وەزارەتی بەرگری ئەمریكا پێنتاگۆن رایگەیاند جۆزێف دانفۆردی سوپا سالاری وڵاتەكەی لەگەڵ ڤالێری گێراسیمۆف هاوتا روسییەكەی كۆدەبنەوەو پرسی ناردنی هێزی ئەمریكا بۆ سوریا بەمەبەستی بەرەنگاربوونەوەی داعش لەو وڵاتە تاوتوێ دەكەن.

جۆن فێجی، وتەبێژی سەرۆكایەتی ئەركانی سوپای ئەمریكا رایگەیاندووە، ئەو پرسە تەنیا تاوتوێ دەكرێت، چونكە ئەمریكا هێشتا بڕیاری كۆتایی لەبارەی ناردنی سوپا بۆ سوریا یەكلانەكردووەتەوە.

ئەمە لەكاتێكدایە كە چەند رۆژێكە لەمیدیا جیهانییەكان ئەوە بڵاودەكرێتەوە، كە ئەمریكا تاوتوێی پرۆژە بڕیارێك دەكات بەمەبەستی ناردنی هێزی زەمینی وڵاتەكەی بۆ سوریاو شەڕكردن دژی چەكدارانی داعش لەو وڵاتەدا.

لای خۆیەوە وەزیری دەرەوەی ئێران ڕایگەیاند ناردنی هێزی ئەمەریكا بۆ سوریا ئاگری توندوتیژییەكان زیاتر دەكات و ئاسایشی ناوچەكە و جیهانیش دەخاتە مەترسییەوە.

محەمەد جەواد زەریف وەزیری دەرەوەی ئێران لە پەراوێزی گۆنگرەی میونیخدا وتی هەر چەندە تا ئێستا بڕیاری ئاگربەست تا ڕادەیەكی باش جێبەجێكراوە، بەڵام ئەگەر ئەمەریكا هێزی سەربازی ڕەوانەی سوریا بكات، ئەوە ئاگری شەڕ و كێشەكان زیاتر پەرەدەسێنێت و ئارامی ناوچەكە و سەرجەم جیهانیش دەكەوتە مەترسییەوە.

ئاماژەی بەوەشكردووە، ئەگەر هێزی بێگانە بێتە ناو خاكی سوریا، دەرفەت زیاتر دەگونجێت بۆ گروپە توندئاژووەكان بۆ ڕاكێشانی گەنجی زیاتر بۆ ناو ڕیزەكانیان لە سوریا.

عێراقی وجیهانی