ئەم هەواڵە بڵاوبكەوە
FaceBook  Twitter  

 

لەیلا زانا، پەرلەمانتاری توركیا، لەفراكسیۆنی پارتی دیموكراتی گەلان هەدەپە، لەلایەن دادگای ئامەدەوە لەو تۆمەتانەی درابوونە پاڵی بەبێتاوان ناسێندرا.

رۆژی پێنجشەممە، دادگای ئامەد لەو دۆسیەدا، كە داوای بیست و سێ ساڵ زیندانی بۆ لەیلا زانا، پەرلەمانتاری هەدەپەی شاری ئاگری كرابوو، بڕیاری بێتاوانی دەركرد.

لەساڵی دوو هەزارو یانزە لەیلا زانا تۆمەتی ئەوەی درابووە پاڵ كە لە نۆ رێپێوان و مەراسیمی بەخاكسپاردنی گەریلادا بەشدار بووەو هەر لەو مەراسیمانەشدا وتاری پێشكەشكردووە.

هەر بەپێی ئەو دۆسیەیە تۆمەتی بانگەشەو ئەندامبوونی لەپارتی كرێكارانی كوردستان پەكەكەو كۆما جڤاكێ كوردستان كەجەكەی درابووە پاڵ و هەروەها پێشێلی یاساكانی كۆبوونەوەو خۆپیشاندانی كردووە، بۆیە داوای بیست و سێ ساڵ زیندانی بۆ كراوە.

لەماوەی رابردوودا حكومەتی ئەنقەرە چەندین ئەندام و پەرلەمانتارو هاوسەرۆكی هەدەپەی بەتۆمەتی جیاجیا دەستگیركردووە و تا ئێستاش ژمارەیەكی زۆریان لەزیندانەكانی توركیادان.