە دراوی بیانی لەنێوان ساڵانی 2005 ـ 2017 ئاشكراكرد.

رۆژی دووشەممە 30ی تەموزی 2018 بانكی ناوەندی عێراق لە راگەیێندراوێکدا ئاشكرای كردن كە، "لە ساڵی 2003 تاوەكو ئەمساڵ، ئابووری عێراق بەشێوەیەكی بەرچاو هەڵكشانی لە داهاتی نەوت بەخۆیەوە بینیوە لەگەڵ بەرزبوونەوەی نرخەكانی نەوت".

هەر لە راگەیێندراوەکەدا هاتووە، "كۆی بڕی پارەی وەرگیراوی دراوی بیانی لەوەزارەتی دەرەوە لە نێوان ساڵانی 2005 ـ2017 نزیكەی 706.23 ملیار دۆلاری ئەمریكی بووە، بڕی پارەی خەرجكراویش گەییشتووەتە 703.11 ملیار دۆلار كە دەكاتە 99.5% ی قەبارەی كۆی داهات".

بەپێی راگەیێندراوەکەی بانكی ناوەندی عێراق، "ئەو خەرجكردنە بەسەر چەند بەشێكی جۆراوجۆر دابەشدەكرێت گرنگترینیان كردنی بە دینارە، كە وەزارەتی دارایی لە بودجەی گشتی خەرجیدەكات و لە نێوان ساڵانی 2005 تاوەكو 2017 بڕەكەی گەییشتووەتە نزیكەی 488.6 ملیار دۆلار كە دەكاتە 69.5%ی كۆی خەرجی، هاوردەكانی حكومەت لە هەمان ماوەو لەرێگەی بانكی بازرگانی عێراقی TBI بە بڕی 156.9 ملیار دۆلار و بەڕێژەی 22.3%ی كۆی خەرجییەكان بە پلەی دووەم دێت، ئینجا خەرجییەكانی دانەوەی شایستە داراییەكانی بەڵێندەرانی گرێبەستەكانی خزمەتگوزاری نەوت، لەگەڵ 41.5 ملیار دۆلار بەڕێژەی 5.9% كۆی خەرجی بواری سەربازی، ئەوەی ماوەتەوە كە 2.3%ـە لە كۆی خەرجی گشتیی بۆ دانەوەی قەرزەكانی سەر عێراق و خەرجی دیكە بەكارهێندراوە".

بانکی ناوەندی عێراق ئاماژە بەوەشكردووە، "ساڵی 2012 لەڕووی داهاتەوە باشترین ساڵ بوو كە كۆی قەبارەی داهات گەیشتە 106.23 ملیار دۆلار، هاوكات زۆرترین خەرجیش لە ساڵی 2013 بووە كە بڕەكەی گەیشتە نزیكەی 97.45 ملیار دۆلار، كۆی داهاتی نێوان ساڵانی 2005 تاوەكو 2013 بە رێژەی 21.7% بەشێوەیەكی بەرچاو گەشەیكردووە و بە بەراورد لەگەڵ گەشەی نێوان ساڵانی 2014 ـ2017 كە رێژەكەی 5.4%بووە، سەبارەت بە كۆی خەرجیش هەمیشە لە نێوان ساڵانی 2005 تاوەكو 2013 بەڕێژەی 24.3% گەشەیكردووە، بەڵام لە نێوان ساڵانی 2014 ـ2017 بەرێژەی 9.1% گەشەكه نەرێنی بووە".