ئەم هەواڵە بڵاوبكەوە
FaceBook  Twitter  

بڕیار محەمەد- رێگای كوردستان

لەناوچەیەكی نێوان سنووری ئیدارەی گەرمیان و دوزخورماتوو ، چوار چەكدار ڕێگە لەلیژنەی دابەشكردنی مووچەی مامۆستایانی خورماتوو دەگرن و هەموو پارەی مووچەی ژمارەیەك قوتابخانە و باخچەیەكی ساوایانیان بردوو و هەڵاتوون.

ئەمڕۆ چوار شەمە 10ی تشرینی یەكەمی 2018 ، ڕائید عەلی قەدووری، گوتەبێژی پۆلیسی گەرمیان، بە (رێگای كوردستان)ی راگەیاند "ئێوارەی سێشەمە، لەنێوان شارەدێی زینانە و شاری خورماتوو چوار چەكدار كە ئۆتۆمبێلێكیان پێبووە، ڕێگە لە ئۆتۆمبێلێك دەگرن كە چواری مامۆستا تێدا بووە وەكوو لیژنەی مووچەی هەرێمی كوردستان، مووچەی پێنج قوتابخانە و باخچەیەكی ساوایانی خوێندنگا كوردییەكانی خورماتوویان پێ بووە".

 گوتەبێژەكەی پۆلیسی گەرمیان، ڕوونی كردووەتەوە، كە لیژنەكە لەزنانەوە بۆ خورماتوو ڕۆشتوون بۆ ئەوەی مووچە دابەش بكەن.

ئەوەشی خستووەتەڕوو، كە چوار چەكدارەكە، هێرشیان كردووەتە سەر مامۆستاكان و هەموو پارەكەیان بردوو و پاشان هەڵاتوون.

 گوتەبێژی پۆلیسی گەرمیان، گوتیشی: "پۆلیس دەستی بەلێكۆڵینەوە كردووە و، گەڕان بەدوای ناسنامەی تاوانباران دەستی پێكردووە".