ئەمە بڵاوبكەوە
FaceBook  Twitter  

 

كەمپەینێك بۆ پێداچونەوە بە سیستمی پارالێڵ ئەنجام دەدرێت و رێکخەرانی کەمپەینەکە رایدەگەیەنن؛ بەڕونی دیارە كە خوێندن بەرەو بە پارەبون دەبردرێت.

رۆژی سێشەممە 17ی ئەیلولی 2019، لە نامەیەكدا كە ئاراستەی رایگشتییان كردوە كەمپەینی (بەڵێ بۆ پێداچونەوە بە سیستمی پارالێڵ) رایدەگەیەنن؛ لە ساڵانی رابردو رێژەی كورسی تەرخانكراو بۆ ئەو سیستمە بریتی بوە لە (10%)ی پلانی وەرگرتن بۆ هەر بەشێك لە كۆلێژ و پەیمانگاكان، كە زیاتر بۆ ئەو كەسانە بوە كە تەمەنیان تێپەڕیوەو نەیانتوانیوە لە رێگەی ناوەندەكانی وەرگرتنەوە سودمەند بن، بەڵام ئەوەی هەستی پێدەكرێت ساڵ بە ساڵ رێژەی وەرگرتن بەم سیستمە زیادكراوە، بەتایبەت لەمساڵدا بەپێی رێنماییە فەرمییەكانی وەزارەتی خوێندنی باڵا، رێژەی وەرگرتن بۆ خوێندن بە سیستمی پارالێڵ بریتییە لە (40%)ی پلانی وەرگرتن بۆ سەرجەم كۆلێژەكان و (50%) بۆ سەرجەم پەیمانگاكان.

هەر لە  لە نامەكەدا ئاماژەیان بەوەشکردوە، بەڕونی دیارە كە خوێندن بەرەو بە پارەبون دەبردرێت، كە ئەمە پێچەوانەی دەستوری عێراقە كە لە ماددەی (34) لە بڕگەی دوەم جەخت لەوە دەكاتەوە كە خوێندن مافی هەمو هاوڵاتییەكی عێراقیە بە خۆڕایی. بۆیە لە ئێستاشدا کە حكومەتی هەرێم قەیرانی دارایی تێپەڕاندوە، پێویستە پێداچونەوە بەو سیستمەدا بكرێت.