ئەمە بڵاوبكەوە
FaceBook  Twitter  

 

وەزارەتی كۆچ و كۆچبەرانی عێراق رایدەگەیەنێت، كەمپێكی ئاوارەكان لە باشووری پارێزگای نەینەوا داخراوە، ئەویش دوای ئەوەی سەرجەم ئاوارەكانی نیشتەجێی نێو كەمپەكە گەڕاونەتەوە بۆسەر زێدی خۆیان لە پارێزگاكانی سەڵاحەددین و ئەنبار.

عەلی عەباس جیانگیر بەڕێوەبەری گشتی فەرمانگەی كاروباری لقەكان لە وەزارەتی كۆچ و كۆچبەرانی عێراق، لە راگەیەندراوێكدا ئاماژەی بەوە كردووە كە كەمپی جدعەی شەش سەربە ناحیەی گەیارە باشووری پارێزگای نەینەوا داخراوە، دوای ئەوەی سەرجەم خێزانە ئاوارەكان كە لەو كەمپەدا نیشتەجێبوون گەڕاونەتەوە بۆسەر زێدی خۆیان لە پارێزگاكانی سەڵاحەددین و ئەنبار.

جیهانگیر باسی لەوەشكردووە كە هێشتا لە سنووری پارێزگای نەینەوا، ١٣ كەمپی تایبەت بە ئاوارەكان هەیە و دانەخراون.

ناوبراو راشیگەیاندووە كە ژمارەیەكی زۆری خێزانی ئاوارەش لە كەمپی حاجی عەلی لە پارێزگای نەینەوا گەڕاونەتەوە بۆسەر زێدی خۆیان، بۆیە لە میانی چەند رۆژی داهاتوودا، كەمپەكە دادەخرێت، هەروەها كەمپی حەمام عەلی یەك لەگەڵ كەمپی حەمام عەلیل دوو دەكرێن بە یەك كەمپ، چونكە لەئێستادا ژمارەیەكی كەم خێزانی ئاوارە لەو دوو كەمپەدا ماون و نیشتەجێن.