ئەمە بڵاوبكەوە
FaceBook  Twitter  

ڕێناس گەرمیانی

لە شاری خورماتووی داگیركراو، حەشدی شەعبی بەردەوامە لە پێشێلكارییەكان ولەو ڕووەوەش 350 عەرەبی سوننە مەزهەب دوای دەستگیر كردنیان بێ‌ سەروشوێنیان دەكات ونوێنەری هۆزەكانی بەیاتیش لە ناوچەكە ڕای دەگەیەنێت ئەو ڕەشبگیرییەی كە حەشدی شەعبی ئەنجامی دەدات دووبارە كردنەوەی ئەو تاوانەیە كە ڕژێمی بەعس ئەنجامی دەدا وخەڵكی دەستگیر دەكرد ودواتر بێ‌ سەروشوێن دەكرد بەبێ‌ ئەوەی ئاشكرای بكات كە لە سەرچی دەستگیر كراوە.

شێخ سائیر بەیاتی نوێنەری هۆزەكانی بەیات لە شارۆچكەی خورماتوو بە (ڕێگای كوردستان)ی ڕاگەیاند:- حەشدی شەعبە شەعبی لە هەر كوێ‌ بێت ئەوا كارەسات لەو شوێنە دروست دەكات ، بە تایبەت دژ بە عەرەبی سوننە مەزهەب ،چونكە ئەو یەك ئامانجی هەیە ئەویش لە ناوبردنی سوننەیە چی كورد بێت یا عەرب یاخود توركمان ، لە بەر ئەوەی سوننە بە دوژمنی سەرسەختی خۆی دەزانێت بۆیە لە هەر كوێ‌ بێ دەست بە ئەنجامدانی تاوانی جۆراوجۆر دەكات ودەست ناپارێزێت لە دەستگیر كردن وبێ‌ سەروشوێن كردنی عەرەبی سوننە مەزهەب .

گوتیشی:- ئەوەی كە حەشدی شەعبی ئەنجامی دەدات پیلانێكە لە لایەن وڵاتێكی دراوسێی عێراقەوە دارێژراوە بۆ ناوبردنی سوننە وچەسپاندنی هەیمەنەی شیعەگەرایەتی لە ناوچەكە بۆ هەرچی بییەوێت بۆ لە ناوبردنی سوننە لە ناوچە سوننە مەزهەبەكان كار ئاسانی بۆ دەكات وهانی حەشدی شەعبی دەدات بۆ ئەوەی ئەنجامی بدات ، لە ناوچەكەی ئێمەش دەستییان نەپاراستووەوە وچەندەها خەڵكیان لێمان تیرۆركردووە ولە ناوبردووە بە بیانووی ئەوەی كە ئێمە سەرچاوەی داعش وكاری تیرۆرستیین لە ناوچەكە ، بەڵام لە راستێدا وانییە ئەوەی لە ئێستادا پاڵپشتێ لە حەشد دەكات هەمان ئەو وڵاتەیە كە داعشی هێنایە ناوچەكە بۆ سوككردن ولە ناوبردنی سوننە .

راشی گەیاند، كە حەشدە شەعبی 350 هاوڵاتی عەرەبی سوننە مەزهەبی لە خورماتوو دەستگیر كردووە وبێ‌ سەروشوێن كردوون ، وەكو چۆن پاسەوانە كوردەكانی سەرۆكایەتی كۆماری عێراقی لە چەند ساڵی ڕابردوودا لە سنوری شارەدێی ئامرلی لە باشوری شارۆچكەی خورماتوو دەستگیر كرد ودواتر بێ‌ سەروشوێنیانی كردو تاكو ئێستاش چارەنووسیان نادیارەو كەس وكارەكانیان بە تەمای گەڕانەوەو ئازادكردنیان ، ئەوەش كە حەشد دەستگیری دەكات مەگەر خوای گەورە رەحمی پێبكات ئەگینا هەر كە كەوتە دەستیان یەكسەر بە لێكۆڵینەوە لە ناوی دەبەن وبێ‌ سەروشوێنی دەكەن.

ئاماژەشی بەوە كرد ، خۆی پێش 16ی ئوكتۆبەری ساڵی 2017 حەشدی شەعبی دەسەڵاتی هەبوو ، بوڵام دەسەڵاتەكەی سنورداربو لە بەر ئەوەی ناوچەكە لە لایەن كوردو هێزی پێشمەرگەوە بەڕێووە دەبرا، بەڵام لە دوای ئەو ڕۆژەو نەمانی دەسەڵاتی كورد وهێزی پێشمەرگە ، حەشدی شەعبی بونە خاوەن دەسەڵاتی تەواو لە ناوچەكەو ئەوەی لە پێش 16ی ئوكتۆبەر بۆیان نەكرا لە دوای ئەو ڕۆژەوە بە ئارەزوی خۆیان ئەنجامیاندا ، چییان بە سەر عەرەبی سوننەدا هێنا ئاوەهاشیان لە كورد كرد چونكە ئەوان كوردو وعەرەبی سوننە بە دوزمنی خۆیان دەزانن وبەیەك چاو تەماشامان دەكەن.

گوتیشی:- لە ترسی حەشدی شەعبی لە ئێستادا ژمارەیەكی زور لە عەرەبە سوننە ئاوارەبوەكانی شەری تیرۆرستانی داعش ناتوانن بگەڕێنەوە سەر زێدی خۆیان چونكە حەشدی شەعبی لە دوای چوڵكردنی گوندەكانیان هیچی بۆ نەهێشتوون، ئەو بە كەڵك هاتبێت بە تاڵانی بردویەتی وئەوەشی بە كەڵك نەهاتبێت لە گەڵ تەقاندنەوەی خانووەكان هەمووی لە ناوبردووە ، ئەو ئاوارە عەرەبەش بگەڕێتەوە ئەوا دڵنیام لە لایەن حەشدی شەعبییەوە لە ناو دەبرێت وتاكو حەشد لە ناو نەبرێت نەك خورماتوو ، بەڵكو هیچ ناوچەیەك ئارامی بە خۆوە نابینێت.

سەرچاوەیەكی بەرپرسیش لە خورماتوو بە (ڕێگای كوردستان)ی ڕاگەیاند:- لە باشوری شارۆچكەی خورماتوو ، بە تایبەت لە خوارووی شارۆچكەی ئامرلی حەشدی شەعبی زیندانی نهێنی هەیە وئەوكەسەش كە دەستگیر دەكرێت ڕەوانەی ئەو زیندانییانە دەكرێت ودواتر لە ناو دەبرێت وبێ‌ سەروشوێن دەكرێت ودەسەڵاتدارانی ناوچەكەش ئاگاداری ئەوەن بەڵام ناتوانن دەنگ بكەن لە بەر ئەوەی حەشدی شەعبی خاوەن دەسەڵاتی یەكەمە وهەرچی بییەوێت بۆ خۆی دەیكات.

ئەو سەرچاوەیە گوتیشی:- ئەو زیندایانە تەنها بۆ ئەوە كراوە بۆ ئەوەی عەرەبی سوننە مەزهەبی تێدا لە ناوببرێت ، ئەگەری ئەوەش هەیە كە پاسەوانە دەستگیركراوەكانی سەرۆكایەكی كۆماری عێراقیش لە دوای دەستگیر كردنیان ڕەوانەی ئەو زیندایانە كرابێت ولەوێ‌لە ناو برابێن وبێ‌ سەروشوێن كرابێن ، ئەو كەسەش لە لایەن حەشدەوە دەستگیر دەكرێت رادەستی پۆلیسی شارۆچكەكە ناكرێ تولە لای خۆیان زیندانی دەكەن بۆ ئەوەی لە ناوی ببەن .