ئەمە بڵاوبكەوە
FaceBook  Twitter  

رۆژی (3)ى ئابى ساڵى (2014)، دەوڵەتی ئیسلامیی ناسراو بە داعش، پەلاماری ناوچەی شەنگالی داو بەهۆیەوە سەدان هاوڵاتی ئێزدی كوژران و هەزارانی دیكەش ئاوارەبون و ژمارەیەكی زۆریش لە كچان و ژنانی ئێزدی لەلایەن چەكدارانی داعشەوە، ڕفێنران و وەك "كەنیزەك" مامەڵەیان لەگەڵدا دەكرا.

بەرەبەیانی رۆژی (3)ى ئابى ساڵى (2014)، داعش بە هێزێكی سەربازیی گەورەوە، پەلاماری گوندەكانی ناوچەی شەنگالی دا، ئێزدییەكانى وەک بێ باوەڕ دایە قەڵەم و هەر ئەوەش هۆكاری پەلاماردانی ناوچەكەیان و جینۆسایدكردنیان بوو.

بەر لە داگیركردنی شەنگال ‌و جینۆسایدكردنیان، ئێزیدییەكان داوایان لە حكومەتی عێراق و هەرێمی كوردستان كرد كە هاوكارییان بكەن، هەرچەندە بەڵێنی پاراستنیان پێدا بوون، بەڵام لەكاتی هێرشەكەدا، سوپای عێراق ناوچەكەی چۆڵ كرد.

بەهۆی هێرشەكانی داعشەوە بۆ سەر ناوچەكەیان، هەزاران هاوڵاتی روویان لە چیای شنگال كرد كە ئەوكاتە تەنیا پشت و پەناگەی ئێزیدییەكان بو، داعش كاتێك پەلاماری شەنگالی دا، كە لە لوتكەی دەسەڵات و بەهێزیدابوو، تەنانەت سوپای عێراقیش نەیتوانی ڕوبەڕوی بوەستێتەوە.

دواى ئەنجامدانى تاوانەکە، ڕێكخراوی نەتەوەیەكگرتوەكان كۆمەڵكوژیی ئێزیدییەكانی بە جینۆساید ناساند و لە پایتەختی چەندین وڵاتی جیهان بەو بۆنەیەوە ڕێوڕەسمی تایبەت ڕێكخرا.