ئەم هەواڵە بڵاوبكەوە
FaceBook  Twitter  

لیژنەی بەدواداچوونی شەمعەكانی سەر بەلیژنە هاوبەشەكانی قائیمقامییەتی سلێمانی سەردانی شەمعەكانی ئاوی سنوری شاری سلێمانی دەكەن و رێنمایی پێویستیان پێ‌ دەدەن، و سەرۆكی لیژنە هاوبەشەكانیش ئاگاداری هاوڵاتیان دەكاتەوە كە تەنها ئاوی ئەوتەنكەرانە بەكاربهێنن كە رەنگیان سپییەو ژمارەی پەیوەندی لایەنی پەیوەندیداری لەسەر نوسراوە.

گۆران قادر سەرۆكی لیژنە هاوبەشەكانی قائیمقامییەتی سلێمانی رایگەیاند، لیژنەی چاودێریكرنی شەمعەكانی ئاو رۆژانە سەردانی شەمعەكان دەكەن پشكنینی تاقیگەیی بۆ ئاوی شەمعەكان ئەنجام ئەدەن و رێنمایی پێویستیان پێ‌ دەدەن و ئاگاداریان ئەكەنەوە كە پابەندی مەرج و رێنماییەكان بن.

گۆران قادر لە بارەی جۆری شەمعەكان راشیگەیاند: لە سنوری شاری سلێمانی دوو جۆر شەمعەی ئاو هەیە و جۆرێكیان خاوەنی مۆڵەتی فەرمین و ئاوەكەیان گونجاوە بۆ خواردنەوە، جۆرەكەی تریان بەهیچ جۆرێك شیاوی خواردنەوە نییەو تەنها رێگەدەدرێت بۆ ئاودێری و كشتوكاڵ بەكاربهێنرێت.

سەرۆكی لیژنەكان هۆشداری دەداتە هاوڵاتیان و رایدەگەیەنێت: داوا لە هاوڵاتیانی شاری سلێمانی دەكەین تەنها ئاوی ئەو تەنكەرانە بۆ خورادنەوە بەكاربهێنن كە رەنگی سپییەو ژمارەی تەلەفۆنی لایەنی پەیوەندیداریان لەسەرە و ئاوی خواردنەوە لەو شەمعانە وەردەگرن كە مۆڵەتی فەرمیان هەیە.

ناوبراو ئەوەشی خستە روو، كە قائیمقامی سلێمانی لە ماوەی رابردوودا ئەو لیژنەیەی پێكهێناوە كە تایبەتە بە چاودێریكردنی شەمعەكان و مەبەستیش لێی پاراستنی تەندروستی و سەلامەتی هاوڵاتیانە.