ئەم هەواڵە بڵاوبكەوە
FaceBook  Twitter  

 

سەنتەری میترۆ بە هاوكاری لەگەڵ چەند ڕێكخراوێكی كۆمەڵی مەدەنی و چالاكوانی بواری مافەكانی ئافرەتان، بە ئامانجی ڕێگرتن لەو توندوتیژی و سوكایەتیانەی هەندی كەناڵی میدیایی بەرهەمیان دێنن یاداشتێكیان ئاراستەی داواكاری گشتی و نوێنەری وەزارەتی ڕۆشنبیری كرد لە شاری سلێمانی.

لە یاداشتی میترۆ و ڕێكخراوەكاندا ئاماژە بەوەكراوە چۆن لە بەرانبەر بە پێشێلكاری بە ڕۆژنامەنووسان دێنە دەنگ، ئاواش لەبەرانبەر ئەو سوكایەتی و هەڵانەی هەندی میدیا بەرانبەر بە كۆمەڵگا دەیكەن بێدەنگ دەبن.

یاداشتەكە لە كۆنگرەیەكی ڕۆژنامەوانیدا خوێندرایەوە، كە تێیدا هاتبوو، میدیاكاران و كەناڵەكان هەر یەك لەلای خۆیەوە رۆڵی گەورە لە پێش خستنی وڵات و كۆمەڵدا دەگێڕن، بێگومان هەر هەڵەیەكی میدیاو میدیاكارانیش بە مەبەست بێ یان بێ مەبەست، كاریگەریی و رەنگدانەوەی دەبێت لەسەر ژیانی كۆمەڵگەو ئاسایشی كۆمەڵایەتی. بەڵام مایەی داخە كە لە كوردستاندا، ئەوەی بایەخی پێ نەدرێت لەكاتی كاركردنی هەر میدیاكارێكدا، ئەو ئیتیك و رێسایانەیە كە پێویستە لەبەرچاو بگیرێت بۆ ئەوەی كارەكانمان بچنە خزمەت كۆمەڵ و پێشخستنی كایەكانی ژیان.

ئەگەرچی هەموومان لە كاتی هەر پێشێلكارییەك بەرانبەر بە رۆژنامەنووسان و میدیا دەنگی بەرگریكردن و ناڕەزایی بەرز دەكەینەوە، بەڵام ئەمە ناگەیەنێت ئەوەی كە لەئاستی هەڵەو پێشێلكارییەكانی میدیاش بەرانبەر بە خەڵك و كۆمەڵ و ئاسایشی كۆمەڵایەتی بێدەنگ بین بە تایبەت لە سایەی فەرامۆشكردنی یاسای كاری رۆژنامەوانی و نەبوونی هیچ بەڵگەنامەیەكی هاوبەشی كاری راگەیاندن وەك ئەوەی لە تەواوی جیهاندا لەنێوان كەناڵەكاندا بۆ رێزگرتن لە ئیتیكی كاری رۆژنامەوانی هەیە.