ئەمە بڵاوبكەوە
FaceBook  Twitter  

دوای ئەوەی شەوی 17 لەسەر 18ی ئەم مانگە لەسەر شەقامی سەدمەتریی هەولێر ئۆتۆمبێلێك خۆی بە هاووڵاتییەكدا كێشا و شوفێرەكەش بۆ شوێنێكی نادیار هەڵات، پۆلیسی هەولێر دەستی بە لێكۆڵینەوە كرد و تاوانبارەكەی لە پیشخاپوور دەستگیر كرد.

رائید هۆگر عەزیز، بەڕێوەبەری راگەیاندن و وتەبێژی پۆلیسی هەولێر، بە میدیاكانی راگەیاند، شەوی 17 لەسەر 18ی ئەم مانگە، هاووڵاتییەك بە ناوی (فەهد حەیدەر رەفیق) كاتژمێر یەك و 7 خولەكی شەو ویستوویەتی لە شەقامی سەد مەتری نزیك چوارڕیانی بەنزینخانەی ئاكار بپەڕێتەوە، بەڵام ئۆتۆمبێلێك خۆی پێدا دەكێشێت و دەمودەست هاووڵاتییەكە گیان لە دەست دەدات و شوفێرەكەش بۆ شوێنێكی نادیار هەڵدێت.

وتەبێژی پۆلیسی هەولێر روونیشی كردەوە، پاش بەدەستهێنانی زانیاری، دەركەوت كە شوفێرەكە خەڵكی رۆژئاوای كوردستانە بە ناوی (خ.ح.ن) و دوای رووداوەكە ویستوویەتی بچێتە دەرەوەی وڵات، بەڵام لە پیشخاپوور بە هەماهەنگیی هێزەكانی پۆلیسی فریاكەوتن و ئاسایشی هەولێر بەشی نشینگەی سووریان، دەستگیر كراوە.

هۆگر عەزیز دەشڵێت، تاوانبار دانی بە تاوانەكەیدا ناوە و بەپێی ماددەی 24ی هاتوچۆ بەند كراوە.