ئەم هەواڵە بڵاوبكەوە
FaceBook  Twitter  

ئامادەكردنی: باوكی رۆزا

لەكۆتایی مانگی ئۆكتۆبەری ئەم ساڵ دیداری 19یەمینی پارتە شیوعی وكرێكارییەكانی جیهان لە سان بیسترسبورگ لە روسیا لە یادی سەد ساڵەی شۆرشی مەزنی ئۆكتۆبەر ئەنجامدرا .

لەو دیدارەدا نوێنەری نزیكەی 200پارتی شیوعی وكرێكارییە جیهانییەكان لەسەرتاسەری دوونیا تیایدا ئامادەبوون،هاورێیان ئەبوكاروان ئەندامی مكتەبی سیاسی وسوبحی مەهدی ئەندامی كۆمیتەی ناوەندی بەنوێنەرایەتی حزبی شیوعی كوردستان بەشداربوون لەو دیدراەدا .ماڵپەری رێگای كورستان بۆتیشك خستنەسەر ناوەرۆكی دیدارەكەوچالاكی وتێگەیشتنی پارتەكۆمەنیستەكان لەبەرەی كێشەكانی ئەمرۆی سیستەمی سەرمایەداریدا وخوێندنەوەیان بۆ بژاردەی سۆسیالیزم وچۆنیەتی سود وەرگرتن لە ئەزمونی شۆرشی ئۆكتۆبەر، گفتوگۆیەكی لە رێگای ئاراستەكردنی چەند پرسیارێك لەگەڵ هاورێ سوبحی مەهدی ئەندامی كۆمیتەی ناوەندی وبەشدر لە دیدارەكە ئەنجام دا .

رێگای كوردستان : سەرەتا ئەگەر باسێكی ناوەرۆكی دیدارو چالاكیەكانتان لەو سەردانە بكەن بۆ روسیا ؟

وەڵام : لەسەر بانگێشتی حزبی شیوعی لە روسیای فیدرال و بە بۆنەی یادی 100 ساڵەی شۆرشی ئۆكتۆبەر، ئێمە بەشداریمان لەو چالاكیانەدا كرد كە بەو بۆنەیەوە رێكخرابوون.لە هەردوو شاری سانت بگرسبۆرك ( لینینگراد) و (مۆسكۆ)دا لە رۆژانی 31 ی ئۆكتۆبەر تا 7ی نۆفمبەر .

  رۆژانی 31-10و 1-11 لە لینینگراد، تەرخانكرابوو بۆ دیداری 19 هەمی حزبە شیوعی و كرێكاریەكانی جیهان كە 103 حزب لە ووڵاتانی جیهانەوە بە وەفد بەشداریان كرد.

  هۆكاری دەستپێكردنی چالاكیەكان لەشاری لینینگراد، دەگەرێتەوە بۆ ئەوەی كە ئەم شارە پایتەختی روسیای قەیسەری بووە و لێرەوە و لە رێگەی كەشتی جەنگی ئۆرورا(بەرەبەیان)ەو ە یەكەم بریسكەی شۆرشی ئۆكتۆبەر دەستی پێكرد و دەوڵەتی كرێكاران و جوتیاران راگەیەنراوە.سەرەرای ئەوە ئەم شارە بە شاری رۆشنبیری و زانست و پاڵەوانیتی ناسراوە.

رێگای كوردستان : چی وترا لە سیمنارو گفتوگۆكان لەبارەی ئەزمونی شۆرشی ئۆكتۆبەرو وانەكانی بۆ ئەمرۆمان وبۆ داهاتوی بزوتنەوەی سۆسیالیستی لە جیهاندا ؟

وەڵام : دیداری شیوعیەكانی جیهان لە ژێر دروشمی (بەرەو سوشیالیزم) بەرێوەچوو. كە هەر حزبێك، لەو ماوەیەی دیاریكرابوو، لەسەر كاریگەریەكانی سەركەوتنی شۆرشی ئۆكتۆبەر لە ئاستی جیهانی وبزووتنەوەكانی رزگاریخوازی گەلان وئاكامە خراپەكانی دوای شكستی دەولەتانی سۆسیالیستی و خۆسەپاندنی سیستمی سەرمایەداری و ئاسەوارەكانی لەسەر نابەرابەری وزیادبوونی هەزاری و شەرو ململانێكان و تیرۆریزم و توندرەوی ئایینی. كە هەموو ئەمانە بە كاتی دانران و ئاسۆی گەشەی بزووتنەوەكانی گەلان و حزبە شیوعیەكان روونە بۆ بوژاندنەوەی سوسیالیزم و دادپەروەری و مافەكانی مرۆڤ، و بایەخی ئەم دیدارانە بە پۆزەتیڤانە هەڵسەنگێنران.

  جگە لەو لایەنە هاوبەشانە هەر وەفدێك بەشێك لە گفتوگۆكانی تەرخان كرابوو بۆ بارودۆخی تێكۆشانی گەلانی ئەو ووڵاتانە و لە ووتاری حزبماندا بارودۆخی كوردستان و هەڵومەرجی دوای ریفراندۆم و هێرشی هێزەكانی عێراق بۆ سەر كوردستان و داواكاریمان بۆ پشتیوانی لە خەباتی گەلەكەمان لە پێناو مافەكانی و چارەسەری كێشەكان بە شێوەیەكی ئاشتیانە كردەوە .

  جگە لە دیداری حزبە شیوعی و كرێكارییەكان، رۆژی 5-11-2017 تەرخان كرابوو بۆ دیداری هێزە چەپەكانی دونیا كە جگە لەو حزبە شیوعیانەی بەشداربوون، ژمارەیەكی بەرچاو كە دەگەیشتە 187 حزب بەشداری دیداری چەپەكان بوون،و بە هەمان شێوە چەندین ووتار پێشكەشكران، هەمووان كۆك بوون لە سەر ئەوەی كە سیستمی سەرمایەداری لە توانایدا نیە كێشە كۆمەڵایەتیەكان ونابەرابەری و برسیەتی چارەسەر بكات و تەنها كاركردن بۆ سیستمیكی سوسیالیزمی نوێكراوە لە توانایدایە بەها مرۆییەكان بە بەرزی رابگرێت ونان وكار و ژیان و دادپەروەری و پێكەوە ژیانی ئاشتیانەی نێوان مرۆڤەكان و ئاشتی جیهان بەرپابكات. لەبەر ئەوە ئامادەبووانی هەردوو دیدار دووپاتی گەرمكردنەوەی كۆری تێكۆشانیان كردەوە بەرامبەر بە سیستمی سەرمایەداری وكۆنەپەرستی و فاشیزم و لە پێناو دیموكراسی و مرۆڤ و سۆشیالیزمدا.

  لە زۆربەی ووتارەكاندا بە توندی ئیدانەی خیانەتكارانی نمونەی یلتسن و كۆرباجۆف كرا كە هۆكاربوون بۆ لە دەستدانی ئەو سیستمەی كە كرێكاران و جوتیاران و تەواوی گەل ژیانێكی بەختەوەریان بۆ زامن كرابوو، سەرەرای ئەوەی كە پشتێوانیكی گەورەی بزووتنەوەكانی گەلان بوو بۆ سەربەخۆییی و ئازادی .

پرسیار : چالاكییەكانی دیدارەكە چی بوو ؟

وەڵام : جگە لە ودیدارانە ژمارەیەك گەشت و چالاكی ئەنجامدران لە دیارترینیان :

*سەردان و بینینی ئەو كەشتیە سەربازیەی كە ناوی(ئۆرورا) یە بە مانای بەرەبەیان دێت كە بە فەرمانی سەركردایەتی شۆرش یەكەم بریسكی شۆرشی داگیرساندو سەرەتای كۆتایی ئیمپراتۆریەتی روسیای قەیسەری راگەیان و بووە سەرەتای سەركەوتنی شۆرشی ئۆكتۆبەر، وئێستا وەك مۆزەخانە ماوەتەوە و مێژوویەكە بۆ تێگەیشتن لە سەرەتاكانی شۆرش.

* سەردانی یەكەم بارەگای سەركردایەتی شۆرش و شوێنی یەكەم كۆبونەوە و شوێنی سەرەتای ژیانی رابەری شۆرش (لینینی مەزن) و شێوازی ژیانی سادەو كاری بەردەوامی . وتەنانەت كەرەسەكانی كە بەكاری هێناون وبەشێك لە دەستخەت و نوسینەكانی، لە كۆشكی سمۆلنی. كە پێشتر قوتابخانەیەكی تایبەتی كچە خانەدانەكان بووە و لەبەرخاتری كچەكەی ئیمپراتۆر دروستكراوە.لە سانت بگرسبۆرك(لینینگراد)

*سەردانی مەیدانی سوور و كۆشكی (كرملین) وزۆربەی كەنیسە كۆنەكان و كۆشكەكانی سەردەمی ئیمپراتۆریەتی روسی تا سەردەمی حوكمرانێتی بۆلشەوی و ئێستای پۆتین.

*سەردانی كلكۆی سەركردەی شۆرش (لینین) لە مەیدانی سوور و هەروەها سەرگۆری سەربازی وون .

* بەشداریكردن لە دوو ئاهەنگی گەورەی هونەری لە لینینگراد و مۆسكۆ، كە رێكخراوەكانی حزبی شیوعی روسیای فیدرال رێكیان خستبو كە ئاستیكی هونەری بەرزی هەبوو.

*بە شداریكردن لە رێپوان و ئاهەنگێكی گەورەی سەرجادە لە مۆسكۆ كە هەزاران كەس لە سەركردەو ئەندامانی حزبەكە بەشداریان تێدا كردبوو.

رێگای كوردستان: مداخلەی حزبی شیوعی وكوردستان بە چی بوو،ئێوە چ خوێندنەوەوەیەكتان لەوبارەیەوە پێشكەشكرد ؟

وەڵام : لە كۆشكی نافریتشكی وتاری هەریەكە لە حزبی شیوعی كوردستان وعێراق بەجیاپێشكەشكرا، لە وتاری حزبی شیوعی كوردستاندا كە هاورێ‌ ئەبوكاروان پێشكەشیكرد، تائكید لە بژاردەی حزبی شیوعی كوردستان كرایەوە كە بژاردەی خەبات وتێكۆشانە بۆ بەدیهێنانی سۆشیالیزم نەك تەسلیمبون بە سیاسەتی نیولیبرالیزمی سەرمایەداری كە تادێت دەبێتە هەرەشەیەكی جدی لەسەر ئەو ماف وئازادایانەی لە ژێركاریگەری شۆرشی ئۆكتۆبەرو تێكۆشانی پارتە شیوعی وكرێكارییەكان لەسەرتاسەری جیهان بەدەستهاتون .بۆ ئەومەبەستەش جگە لە گرنگی هاریكاری وخەباتی نێونەتەوەیی بۆ رووبەروو بونەوەی سیاسەتی سەرمایەداری پێویستمان بە حزبی خاون روئیای رون وبەهێزهەیە لە پێناو جێبەجێ‌ كردنی ئەركە مێژووییەكانمان .

هاوكات لە بەشێكی تری وتارەكەی حزبی شیوعی كوردستان تائیكد لە گرنگی ئاوردانەوە وپابەندبونی پارتەشیوعییەكانی جیهان كرایەوە بۆ پرنسیپەلینییەكان لە پێناو چارەسەركردن وجێبەجێكردنی مافی بریاردانی چارەنوسی گەلان لەسەر ئەوبنەمایەش داواكرا لە بەیاننامەی كۆتایی دیدارەكەدا پاڵپشتی مافی بریاردانی چارەنوس بۆگەڵی كوردستان بكەنەوە كە لەئێستادا بەبیانوی ئەنجامدانی ریفراندۆم رووبەرووی هێرشی حكومەتی مەركەزی وگلەكۆمەكی وڵاتانی دەوروبەردەبێتەوە .

رێگای كوردستان : چیتان تێبینكرد لە بارەی رۆڵی ئەمرۆی حزبی شیوعی روسی ؟

وەڵام : هەموو ئەو دیدار و چالاكیانەی ئێمە بینیمان و ئەو هێزە جەماوەریەی كە حزبی شیوعی لە روسیای فیدرالدا هەیەتی ئەو بوونە گەورەیەی لە پەرلەمان كە لە سەدا 23 ی كورسیەكانی لە ئەنجومەنی دۆمادا هەیەتی، دەگەیتە ئەو باوەرەی كە ئەم حزبە و جەماوەرەكەی دەیانەوێت بە هێزیكی باشترەوە لە مەیدان بن، دەیانەوێت بەها جوانەكانی دەوڵەتی كرێكاران و جوتیارانی سەردەم شۆرشی ئۆكتۆبەر بە بەرگێكی نوێوە ببوژێننەوە.