ئەمە بڵاوبكەوە
FaceBook  Twitter  

 

وەزارەتی گەنجینەی ئەمریكا بە تۆمەتی پێشێلكردنی سزاكانی سەر سوپای پاسداران، كەشتیی ئێرانیی "ئادریان دەریا-١"، كە ئاڵای پەنەمای لەسەرە، خستە لیستی سزاكانییەوە.

لە راگەیەنراوێكدا كە لەلایەن وەزارەتی گەنجینەی ئەمریكاوە بڵاوكراوەتەوە، ئاماژە بەوەكراوە ئەو كەشتییە لە بەرژەوەندیی فەیلەقی قودسی سەربە سوپای پاسداران، نەوتی گواستووەتەوە.

بەپێی راگەیەنراوەكە كەشتیی "ئادریان دەریا-١" بەهۆی ئەوەی بەمەبەستی پشتیوانییكردن لە سوپای پاسداران كە لە لیستی سزاكانی ئەمریكادایە، دوو ملیۆن و ١٠٠ هەزار بەرمیل نەوتی خاوی گواستووەتەوە، خراوەتە لیستی سزاكانەوە.

هاوكات وەزیری دەرەوەی ئەمریكا، مایك پۆمپیۆ، لە هەژماری خۆی لە تۆڕی كۆمەڵایەتی تویتەر، پەیامێكی لەبارەی كەشتییەكەوە بڵاوكردووەتەوە و رایگەیاندووە "وەزیری دەرەوەی ئێران، زەریف، گرنتی دایە بەریتانیا كە ئادریان دەریا-١ نەچووەتە سووریا. بەڵام ئێمە خاوەنی زانیاریی متمانەپێكراوین كە كەشتییەكە چووەتە بەندەری تەرتوس لە سووریا".