ئەمە بڵاوبكەوە
FaceBook  Twitter  

 

ڕێناس گەرمیانی-ڕێگای كوردستان

حەشدی شەعبی لە شارەدێی سەعدیە ودەوروبەری بەردەوامن لە ئەنجامی تاوان دژ كوردانی ناوچەكەو بەرسێكی حیزبیش ئاشكرای دەكات كەو ئەو حەشدانە لە گەڵ سوتاندنی دەغل ودانی جوتیارانی ناوچەكە هەشت رەزوباغی جوتیارانی كوردیان سوتاندووە .

شێركۆ تۆفێق كارگێڕی لقی خانەقینی پارتی دیموكراتی كوردستان بە (ڕێگای كوردستان)ی ڕاگەیاند: ماوەی كەمتر لە مانگێكە شەوانە ئاگر بەردەدرێت لە دەغڵ ودان وڕوزو باغی جوتیارە كوردەكانی ناوچەكە وڕووبەڕێكی زۆریش بەو هۆیەوە سوتا كە سەرەتا گومانی ئەوەمان لە لا دروستبوو ئەو كارە داعش پێی هەستابێت، بەڵام دواتر بۆمان دەركەوت كە ئەو حەشدی شەعبییەی كە لە ناوچەكە جێگیرن وزۆرینەشیان خەڵكی ناوچەكەن ئەوان بەو كارە هەستاون بۆ ئەوەی فشار لە كوردانی ناوچەكە دروست بكەن تاكو دەست بەرداری باغ وڕەزەكانیان بن وناوچەكە بەجێ‌ بهێڵن وكۆچ بكەن.

گوتیشی: لە ئێستادا شەوانە ئەو حەشدی شەعبییانە هەڵدەكوتنە سەر ڕەزو باخی جوتیارە كوردەكانی ناوچەكەو ئاگری تێبەردەدەن كە ئەمەش پیلانێكە حەشدی شەعبی بە هاوكاری دەستی دەرەكی ئەنجامی دەدات ولەو ڕووەوەش بەڵكە هەیە كە ئەو حەشدانە شەوانە وەكو داعش خۆیان دەردەخەن ودێنە ناوچەكە بۆ ئەوەی كەس نەیاناسێتەوە وئاگر لە دەغڵ ودانی وڕەزوباغی كورد بەردەدەن وڕێگریش لە تیمەكانی ئاگر كوژێنەوەش دەگرن بۆ ئەوەی ئاگرەكە نەكوژێننەوە تاكو ئەو دەغڵ ودان وڕەزو باخە بە تەواوەتی بسوتێت .

ڕوونیشی كردەوە،لە ئێستادا 36 گوندی كوردنشین لە سنوری شارۆچكەی سەعدیەدا هەن،بەڵام لە دوای ڕووداوەكەی 16ی ئوكتۆبەرەوەكە نەهامەتی وماڵوێرانی بۆ ناوچەكەمان هێنا 18 گوندی كورد نشین لە ترسی حەشدی شەعبی چۆڵیان كردووە وڕوویان لە ناوچە ئارامەكان كردووە ودوای چۆڵكردنیان ژمارەیەك رەزوباخیان بەجێهێڵاوە ولە ئێستاشدا حەشدی شەعبی وعەرەبی هاوردە دەستییان بە سەر ئەو ڕەزوباخانەدا گرتووە وئەوەی بە كەڵك بێت بۆخۆیان بەكاریان دەهێنن ودەیبەن وئەوەش بە كەڵك نەیەت ئاگری تێبەردەدەن ودەیسوتێنن، لەگەڵ سوتاندنی دەغڵ ودانی جوتیارانی كورد لە سنوری شارەدێی سەعدیەش هەشت ڕەزوباخی گەورەی جوتیارانی كورد بەتەواوتی لە لایەن حەشدی شەعبییەوە ئاگری تێبەردراوسوتێنرا.

گوتیشی:- پێش سوتاندنی ئەو ڕەزوباخانە، بۆمبی چێنراو دادەنرێت لەو ناویاندا بۆ ئەوەی كە كاتێك جوتیارە كوردەكان دەچنە نێو ئەو ڕزوباخانە پێاندا بتەقێتەوەو وتیرۆریان بكات كە لە ماوەی 15 ڕۆژی ڕابردوودا دوو بۆمبی چێنراو لە ناو یەكێك لە ڕەزەكانی دەوروبەری شارەدییەكەدا تەقییەوەو دوو هاوڵاتی كردە قوربانی كە ئەوەش مەترسییەكی زۆری لە لای جوتیارە كوردەكانی ناوچەكە دروست كردووە ولە ئێستا زۆر بە وریاییەوە سەردانی ڕەزوباخەكانیان دەكەن ، یاخود هەندێكیان وازیان لە ڕزەباخەكانیان هێناوەو سەردانی ناكەن نەوەك بۆمب چێنرابێت وپێاندا بتەقێتەوە وبیانكاتە قوربانی.

ڕوونیشی كردەوە ،لە ئێستادا حەشدی شەعبی لە ناوچەكە بە ڕۆژ حەشدن وبە شەو داعشن وبە بەردەوامی تەعدا لە كوردانی ناوچەكە دەكەن وئازاریان دەدەن وهەڵدەكوتنە سەر ئەو كوردانەی كە تاكو ئێستاكە ماون وناوچەكەیان بەنەهێڵاوە وهەڕەشەی ئەوەیان لێدەكەن كە ئەگەر كۆچ نەكەن وناوچەكە بەجێنەهێڵن ونەڕوون ئەوا تیرۆریان دەكەن وماڵ وحاڵیان دەسوتێنن.

شێركۆ تۆفێق ئەوەشی خستە ڕوو ،ماوەی چوار مانگە دۆسێی ئەمنی ناوچەكە دراوەتە دەست حەشدی شەعبییەوە وئەوانیش بێجگە لە سوتاندنی دەغڵ ودانی هاوڵاتییان وتاڵان كردن هیچی دیكە ناكەن ئەویش بۆ ئەوەی ناوچەكە لە كورد پاك بكەنەوە ، هەروەها كارئاسانی وهاوكاری ئەو عەرەبانە دەكەن كە دێنە ناوچەكە وزەوی وزاری كوردیان پێدەدەن كە لە ئێستادا بە لێشاو عەرەبی هاوردە ڕوو لە ناوچەكەن دەكەن وزەوی وزاری كورد داگیر دەكەن وچونكە حەشدی شەعبیش پشتگریان لێدەكەن كەس ناوانێت توخونیان بكەوێتەوە.

لەو چوار چێوەیەدا، ساڵح مەهدی ئەندامی ئەنجومەنی شارەدێی سەعدییە بە(ڕێگای كوردستان)ی ڕاگەیاند: ماوەیەكە لە سنوری شارەدێی سەعدییە دەغڵ ودانی جوتیاران بە ئاشكرا ئاگری تێبەردەدرێت ودەسوتێنرێت وئەو ناوچەیەش ئەو دەغڵ ودانەی لێیە لە ژێر كۆنترۆڵی هێزە عێراقییەكان، بە تایبەت حەشدی شەعبیدایە كە لە پێش چاوی ئەوانەوە ئەو كارانە ئەنجام دەدرێت بە لاِم ئەوان لە بەرامبەردا بێدەنگییان هەڵبژاردووەو بێدەنگن وهیچ هەڵوێستێكیان نییە وتاكو ئێستاش یەك كەس دەستگیر نەكراوە ، ئەوەش كە سوتێنراوە بە سەدان دۆنمی كشتوكاڵی دەبێت ولە سەدا هەشتای بۆ جوتیارە كوردەكان دەگەڕێتەوە وئەوانیش چونكە تاكو ئێستا ئاوارەن ونەگەڕاونەتەوە بەو هۆیەش ناوتوانن لە كاتی سوتاندنی دەغڵ ودان وباخ وڕەزەكانیان هیچ بكەن.

ڕاشی گەیاند:- ئەم بابەتەمان لە كۆبەنەوەكانماندا باسكردووە وداواكاریشمان بۆ سەرەوەی خۆمان بەرز كردۆتەوە بۆ ڕێگری كردن لەو دیاردەیە وقەرەبو كردنەوەی ئەو هاوڵاتییانەی كە تووشی زەرەرو زیان هاتوون بەڵام تاكو ئێستا وەڵامی پێویستمان وەرنەگرتووە وچاوەڕوانی وەڵامین.