هێزەكانی سوریای دیموكرات رۆژی یەك شەممە ڕایانگەیاند، سەركەوتنی گەورەیان تۆماركردووە لە شارۆچكەی تەبقە لە چوارچێوەی ئۆپراسیۆنەكانی دژی داعش بۆ كۆنترۆڵكردنەوەی شاری ڕەقە لە دەستی ئەو گروپە.

هێزەكانی سوریای دیموكرات ڕایگەیاند، شەش گەڕەكی دیكەیان لە شاری تەبقە كۆنترۆڵكردووەتەوەو لە ئێستادا داعش تەنها بەشی باكوری شارۆچكەكەیان لە نزیك بەنداوی تەبقە بە دەستەوە ماوە.

ئەو گەڕەكانەی‌ ئازادكراون پێكهاتوون لە گەڕەكی‌ مەهاجع، بوسرابە، ئەبوعەیش، كەنیسە ئاشورییە، كەسارە، مەسحەر.

ئاماژەبەوەشكراوە، ناو بەناو شەڕو پێكدادان لە ناوەڕاستی‌ شارەكە بەردەوامە ‌و شەڕڤانان چواردە چەكداری‌ داعشیان كوشتووە‌و لە پێشڕەوییەكانیشیان بەردەوامن. هاوكات، شەڕڤانان، پێنج هەزار كەسیان رزگاركردوە، دوای‌ ئەوەی‌ لە دەستی‌ چەكدارانی‌ داعش لە شارۆچكەی‌ تەبقە هەڵهاتوون ‌و براونەتە ناوچەی‌ ئارام.

لە كۆتایی مانگی ئازاری ڕابردووەوە شارۆچكەی تەبقە لە شاری ڕەقە دابڕێنراوە، دوای ئەوەی ویلایەتە یەكگرتووەكانی ئەمەریكا هاریكاری هێزەكانی سوریای دیموكراتی كرد، بە دابەزاندنی هێزی سەربازی لەڕێگەی هەلیكۆپتەرەوە لەبەشی باشووری ڕووباری فوڕات و كۆنترۆڵكردنی سەرجەم ڕێگاكان و ناوچەكانی دەوروبەرو فڕۆكەخانەی تەبقە.

عێراقی وجیهانی