ئەمە بڵاوبكەوە
FaceBook  Twitter  

 

هونەری مۆدێرنە لە بواری شێوەكاریدا ئێستا لەسەر ئاستی جیهان گرنگیەكی تایبەتی هەیەو هونەرمەندان سەرقاڵن بە داهێنان لەم بوارەدا، هەڵبەتە بینەران و ئەوانەی بەدووی تابلۆی ناوازەوەن باشتر لەم هونەرە دەگەن بۆیە تادێ‌ خولیای ئەم هونەرە بەتایبەتی و هونەری شێوەكاری لە زیادبووندایە،

(رێگای كوردستان) بەباشی زانی هونەرمەندی بەتوانا (حەمە هاشم) بدوێنێ‌، چونكە ئەو لەم بوارەدا ئەزموونێكی دەوڵەمەندی هەیەو توانیویەتی لە چەند پیشانگایەكدا توانای خۆی پیشانی بینەرەكانی بدات، ئەوە جگە لەوەی لە بوارەكانی دی تابلۆدا جێ‌ فڵچەی ئەو، لە دیدی بینەرەكانیدا ماوەتەوە و لە هەمووشی گرنگتر زانیاری زیاتری پێیە..

سازدانی: هێرش مەغدید

 

- هونەری مۆدێرنە چییە ؟

+هونەری مۆدێرنە لە ساڵی 1863 دەستپێدەكات، تەوژمێكی دیاریكراوی هونەری نییە، بەڵكوو گشتگیر ترە، وە مێژووی مۆدێرنە لە سەرەتای ساڵانی شەستەكانەوە تەواو بووە، چوونكە هونەری پۆست مۆدێرنە جێگای گرتۆتەوە، ئەم جۆرە هونەرە كە تەواو دان دەنێت بە ئازادییەكانی هونەرمەند لە رووی ئایدیا و ماتڕیاڵەوە، یەكەم جار چەمكی مۆدێرنە یان (هونەری نوێ) لەلایەن رەخنەگری فەڕەنسی (ئالان پاونیس) بەكار هات، كاتێك نووسینێكی لەسەر هونەری ئەو هونەرمەندانە نووسی كە لەساڵی 1867 لە پیشانگایەكدا كارەكانیان رەفزكرابۆوە، بەتایبەتی كارە زۆر دانسقەكانی هونەرمەندی بەناوبانگ ( ئیدوار مانێ)، بۆیە زۆرێك لە مێژوو نووسانی بواری هونەر مۆدێرنە دەگێڕنەوە بۆ سەرەتای سەرهەڵدانی هونەری (ئیمپرێشینیزم)، چونكە گرنگترین خەسڵەتەكانی هونەری مۆدێرنە بریتییە لە ئازادی ڕەها لەكاركردنی هونەری، دوور لە هەیمەنەی ئایین و كۆمەڵگا، ئەمەش وایكرد بەدوایخۆیدا كۆمەڵێ رێبازی هونەری گرنگ بێنە كایەوە كە تێكڕایان دەچنە خانەی هونەری مۆدێرنەوە، وەك ئیمپرێشینیزم، كۆبیزم، ئەبستراكت، ئەبستراكتی دەربرینخوازی، دەربرنخوازی نوێ ..هتد.

 

- هونەری ئەنیستلەیشن چۆن هەڵدەسەنگێنن؟

+بەبڕوای من ئەنیستلەیشن جۆرێكە لە هونەری پۆست مۆدێرنە وەهەندێ ریشاڵی سەرەتایشی دەگەرێتەوە بۆ مۆدێرنە، بیركردنەوەی ئایدیایی كەسی هونەرمەند رۆڵ دەبینێ لە نمایشكردن و دامەزراندنی هونەری ئەنستلەیشن، هونەرمەند دەتوانێت بەهەرچی ماتڕیاڵێك خۆی پێی باشە و خزمەت بە ئایدیایەكەی دەكات بەكاربهێنێت بۆ دامەزراندنی كاری هونەری، زۆرێك لەو هونەرمەندە لاوانەی كە ئەمڕۆ لەكوردستان كاری ئەنستڵەیشن دەكەن، سەركەوتوو بوون، بەڵام ئەوەمان بیرنەچێت دەبێ هونەرمەند لە ئیقتیباسكردنی ئایدییای هونەرمەندی دیكە خۆی دوور بگرێت، چونكە من دەبینم زۆرێك لەوانەی تازە پێگەیشتوون، كاری ئەنیسیلەیشنی جوان نمایش دەكەن، بەڵام لە بنەڕەتدا ئایدیاكە هی خۆیان نیە، ئەوەش دەگەڕێتەوە بۆ هەژاری هونەرمەندەكە لە بیركردنەوە و مێژووی هونەرەكە و بێئاگایی لە تەوژمە زۆر خێراكانی پۆست مۆدێرنە.

ئەوەی زۆرگرنگە لە ئەنستلەیشندە گەیاندنی بیرۆكە و ئایدیای كارەكە لە رێگای كەرەستەی جۆراو جۆر بە ئاسانترین رێگای بینین بۆ بینەر.

 

-كاركردن بەرەنگی ئاوی یەكێكە لە شێوازە زۆر كۆنەكانی هونەری وێنە كێشان، لە ئێستادا كاركردن بەو شێوازە زۆر كەم بۆتەوە، هۆكارەكەی بۆچی دەگەرێنیتەوە؟

+لەراستیدا هونەری وێنەكێشان بە رەنگی ئاوی خەسڵەتی خۆی هەیە، و هەموو هونەرمەندێك رەنگە توانای ئەوەی نەبێت بە رەنگی ئاوی رەسم بكات، چونكە بەبڕوای من رەنگی ئاوی سەختترە لە رەنگی رۆنی و ئەكریلیك و شتەكانی دیكە، لەگەڵ تەوژمی سەدەی خێرایی، هونەرمەندانیش بیر لەو ماتریاڵانە دەكەنەوە كە زووتر و خێراتر كارەكانیان ئەنجام دەدا بەدەستەوە بۆیە لە هەندێ كاتدا ماتریاڵ رۆڵ دەبینێت، لە كەم بایەخدان بە رەنگی ئاوی، دواتر سەلیقەی چێژوەرگرتن لەلای بینەر رەنگە لەكارێكی رۆنی زووتر ئاوێتەی هێزە ئیستاتیكیەكەی تابلۆیەكی شێوەكاری ببێت وەك لە تابلۆیەكی ئاوی، هەرچەندە من باوەڕم وایە یەكێك لە چێژبەخشترین هونەر بۆ بینین، كاری وێنەكێشانە بە ڕەنگی ئاوی چونكە هەستی مرۆڤ نزیك دەكاتەوە لە دیمەنەكان.

 

پرۆفایبل

حەمە هاشم

ساڵی ١٩٧٣ لە كۆیە لە دایك بووە

دەرچووی پەیمانگەی هونەرە جوانەكانی هەولێرە

نزیكەی ١٢ پیشانگای تایبەتی كردۆتەوە

نزیكەی ١٠٠ پیشانگای هاوبەش بەشداربووە

ساڵی ٢٠٠٣ گەلەری كۆیەی دامەزراندووە

لە بواری شێوەكاری دەنوسێت و چەند كتێبێكی هەیە

بڕوانامەی ماستەری شەرەف و كارامەیی لەلایەن یونسكۆوە پێبەخشراوە لە پاریس

دوا پیشانگای تایبەتی ساڵی ٢٠١٨ لە شاری بێڵێفێڵد لە ئەڵمانیا كردۆتەوە

بەشداری ١٨ سیمپۆزیۆمی نێودەوڵەتی كردووە

دوا بەشداری لە سیمپۆزیۆمی هاورێیانی هونەر بووە لە شانشینی بوتان لە مانگی دووی ئەمساڵ.

ئێستا مامۆستایە لە بەشی شێوەكاری پەیمانگای هونەرە جوانەكانی هەولێر