ئەمە بڵاوبكەوە
FaceBook  Twitter  

 

كۆشكی سپی بەهەموارێكی یاسایی هاوكارییەكان بۆ كۆچبەران دەبڕێت و مۆڵەتی مانەوەیان پێنادات.

بەپێی راگەیەندراوێكی كۆشكی سپی، هەموارەكە بەئامانجی ئەوە كراوە كە ئەو هاوكارییە كۆمەڵایەتییانە بپارێزێت كە بۆ كەسانی كەم دەرامەت دابینكراوە.

بەپێی هەموارەكە، هاوكاریی دەوڵەت بۆ كۆچبەرانی كەم دەرامەت دەبڕدرێت و و مۆڵەتی مانەوە (ئیقامە)ش بە كۆچبەران نادرێت.

لەدەقی راگەیەندراوەكەی كۆشكی سپیدا هاتووە، "ئەم هەنگاوە وادەكات ئەو كۆچبەرانەی دێنە ئەمریكا لەسەر پێی خۆیان بوەستن و پشت بە هاوكاریی كۆمەڵایەتیی دەوڵەت نەبەستن".

ئاماژە بەوەش دراوە، ئیدی دەستەبەری تەندروستی و هاوكاریی خۆراك و شوێنی مانەوە بۆ كۆچبەرانی كەم دەرامەت دەستەبەر ناكرێت لەلایەن دەوڵەتی ئەمریكاوە و مامەڵەی بەهاووڵاتیبوونیش بۆ ئەو كۆچبەرانە ناكرێت كە لەئێستادا مۆڵەتی مانەوەیان هەیە و ئەگەری هەیە بنێردرێنەوە بۆ وڵاتەكانیان.

ئەو بریارەی ترەمپ دەیەوێت كۆچبەران پشت بە هاوكاریی دەوڵەت نەبەستن و بڕیارە لەماوەی 60 رۆژدا بڕیارەكە بچێتە بواری جێبەجێكردنەوە.