ئەمە بڵاوبكەوە
FaceBook  Twitter  

هەست ناکەی هەمو ڕۆژێک ،

بەتەنیشت قەسیدەیەکی بریندارەوە تێدەپەڕی ؟! 

بە ئەنقەست ،

شوشەی عەتری گۆرانیەکم دەکەیتەوە

شوێن پێکانی باران دەشاریەوە لە بـا !

هەمو ڕۆژێک 

من دەچۆڕێمەوە لە تۆ ،

پڕدەبم لەپەرداخـی نەهاتنەوەت .

کەچـی تۆ 

وەک ئێوارەیەکی جارانیش نــی 

لەسەر تەمی شوشەی خەیاڵێک بۆم بنوسی 

وەرە لەدوای عەسرانەوە،

لەناو یەکتریدا پیاسە بکەین 

بۆ عیبادەتی ئەو عیشقە ،

با لەناو یەکتریدا بنویــن .!

وەرە با کراسی شیعرێکت لەبەرکەم 

قۆڵەکانی ڕووت بن وەک هەتاو !

وەرە پێم بڵـێ؛

کانی ئەو چیڕۆکە لێرە دەمی پڕ نابێتەوە لە ڕووناکـی

تازە ئەو تەنیایەی من،

لەگەڵ دڵێکی کزدا

سەر لەسەرشانی ئێوارەیەکدا دەنێن 

لەکۆشی گۆرانیەکی ٭ مەیادە ٭دا !

تا بێتاقەت دەبێ شەو

تا پێیەکانی بـا تەڕ دەبـێ 

بەکۆچی ئەو کتێبانەی ،

جارێک خامۆشی ئێرەیان تەڕ نەکرد .

تا وەڕەس دەبێ شەو

تابەرگی کتێبێک وەک ژنێک خۆی دەسوتێنێ 

تاکو چڵـە سێبەرێک ،

دەپاڕێتەوە لەهەتـاو 

تاکو ڕەنگی هەمو کەون ،

قۆپچەکانی دەکاتەوە،

بۆ حیکایەتی بەختەوەری .!

من هەر دەپاڕێمەوە ،

لەبارەگای تەریقەتی ئەو عەشقەی ،

کەهەمو خۆمی تێدا ڕاکشاوە لە ڕەنـگی ئەو !

من ترسم لەپەڕینەوەی دڵی خۆمە ،

لەگەڕەکی دڵی ئەو .

من نازانم !

ئەو دڵە خورپەیەم دوا سەفەری ئەبەدیمە 

یان ئەوە بەربونەوەی عیشقە،

لەدەستی تابلۆیەکـی سپیدا .!؟

یان شکانـی ،

دەستنوێژی دەقێکـە ،

بە ماچێکـی ئـەو !!

٭٭٭٭٭٭٭٭٭٭٭٭٭٭٭٭٭٭٭٭٭ ٭٭٭٭٭٭٭٭٭٭٭

٭ مەیادە حەناوی ،هونەرمەندێکی عەرەبە ، کەهەرکاتی گوێم لێدەبێ سورم دەکا لەخۆی .