ئەم هەواڵە بڵاوبكەوە
FaceBook  Twitter  

بە گوێرەی ئاماری وەزارەتی پلاندانان كە بە هەماهەنگی لەگەڵ رێكخراوە نێودەوڵەتییەكان وەریگرتووە، رێژەی هەژاری لە ناوچە كۆنتڕۆڵكراوەكانی عێراق لەماوەی دوو ساڵی رابردوودا بۆ لە سەدا چل و پێنج زیادیكردووە.

نورە بەجاری، ئەندامی لیژنەی نیشتمانی بۆ كەمكردنەوەی ڕێژەی هەژاری كە سەر بە پەرلەمانی عێراقە، رایگەیاندووە، بە گوێرەی ئاماری وەزارەتی پلاندانان كە بە هەماهەنگی لەگەڵ رێكخراوە نێودەوڵەتیەكان وەریگرتووە، رێژەی هەژاری لە پارێزگاكانی سەڵاحەدین، دیالە، نەینەوا، ئەنبار و كەركوك لە دوو ساڵی رابردوودا لە سەاد بیستەوە بۆ لە سەدا چل و پێنج زیادی كردووە.

پەرلەمانتارەكە ئاماژەی بەوەشكردووە، بە گوێرەی ئاماری وەزارەتی پلاندانانی عێراق ژمارەی قوربانیانی شەڕ و تیرۆر گەیشتووەتە هەژدە هەزار و هەشتسەدو دوو كەس، ژمارەی ئەو كەسانەشی كە بەهۆی تیرۆر و شەڕوپێكدادانەكانەوە برینداربوون سی و شەش هەزار و دووسەدو چل و شەش كەسەو زیاتر لە چوار هەزار ژنیش لە عێراق ڕفێندراون.

بەجاری ئاماژەی بەوەشكردووە كە زیانە ماددییەكان لە عێراق گەیشتوونەتە نزیكەی سی ملیار دۆلار، جگە لەوەش كێشەكانی نەخوێندەواری و بێكاری و نەخۆشی و كێشەی كۆمەڵایەتی بەهۆی شەڕی داعشەوە روویان لە زیادبوون كردووە.