ئەم هەواڵە بڵاوبكەوە
FaceBook  Twitter  

 

بەوتەی چەند سەرچاوەیەكی ئەمنی تیرۆریستانی داعش هێشتا لە بەشێكی زۆری ئەو ناوچانەی كە دەكەونە نێوان پارێزگاكانی سەڵاحەدین و كەركوك و دیالە بوونیان هەیەو هێزە ئەمنییەكانی عێراقیش ئۆپەراسیۆنێكی بەرفراوان لە سنوری شارۆچكەی حەویجە ئەنجام دەدەن.

ئۆپەراسیۆنە بەرفراوانەكەی سنووری شارۆچكەی حەویجە لەلایەن هێزەكانی پۆلیس و سوپاو حەشدی شەعبی بەهاوكاری هێزی ئاسمانی ئەنجامدراوە و فەرماندەی ئۆپەراسیۆنەكانیش دەڵێت هەڵمەتەكەیان بەردەوام دەبێت.

مەزهەر عەزاوی، فەرماندەی ئۆپەراسیۆنەكانی دیجلە لەوبارەیەوە رایگەیاندووە كە ئۆپەراسیۆنی هێزە هاوبەشەكان لە چەند میحوەرێكەوە ئەنجامدراوە و ناوچەكانی سەر بەشارۆچكەی حەویجە و دەشتاییەكانی عوزێمی گرتووەتەوە.

فەرماندەی ئۆپەراسیۆنەكانی دیجلە جەختی لەوە كردۆتەوە كە هەڵمەتەكەیان تا پاككردنەوەی تەواوەتی سنورەكە لە پاشماوەكانی داعش و شانە نوستووەكانی تیرۆریستان بەردەوام دەبێت.

لەلایەكی دیكەوە قەتەری عوبەیدی، سەركردەی حەشدی شەعبی باسی لەوە كردووە كە چەكدارانی داعش هەموو ناوچەكانی پارێزگای ئەنباریان بەجێهێشتووە و چوونەتە ناوچەكانی محالە و سەخریات لە باشووری پارێزگای سەلاحەدین.

ئەم ئۆپەراسیۆنە لەكاتێكدایە كەچەند سەرچاوەیەكی ئەمنی لە عێراق ئاماژە بۆ ئەوە دەكەن كە چەكدارانی رێكخراوی تیرۆریستی داعش لە بەشێكی زۆری ئەو ناوچانەی كە دەكەونە نێوان پارێزگاكانی سەڵاحەدین و كەركوك و دیالە دەستیان بە جموجوڵكردۆتەوە.