ئەم هەواڵە بڵاوبكەوە
FaceBook  Twitter  

پێشڕەوییەكانی شەڕڤان لەشاری رەققەی سوریا دژ بەتیرۆریستانی داعش درێژەی هەیە، لەنوێترین پێشهاتدا شەڕڤانانی بەرەكانی رۆژهەڵات و رۆژئاوا زۆر نزیكبوونەتەوە لەیەكتر، چاوەڕوان دەكرێت لەچەند كاتژمێری داهاتوودا ئەو دوو بەرەیە بگەنەوە یەك.

لەشەڕەكانی شەوی ڕابردوودا نزیكەی بیست تیرۆریستی داعش كوژراون و دووانیش بەدیلگیراون، لەلایەكی دیكەشەوە شەڕڤانان توانیوانە دووسەدو پەنجا هاووڵاتی دیكەی مەدەنی لەشارەكە رزگار بكەن.

ئاژانسەكانی هەواڵ بڵاویانكردەوە كە شەڕڤانانی هێزەكانی سوریای دیموكرات بەردەوامن لەپێشڕەوییەكانیدا لەشاری رەققە، مەودایەكی زۆر كەم لەنێوان دوو بەرەی رۆژهەڵات و رۆژئاوای شەڕی رەققەدا ماوە و تا چەند كاتژمێرێكی دیكە دەگەنەوە یەك.

ئەوە لەكاتێكدایە كە شەوی ڕابردوو لەگەڕەكی نەزلەت شیهاددا كە دەكەوێتە باشوری شارەكەوە شەڕ روویداو لەئەنجامدا یازدە تیرۆریستی داعش كوژران و دووانی دیكەش بەدیلگیران.

هەروەها لەگەڕەكی رەوزەشدا لەڕۆژهەڵاتی شارەكە لەئەنجامی شەڕێكی دیكەدا، پێنج تیرۆریستی داعش كوژران و لەگەڕەكی بەرید لەڕۆژئاوای رەققەش شەش تیرۆریستی داعش كوژراون.

شەڕڤانان رایانگەیاندووە كە گروپە تایبەتەكانی هێزەكانی سوریای دیموكرات بۆ رزگاركردنی هاووڵاتیان لەڕەققە، رۆژی پێنجشەممە دووسەدو پەنجا هاووڵاتی دیكەیان لە لەگەڕەكی نەزلەت شیهاد لەچنگی تیرۆریستانی داعش رزگاركرد.