ئەمە بڵاوبكەوە
FaceBook  Twitter  

 

گەڵا جاف

 

ئاسایشی كەلار رایدەگەیەنێت، لەبەر هەستیاری و بایەخی جوگرافی قەزای كەلار، سیستمی چاودێری كامێرایان لە تەواوی شارەكە داناوە و دەشڵێت، بۆ سانسۆر نییە لەسەر هاوڵاتیانی شارەكە.

لە ڕاگەیەندراوێكدا كەوێنەیەكی بەرێگای كوردستان دراوە، ئاسایشی كەلار رایدەگەیەنێت “لەئەزمونێكی سەركەوتوودا توانرا بیرۆكەی كۆنتڕۆڵكردن و چاودێركردن بۆ پاراستنی ئاسایش لەڕێگەی كامێرای چاودێرییەوە لە قەزای كەلاردا بەئەنجام بگەیەندرێت".

ئاسایشی كەلار ئاماژەی بەوەشكردووە: “لەبەر هەستیاری و بایەخی جوگرافی قەزاكەمان كە كەوتووەتە سەر هێڵی تەماسی نێوان هەرێم و ناوچە عەرەبییەكانی عێراق لەلایەك و نزیكی لە سنووری ئێران لە لایەكی دیكە، وای كردووە سود لە تەكنەلۆژیای سەردەم وەرگرین، ئەوەش دوای وەرگرتنی ڕەزامەندی ئیدارەی گەرمیان و بەڕێوبەرایەتی ئاسایشی گەرمیان".

لەبەشێكی تری راگەیەندراوەكەدا ئاسایشی كەلار ئاشكرای كردووە، تۆڕێكی فراوانی كامێرای چاودێری لە زۆربەی شەقام و فولكە و دەروازەكانی شاری كەلار بە دەروازەی گوندی ساڵەح ئاغا و ڕێگای كانی ماسی سەر بە ناحییەی قۆرەتووشەوە بە كامێرای پێشكەوتوو و خاون كوالێتی بەرز، بەستراون بە ژووری كۆنتڕۆڵ و ژووری چاودێرییەوە.

لەبارەی خەرجی و بودجەی ئەو پرۆژەیەوە ئاسایشی كەلار ئاماژەی بە هیچ بڕە پارەیەك نەكردووە، بەڵام ڕایگەیاندووە، زۆربەی كارەكان بە یارمەتی و هاوكاری ماددی “خەڵكانی دڵسۆز و خاوەن كۆمپانیا و كارگەكانی سنوری كەلار” بە دەست هاتووە.

“جێگەی خۆیەتی ئاماژە بەوە بكەین هەموو ئەو جێگایانەی كە ئەو كامێرانەی تێدا جێگیركراوە شوێنی گشتی و كراوە و ئاپۆڕای هاتوچۆی خەڵكییە و تایبەتمەند نییە بە تاك یان كەسانێكی دیاریكراو و بۆیە نابێتە هۆی دروستكردنی هیچ سانسۆرێك بۆ هاووڵاتیان”، لە ڕاگەیەندراوەكەی ئاسایشی كەلاردا هاتووە.