ئەمە بڵاوبكەوە
FaceBook  Twitter  

بەڕێوەبەرایەتیی پۆلیسی پارێزگای هەولێر، دەستگیركردنی دوو كەسی بە تۆمەتی بازرگانیكردن بە ماددەی هۆشبەر راگەیاند و هەروەها كەسێكیشیان بە تۆمەتی دزیكردن و شكاندنی ماركێت قۆڵبەست كرد.

رائید هۆگر عەزیز، وتەبێژ و بەڕێوەبەری راگەیاندنی پۆلیسی هەولێر، بە میدیاكانی راگەیاند، دوابەدوای ئاگاداركردنەوەی بەڕێوەبەرایەتیی پۆلیسی نەهێشتنی تاوان- نووسینگەی ڕۆژئاوا بە بوونی دوو ڕووداوی جیا لە سنووری بنكەكەیان، دەستبەجێ دەست كرا بە لێكۆڵینەوەیەكی ورد و توانرا ناسنامەی سێ تۆمەتبار ئاشكرا بكرێت و دەستگیر بكرێن.

بەڕێوەبەری راگەیاندنی پۆلیسی هەولێر گوتیشی، دوو تۆمەتبار بە ناوەكانی (س.ش.ك) تەمەن (۲٤) ساڵ، (ز.ص.س) تەمەن (۲۱) ساڵ، كە هەڵسابوون بە بازرگانیكردن بە ماددەی هۆشبەر، هەروەها لە كاتی دەستگیركردنیان بڕێكی زۆر ماددەی هۆشبەریان لا بووە، بۆیە پەڕاوی لێكۆڵینەوەیان بۆ ڕێك خرا و ڕەوانەی بەردەم بەڕێز دادوەری لێكۆڵینەوە كرا، بەڕێزیشیان بڕیاری دا بە بەندكردنی هەردوو تۆمەتبار بە ماددە (۲٤)ی تایبەت بە ماددەی هۆشبەر.

هۆگر عەزیز روونیشی كردەوە، تۆمەتبارێكی دیكە بە ناوی (س.ع.ف) تەمەن (۳۹) ساڵ، هەڵسابوو بە شكاندنی ماركێتێك و دزینی بڕی (۸۱۰۰ $) هەشت هەزار و سەد دۆلار و (۲٫۰۰۰٫۰۰۰) دوو ملیۆن دیناری عێراقی، كە پەڕاوی لێكۆڵینەوەی بۆ ڕێك خرا و ڕەوانەی بەردەم بەڕێز دادوەری لێكۆڵینەوە كرا، بۆیە بەڕێزیان بڕیاری دا بە بەندكردنی تۆمەتبار بە ماددەی (٤٤۳) لە (ی.س.ع).