ئەمە بڵاوبكەوە
FaceBook  Twitter  

 

سەركۆماری ئێران، حەسەن روحانی رایگەیاند كە بەشێك لە بەڵێنەكانیان لە چوارچێوەی رێككەوتنی ئەتۆمی راگرتووە و ماوەی 60 رۆژیان داناوە بۆ لایەنەكانی رێككەوتنەكە بۆ پاراستنی بەرژەوەندییەكانی ئێران.

 لە گوتارێكیدا بەبۆنەی ساڵیادی كشانەوەی سەرۆكی ئەمریكا، دۆناڵد ترەمپ لە رێككەوتنی ئەتۆمی لە هەشتی ئایاری 2018دا، روحانی باسی لەوە كرد كە وڵاتەكەی دوو بەڵێنی لە چوارچێوەی ئەو رێككەوتنە راگرتووە.

 روحانی باسی لەوە كرد كە ماددەكانی 26 و 36ی رێككەوتنە ئەتۆمییەكە مافی گرتنەبەری هەنگاوی بەرامبەری پێداون ئەگەر لایەنی بەرامبەر ئەو بەڵێنانەی داوێتی پێشێلی بكات، ئەوەیشی خستەڕوو كە ئەمڕۆ بە پێنج وڵاتەكەی لایەنی رێككەوتنە ئەتۆمییەكەیان راگەیاندووە كە دوو جێبەجێكردن رادەگرن.

 حەسەن روحانی ئاماژەی بەوەیش كرد كە لە چوارچێوەی رێككەوتنەكەدا لە پیتاندنی یۆرانیۆمدا كاتێك زیاد لە 300 كیلۆگرامیان پیتاندووە فرۆشتوویانە بە وڵاتانی دیكە و لە بەرامبەردا یۆرانیۆمی نەپیتێندراویان وەرگرتووە، بەڵام لەمڕۆوە ئەو فرۆشە رادەگرن.

 روحانی راشیگەیاند هەركاتێك بڕی ئاوی قورس لە ئێران گەیشتبێتە سەرووی 130 تۆن، زیادەكەیان بە وڵاتانی دیكە فرۆشتووە و رایگەیاند، ئیدی فرۆشتنی ئاوی قورس و یۆرانیۆمی پیتێندراو رادەگرن.

 ئەو ئاماژەی بەوەدا كە ئەو هەنگاوەی پێی هەستاون، بۆ ماوەی 60 رۆژ كاری پێ دەكرێت و گوتی: "ئەگەر لە میانی 60 رۆژدا وڵاتانی لایەن لە رێككەوتنەكەدا لەسەر مێزی گفتوگۆ دابنیشن و لە فرۆشتنی نەوت و بانكداریدا بەرژەوەندییەكانمان دەستەبەر بكەن، دەگەڕێینەوە حاڵەتی ئەمڕۆ. لە چوارچێوەی رێككەوتنەكەدا پابەندین بە پیتاندنی سەدا 3،67 یۆرانیۆم، بەڵام ئەگەر لە كۆتایی ئەم 60 رۆژەدا لەگەڵ پێنج وڵاتەكە نەگەینە ئەنجامێك، كۆتایی بەو بەرپرسیارێتییە دەهێنین".

 روحانی هەروەها لەبارەی ناوەڕۆكی ئەو نامەیەی بۆ هەریەكە لە سەرۆكی وڵاتانی (رووسیا، چین، بەریتانیا، فەڕەنسا و ئەڵمانیا)ی ناردووە كە لایەنن لە رێككەوتنەكەدا، گوتی:

 "لەو پەیامەی بۆم ناردوون بەڕوونی پێم گوتوون، ئەگەر ئەم هەنگاوەی ئێمە بكەنە بەهانە و دۆسیەكە ببەنە ئەنجوومەنی ئاسایشی نەتەوە یەكگرتووەكان لە هەڵمەتێكی زۆر جددیدا رووبەڕووی یەكتر دەبینەوە".

 لە نامەكەدا لەبارەی هەنگاوە بڕاوەكانەوە دواوم كە دەیاننێین. بە پێشنیازی ئێوە ساڵێكە چاوەڕوان دەكەین. ئەمەش مێژووی ئارامی هێزی گەل و رۆحیەت بوو لەو ماوەیەدا. بە هەمان شێوە مێژووی خۆڕاگری و دیپلۆماسیشمان بوو. ئێمە لەو ماوەیەدا پابەندبووین بە بەڵێنەكانمان. ئێستاش نامانەوێت لە رێككەوتنە ئەتۆمییەكە بێینە دەرەوە. با گەلی ئێران و هەموو گەلانی جیهان بزانن كە ئەمڕۆ كۆتایی رێككەوتنی ئەتۆمی نییە".

لە بەشێكی دیكەی نامەیەكدا حەسەن روحانی نووسیوویەتی "دۆستە ئەورووپییەكانمان راستەوخۆ پەیوەندییان پێوە كردم و داوای كاتیان كرد، ئێمەش بە ئەرێنی وەڵاممان دانەوە. چونكە ئێمە گرنگیمان بە هۆكارە پێویستەكان دا و داوامان كرد گەلەكەمان پەلە نەكات. باش دەزانین كە رێككەوتنی ئەتۆمی بۆ ناوچەكە و جیهان تا چ رادەیەك گرنگە. لەبەرئەمە لە بری چەند هەفتەیەك چەندین مانگ ئاراممان گرت. ئەوانیش پەیوەندییان كرد و داوای كەمێك كاتی دیكەیان كرد. ئێمەش جارێكی دیكە ئاراممان گرت و لەو ماوەیەدا دۆستە ئەورووپییەكانمان قسەی باشیان كرد، بەڵام بە كردەیی هیچ ئەنجامێكیان نەبوو".