ئەم هەواڵە بڵاوبكەوە
FaceBook  Twitter  

شەڕڤانانی هێزەكانی سوریای دیموكرات لەسەدا نەوەدی شاری رەققە كۆنترۆڵدەكەنەوەو وتەبێژی هاوپەیمانی نێودەوڵەتی دژی داعشیش ڕایدەگەیەنێ بەهیچ شێوەیەك ڕێگەنادەن تیرۆریستانی داعش بە ڕێككەوتن لە شاری ڕەققە پاشەكشێ بكەن.

ڕایان دیلۆن، وتەبێژی هاوپەیمانی نێودەوڵەتی دژی داعش ڕایگەیاند، ئەنجومەنی مەدەنی شاری رەققە لە دانوستاندان بۆ ئەوەی ڕێوشوێنێك بۆ دەربازكردنی هاووڵاتیانی مەدەنی دابنێن لەكاتی دەستپێكردنی قۆناغی كۆتایی شەڕ لەشارەكەدا، بێ ئەوەی ئەو لایەنەی دیكە ئاشكرا بكات كە ئەنجومەنەكە دانوستانی لەگەڵدا دەكات.

دیلۆن وتیشی، لە گفتوگۆكاندا باس لەسەر چارەنووسی ئەو تیرۆریستانەی داعش كراوە، كە لە شارەكەدا ماون و جەختیان لەسەر ئەوە كردووەتەوە كە تاكە ڕێگە لەبەردەمیاندا خۆبەدەستەوەدانە، وتیشی بەهیچ شێوەیەك هاوپەیمانی نێودەوڵەتی لەگەڵ ئەوەدا نییە ڕێگە بەو چەكدارانە بدرێت پاشەكشێ بكەن.

بەپێی زانیاریەكان سێسەد بۆ چوارسەد تیرۆریستی داعش لەلایەن هێزەكانی سوریای دیموكراتەوە گەمارۆدراون، كە ژمارەیەكیان لە ناوچەیەكدان، كە تەنها چوار كیلۆمەتر لە ڕەققەوە دوورە، بەشێكی دیكەشیان لە یاریگای شارەكەو نەخۆشخانەیەكدا خۆیان پەناداوە.

هێزەكانی سوریای دیموكرات ئێستا لەسەدا نەوەدی شاری ڕەققەیان كۆنترۆڵكردووەتەوەو تیرۆریستانی داعشیان لە پانتاییەكی كەمدا گەمارۆداوە.