ئەم هەواڵە بڵاوبكەوە
FaceBook  Twitter  

دوای تێپەڕبوونی سێ رۆژ لە رووداوی تەقەکردن لە دکتۆر کەمال ئەحمەد سەعید، پزیشکی نەشتەرگەریی گشتی لە سلێمانی، هێزەکانی پۆلیس توانییان تەقەکەرەکە دەستگیربکەن.

رۆژی چوارشەممە 5ی كانانوونی 2018 عه‌مید ئاسۆ ته‌ها، بەڕێوەبەری پۆلیسی سلێمانی لە کۆنگرەیەکی رۆژنامەوانیدا رایگەیاند، "راستەوخۆ دوای رووداوەکە دەستمان بە لێکۆڵینەوە کرد، بەهۆی گرنگیی رووداوەکە چەند ئەفسەرێکمان راسپارد بۆ ئەوەی سەرەداوێکمان دەستبکەوێت، سەرئەنجام كاتژمێر12:00ـی ئەمڕۆ 5-12-2018 توانیمان ئەو کەسەی تاوانەکەی ئەنجامداوە، دەستگیربکەین".

عه‌مید ئاسۆ ته‌ها زانیاریی لەبارەی تەقەکەرەکە ئاشکراکرد و، رایگەیاند "ئەو کەسەی تاوانەکەی ئەنجامداوە لەدایکبووی ساڵی 1982ـە، دانیشتووی دەرەوەی سلێمانییە، بەناوی (هـ. ع. ک.) و پیشەی کاسبە. پێشتر دەمانچەیەکی جۆری میکارۆڤی کڕیوە بۆ ئەوەی ئەو تاوانەی پێ ئەنجامبدات، هەر دوێنێش دەمانچەکەی فرۆشتووەتەوە".

بەڕێوەبەری پۆلیسی سلێمانی راشیگەیاند، "هۆکاری ئەو رووداوە ئێمە جێیدەهێڵین بۆ لێکۆڵینەوە، بۆ ئەوەی دادگا بڕیاری لەبارەوە بدات، چونکە لەوانەیە قسەیەکی ئێمە ببێتە هۆی ئەوەی ئەو کەسەی تاوانەکەی ئەنجامداوە سوودی لێ وەربگرێت و، لەدەستمان دەربچێت، بۆیە زۆرجار کە ئێمە بێدەنگین، دەزانین بۆچی بێدەنگین".