ئەمە بڵاوبكەوە
FaceBook  Twitter  

زاهیر ئیبراهیم- سۆران

رێكخراوە جەماوەریەكانی حزبی شیوعی لە سۆران هۆشداری لە بەردەوامی تۆپباران و بۆردوومانی ناوچە سنوریەكان دەدەن و داوا لە سێ سەرۆكایەتیەكەی هەرێمی كوردستان و حكومەتی فیدڕاڵ دەكەن هەوڵی گەڕانەوەی ئارامی و ژیان بۆ ناوچە سنوریەكان بدەن. ڕشیدەگەینێت لە كاتێكدا ناوچە سنورییەكان پێشتر سەرچاوەیەكی دەوڵەمەندی كشتوكالی و ئابووری بوو لە ئێستاشدا سنورەكان بوونەتە مەیدانی شەڕ و جەنگ. 

ماوەی دوو ڕۆژە تۆپبارانكردنی برادۆست و باڵەكایەتی لەلایەن تۆیخانەكانی كۆماری ئیسلامی ئێران بەردەوامە و لە برادۆست لە ئەنجامی تۆپباران كچێكی تەمەن 18 ساڵان گیانی لە دەستدا و 2 كەسی تریش بەسەختی زامداربوون،لەم چوار چێوەیەدا رێكخراوە جەماوەریەكانی حزبی شیوعی لە سۆران دەڵێت" بەردەوامی ئەم دۆخە ناهەمووارە دەبێتە هۆی ئاوارەبوونی دانیشتوانی ناوچە سنورییەكان .

دەقی ڕاگەیاندراوی رێكخراوە جەماوەرییەكان .

بۆ / سێ سەرۆكایەتیەكەی هەرێمی كوردستان

حكومەتی عێراقی فیدڕاڵ

ڕای گشتی جیهان 

رێكخراوەكانی كۆمەڵی مەدەنی 

بەنیگەرانیەوە ڕایدەگەێنین تادێت دانیشتوانی ناوچە سنوریەكانی هەرێمی كوردستان لە باڵەكایەتی و برادۆست لە بەردەم داگیركاری توركیا و ئێراندا ڕووبەڕووی كارەسات و مەینەتی زیاتر دەبنەوە،ڕۆژانە گوند و كوێستانەكان لەلایەن فڕۆكەی توركیا و تۆپخانەكانی ئێران تۆپباران و بۆردوومان دەكرێت، قوربانی یەكەمیش لەم دۆخە ناهەموارەدا خەڵكی مەدەنی و بەشمەینەتی گوند و كوێستانەكانن كە لەماوەی دوومانگەی ڕابردوودا لە ئەنجامی تۆپباران و بۆردوومانی توركیا و ئێران چەندین هاووڵاتی شەهید و بریندار بوون، دواین كارەساتیش لە ئەنجانی هێرشەكانی ئێران لە برادۆست بووە هۆی شەهید بوونی كچێكی تەمەن 18 ساڵان و بریندار بوونی دووكەسی تر كە ئەندامی یەك خێزانن. ئێمە لە ڕێكخراوە جەماوەرییەكان وێڕای هاوخەمی بۆ خانەوادەی قوربانیەكان، هاوكات ئەم هێرشە بەردەوامانەی توركیا و ئێران ئیدانە دەكەین ، لەكاتێكدا ناوچە سنوریەكانمان لە ڕابردوودا سەرچاوەیەكی گرنگی كشتوكال و ئابووری دەڤەرەكە بوون، بە داخەوە لە ئێستاشدا خەریكە كوێستانە ڕەنگین و گوندەكان دەبنە مەیدانی جەنگ و كۆمەڵكوژی ڕۆلەكانی كورد، لێرەدا دووپاتی دەكەینەوە بەردەوامی ئەم ڕەوشە ئاڵۆزە دەبێتە هۆی كارەساتی گەورەتر، بۆیە ئەركی سێ سەرۆكایەتیەكەی هەرێمی كوردستان و حكومەتی فیدڕاڵە كە بە هەموو ڕێگایەك هەوڵی گەرانەوەی ئارامی و ژیان بۆ دانیشتوانی ناوچە سنوریەكان و سنورێك بۆ پێشێلكاری و داگیركاری توركیا و ئێران دابنێت و ڕای گشتی و رێكخراوەكانیش هەوڵەكانیان بخەنە گەڕ بەمەبەستی دروستكردنی فشار لەسەر نەتەوەیەكگرتووەكان بۆ ڕاگرتنی سیاسەتی شەڕ و دووژمنكارانەی ئێران و توركیا بەرامبەر گەلەكەمان .

لەگەڵ ڕێزماندا 

رێكخراوە جەماوەرییەكانی كۆمیتەی سۆران

حزبی شیوعی كوردستان

11/7/2019