ئەمە بڵاوبكەوە
FaceBook  Twitter  

وەزارەتی تەندروستی عێراق ئاشکرای کرد، لە ئاكامی ئەو تەقینەوەیەی كە بە هۆی ئاگركەوتنەوە لە كۆگایەكی چەك و تەقەمەنی لە سەربازگەیەكی سەر بە حەشدی شەعبی لە ناوچەیەكی باشوری بەغدا رویدا، (13) هاوڵاتی مەدەنی برینداربون.

سەیف بەدر، وتەبێژی وەزارەتی تەندروستی عێراق لە راگەیەندراوێكدا ئاماژەی بەوەكردوە، لە ئاكامی تەقینەوەكەدا چەند موشەكێك بەسەر چەند خانویەكدا لە ناوچەی دۆرەی باشوری بەغدا كەوتەخوارەوە و بەهۆیەوە (13) هاوڵاتی مەدەنی برینداربون.

وتیشی: حەوت کەس لە بریندارەکان گەیاندراونەتە نەخۆشخانەی یەرموك و شەش کەسەکەی دیكەش گواستراونەتەوە بۆ نەخۆشخانەی مەحمودییە.

لای خۆیشییەوە ئەحمەد خەڵەف، ئەفسەر لە پۆلیسی بەغدا رایگەیاند؛ هێزێكی سوپا گەمارۆی شوێنی روداوەكەیان داوە و لێكۆڵینەوەیان لەبارەی هۆكاری تەقینەوەكە دەستپێكردوە. ئاماژەی بەوەشکرد، تەقینەوەكە زیانی زۆری ماددەی بە سەربازگەكە گەیاندوە.