ئەمە بڵاوبكەوە
FaceBook  Twitter  

 بەڕێوەبەرایەتیی پۆلیسی پارێزگای هەولێر ئاشكرای كرد، باندێكی دزییان دەستگیر كردووە كە، دانیان ناوە بەوەی 93 هەزار دۆلار و 40 ملیۆن دینار و ئۆتۆمبێلێكی گرانبەهایان دزیوە.

 پۆلیسی هەولێر ڕایدەگەیەنێت، رێكەوتی 21-10-2020، تۆمەتبارێكيان دەستگیر كردووە كە دوای لێكۆڵینەوە دانی بەوەدا ناوە لەگەڵ دوو كەسی دیكە چەندین كاری نایاسایی كردووە.

 پۆلیس روونیشی دەكاتەوە، تیمێكی لێكۆڵینەوە لە بەڕێوەبەرایەتیی پۆلیسی پارێزگای هەولێر پێك هێنراوە و توانیویانە تۆمەتبارێك بە ناوی (ر.ح.ح.) دەستگیر بكەن، كە بە شێوەیەكی وەهمی ئۆتۆمبێلێكی گرانبەهای بە هاووڵاتییەك فرۆشتووە، لە كاتی دەستگیركردنیشیدا داری كارەبایی و چەكی بێ مۆڵەتی پێ بووە، ویستوویەتی بۆ رووبەڕووبوونەوە لەگەڵ هێزەكانی پۆلیس بەكاری بهێنێت، بەڵام پێش ئەوەی دەستی بكاتەوە، لەلایەن پۆلیسەوە دەستگیر كراوە.

 دوای لێكۆڵینەوە تۆمەتبارەكە دانی بەوەدا ناوە كە بە هاوبەشی لەگەڵ دوو كەسی دیكە بە ناوەكانی (ع.ه.ح.) و (م.ع.ر.) تاوانی ئەنجام داوە، دواتر هەردوو تۆمەتبارەكەی دیكەش دەستگیر كراون.

 پۆلیسی هەولێر باس لەوە دەكات، هەرسێ تۆمەتبار دانیان بەوەدا نا كە چەند دزییەكی دیكەیان كردووە وەك "دزینی 40 ملیۆن دینار، 20 هەزار دۆلار، 35 هەزار دۆلار و 38 هەزار دۆلاری دیكە".

 هەرسێ تۆمەتباریش لە ئێستادا بەپێی ماددەكانی (442) و (279) و (21)ی چەك و (14)ی ماددە هۆشبەرەكان لە یاسای سزادان، راگیراون.

No description available.

No description available.

No description available.