ئەمە بڵاوبكەوە
FaceBook  Twitter  

گوتەبێژ بەناوی فەرماندەی گشتی هێزە چەکدارەکانی عێراق، عەمید یەحیا رەسول رایگەیاند، ١٤ کەس لەوانە دەستگیرکراون کە مووشەکیان ئاراستەی ناوچەی سەوز ناوەڕاستی بەغدا کردبوو؛ و جەختی لەوە کردەوە کە رێگە نادەن جارێکی دیکە ناوچەی سەوز بکرێتەوە ئامانج.

ئەم لێدوانەی یەحیا رەسول دوای ئەوە هات رۆژی هەینی هێزەکانی دژە تیرۆر، ١٤ کەسیان لە گرووپی کەتیبەکانی حزبوڵڵای عێراق دەستگیرکرد کە لەنێویاندا کەسانی بە رەگەز ئێرانی هەبوون، بەتۆمەتی ئەوەی ئامادەکارییان کردبوو بۆ هێرشی مووشەکی و کردنە ئامانجی ناوچەی سەوز.

یەحیا رەسول لە لێدوانێکدا رایگەیاند "ئەو ئۆپەراسیۆنەی هێزەکانی دژە تیرۆر ئەنجامیدا و لە میانیدا ١٤ چەکدار دەستگیرکران و دەستیش گیرا بەسەر سەکۆی مووشەک بۆ کردنە ئامانجی ناوچەی سەوز، گەڕانەوەی شکۆ بوو بۆ دەوڵەت".

یەحیا رەسول روونیکردەوە کە لێکۆڵینەوە لە دەستگیرکراوەکان بەردەوامە و جەختی لەوەشکردەوە کە رێگەنادەن جارێکی دیکە ناوچەی سەوز بکرێتەوە ئامانج.

چەند کاتژمێرێک دوای دەستگیرکردنی ئەو ١٤ کەسە، چەکدارانی سەر بە کەتیبەکانی حزبوڵڵا هەڵیانکوتایە سەر بارەگای دەزگای دژە تیرۆر لە ناوچەی سەوز.

لەلایەکی دیکەوە، دەستەی حەشدی شەعبی ئازادکردنی ئەو ١٤ گیراوەی ئەندامانی حزبوڵڵای رەتکردەوە، ئەمەش دوای ئەوە هات کە لە راپۆرتی رۆژنامەکانی ناوخۆی و نێودەوڵەتی ئاماژە بە ئازادکردنی ئەو گیراوانە درابوو.

بەرپرسی راگەیاندنی کارگێری ناوەندی حەشدی شەعبی، موئەید ساعدی بۆ ئانادۆڵو گوتی: "ئەو ١٤ دەستگیرکراوە لەلایەن فەرماندەیی ئۆپەراسیۆنە هاوبەشەکان رادەستی ئاسایشی حەشد کراون، و لە ئێستادا دەستبەسەرن و ئازادنەکراون".

ساعدی روونیکردەوە کە وێنەی رادەستکردنی گیراوەکان لەلایەن فەرماندەیی ئۆپەراسیۆنە هاوبەشەکان بە ئاسایشی حەشد کەسانێک وا لێکیانداوەتەوە کە ئەوانە ئازادکراون، ئەمەش راست نییە و جەختی لەوە کردەوە کە ئەو گیراوانە ئازاد ناکرێن تاوەکو لێکۆڵینەوە لەگەڵیاندا تەواونەکرێت.