ئەم هەواڵە بڵاوبكەوە
FaceBook  Twitter  

بەپێی ڕاگەیەندراوێكی بەڕێوەبەرایەتی ڕاگەیاندنی وەزارەتی خوێندنی باڵا و توێژینەوەی زانستی كە وێنەیەكی دەست رێگای كوردستان كەوتووە تیایدا هاتووە، "ماوەیەكە ژمارەیەك كەس و كۆمپانیا بەڕێگەی جیا لە نێو فێرخوازان و ناوەندەكانی خوێندن سەرەنجی فێرخوازان بۆ خۆیان ڕادەكێشن و، پارە لە خەڵكی وەردەگرن لەبەرامبەر هێنانی قبووڵی زانكۆیی لە زانكۆكانی دەرەوەی هەرێمی كوردستان و، واشی لە خەڵكی دەگەێنن كە نوێنەرایەتی وەزارەتی خوێندنی باڵا و توێژینەوەی زانستی دەكەن".

راگەیاندراوەكەی وەزارەتی خوێندنی باڵا و توێژینەوەی زانستی سەرجەم قوتابیان و فێرخوازان ئاگادار دەكاتەوە بەقسەی ئەو كەس و لایەن و كۆمپانیانە فریو نەخۆن، " چونكە دور و نزیك هیچ جۆرە پەیوەندییەكیان بە وەزارەتەكەمانەوە نیە و بەهیچ جۆرێكیش بەرپرسیار نین بەرامبەر بەقسە و بەڵێنەكانیان".

هەر لە راگەیاندراوەكەدا هاتووە، " وەزارەتی خوێندنی باڵا و توێژینەوەی زانستی ڕێوشوێنی ڕەوانەكردنی خوێندكاران بۆ دەرەوەی وڵات بەپێیی ڕێنماییەكان ڕێكخستووە و هەر خوازیارێكیش ئەخوازێت لە زانكۆكانی دەرەوەی وڵات لەسەر خەرجی تایبەتی خۆیان درێژە بەخوێندن بدات، دەتوانێت سەردانی فەرمانگەی نێردراوان و پەیوەندییە ڕۆشنبیرییەكان بكات، یان سەردانی وێبسایتی وەزارەت بكات بۆ زانینی لیستی زانكۆ باوەڕپێكراوەكان لە هەرێمی كوردستان و چۆنیەتی كردنەوەی دۆسیەی تایبەت لە بەڕێوەبەرایەتی نێردراوان".

کوردستانی