ئەمە بڵاوبكەوە
FaceBook  Twitter  

سه‌رچاوه‌یه‌كی ئه‌منی له‌ پارێزگای كه‌ربه‌لای باشووری عێراق، رایگه‌یاند، له‌ ئاكامی پێكداهه‌ڵپژانی هێزه‌ ئه‌منییه‌كان و خۆپیشانده‌رانی شاره‌كه‌، (9) هاووڵاتی بریندار بوون.

به‌ گوێره‌ی زانیارییه‌ میدیاییه‌كان، ئه‌و هاووڵاتییانه‌ به‌ فیشه‌كی پلاستیكی و به‌ هۆی به‌ركه‌وتنی گازی فرمێسكڕێژه‌وه‌ بریندار بوون.

پێكداهه‌ڵپژانه‌كه‌ دوای ئه‌وه‌ هات، كه‌ ژماره‌یه‌ك له‌ خۆپیشانده‌ران تایه‌ی ئۆتۆمبێلیان ئاگر تێبه‌ردابوو و رێگه‌ سه‌ره‌كییه‌كانیان داخستبوو.

له‌ شاره‌كانی ناوه‌ڕاست و باشووری عێراق، له‌ سه‌ره‌تای مانگی ئۆكتۆبه‌ری رابردووه‌وه‌ هاووڵاتیان بۆ داواكردنی چاكسازی و نه‌هێشتنی گه‌نده‌ڵی و دابینكردنی خزمه‌تگوزارییه‌ سه‌ره‌كییه‌كانی ژیانیان ده‌ستیان به‌ خۆپیشاندان و ناڕه‌زایی ده‌ربڕین كردووه‌.