ئەم هەواڵە بڵاوبكەوە
FaceBook  Twitter  

هێزەكانی سوریای دیموكرات كۆنتڕۆڵكردنەوەی گەڕەكی یەرموكیان لە ڕۆژئاوای شاری ڕەقە ڕاگەیاند.

ئاژانسی هەواڵی هاوار نیوز بڵاویكردەوە ئۆپراسیۆنی كۆنتڕۆڵكردنەوەی ڕەقە پێی نایە چل هەمین ڕۆژەوە و لەو چوارچێوەیەشدا هێزەكانی سوریای دیموكرات هەسەدە تەواوی گەڕەكی یەرموكیان لە رۆژئاوای شارەكە كۆنترۆڵكردووەتەوە و زیانێكی زۆریان بە چەكدارانی داعش گەیاندووە.

باس لەوەشكراوە، لە ئۆپراسیۆنەكەدا شەرڤانان پێنجسەد هاوڵاتی مەدەنییان ڕزگار كردووە كە لەلایەن داعشەوە گەمارۆدرابوون و بیستو هەشت چەكداری داعشیش كوژراون.

شاری ڕەقە سێیەمین گەورە شاری سوریایە و دەكەوێتە ناوچەكانی باكووری ڕۆژهەڵاتی سوریا و چەكدارەكانی داعش ئەو شارە بە پایتەختی خۆیان دەزانن.

ماوەی نزیكەی سێ ساڵیش دەبێت كە چەكدارەكانی داعش شاری ڕەقەیان كۆنترۆڵكردووە، بەپێی دواین ئامارەكانیش لە ئێستادا بە گشتی لە سەدا چلی پارێزگای ڕەقە لەلایەن هێزەكانی یەپەگەوە كۆنترۆڵكراوە.