ئەمە بڵاوبكەوە
FaceBook  Twitter  

سندوقی وەبەرھێنانی گشتی سعوودیە رایدەگەیەنێت، کە ھەموو رێوشوێنەکانی بە مەبەستی وەرگرتنی یەکەم قەرز بە بڕی ١١ ملیار دۆلار تەواوکردووە.

رۆژی دووشەممە 17ی ئەیلولی 2018 سندوقی وەبەرھێنانی گشتی سعوودیە لە بەیاننامەیەکدا رایگەیاند، وەک یەکەم ھەنگاو لە چوارچێوەی بەرنامە ستراتیجییەکەی بۆ پشتیوانی دارایی لە کارو پڕۆژەکانی، ١١ ملیار دۆلار وەک قەرز وەردەگرێت.

بەپێی بەیاننامەکە سەرپەرشتیاری سندوقەکە، یاسر بن عوسمان رمیان رایگەیاندووە کە بری قەرزەکە، خەمڵاندنەکانی سندوقەکەیانی تێپەڕاندووە، ئەمە وێرای رەچاوکردنی ئەو گرنگییە زۆرەی کە لە لایەن بانکەکان و دامەزراوە داراییەکانەوە دراوە لەگەڵ پابەندبوون بە پێشکەشکردنی باشترین نرخ.

یاسر بن عوسمان رمیان گوتوویەتی "گرنگە لە چوارچێوەی کار و پڕۆژە وەبەرھێنانەکانمان، کۆمەڵێک بانکی سەرەکی لەو بانکانەی کە ئێمە مامەڵەیان لەگەڵدا دەکەین دامەزرێندرێن".

لە بەیاننامەکەدا ھاتووە، دوای دامەزراندنی سندوقی بەڕێوبردنی گەنجینە لە ساڵی ٢٠١٧دا، وەرگرتنی ئەو قەرزە دەبێتە پشتیوانی دارایی بۆ کار و پڕۆژەکانی سندوقی وەبەرھێنانی گشتی سعوودیە.