ئەمە بڵاوبكەوە
FaceBook  Twitter  
 
هەردوو حکومەتی چین و هیندستان بڕیاریاندا کۆتایی بە گرژییەکانی ناوچە سنوورییەکانیان بهێنن و هێزە سەربازییەکانی سەر سنوورەکانیان کەمبکەنەوە.
 
لە پەراوێزی کۆبوونەوەکانی رێکخراوی وڵاتانی هاریکاریی شەنگهای کە لە مۆسکۆی پایتەختی رووسیا بەڕێوەچوو، هەردوو وەزیری دەرەوەی چین و هیندستان کۆبوونەوە و بڕیاردرا ژمارەی هێزەکانیان لە ناوچەی سنووریی لاداک کەمبکەنەوە.
 
لە راگەیێندراوێكی هاوبەشدا وەزارەتی دەرەوەی چین و هیندستان رایانگەیاند "تێکچوونی بارودۆخی سەر سنووری نێوان چین و هیندستان لە بەرژەوەندیی هەردوو وڵاتدا نییە و دەبێت کۆتایی بەو رەوشە نالەبارە بهێندرێت".
 
ناوچەی لاداک سەر بە هەرێمی کشمیرە کە دەکەوێتە سەر سنووری نێوان هیندستان و هەردوو وڵاتی چین و پاکستان، لە ساڵی 1947ـەوە ناکۆکیی نێوان ئەو سێ وڵاتەی لێکەوتووەتەوە؛ لە مانگی ئایاری ئەمساڵدا هەردوو وڵاتی چین و هیندستان دەیان هەزار سەربازیان رەوانەی ناوچەکە کرد و لە ئەگەری بەرپابوونی شەڕێکی سەربازیی سنووردار نزیکببوونەوە.
 
بەگوێرەی رێککەوتنە نوێیەکەی چین و هیندستان، بڕیاردراوە هەرچی هێزی سەربازیی زیادەیە بکشێنرێتەوە و هەردوولاش خۆیان لە هەرچیی کردەوەی سەربازیی ورووژێنەرە بەدووربگرن و کار بۆ دووبارە گەڕاندنەوەی متمانە و جێگیرکردنی ئاشتی بکرێتەوە.