ئەمە بڵاوبكەوە
FaceBook  Twitter  

لە دوێنێوە سەرجەم پلیتەكانی یاریی كلاسیكۆی نێوان ریال مەدرید و بەرشەلۆنە فرۆشراوە كە بڕیارە سبەی چوارشەم بێتە ئەنجامدان.

سبەی چوارشەم سەعات 11ی شەو بەكاتی كوردستان، لە یاریی كلاسیكۆ و گەڕانەوەی قۆناغی پێش كۆتایی جامی شای ئیسپانیا لەنێو یاریگەی سانتیاگۆ بێرنابیۆ لە شاری مەدریدی پایەتەختی ئیسپانیا، هەردوو یانەی ریال مەدرید و بەرشەلۆنە رووبەڕووی یەكتر دەبنەوە.

رۆژنامەی (سپۆڕت)ی ئیسپانی ئاشكرای كرد: سەرجەم پلیتەكانی یارییەكە لەلایەن هاندەرانی هەردوو یانەكەوە كڕاوە كە نرخەكەیان لەنێوان 75 تا 265 یۆرۆ بووە.

لە یاریی چووندا كە رۆژی 6ی ئەم مانگە لەنێو یاریگەی كامپ نوو بەڕێوەچوو، هەردوو یانەكە بە ئەنجامی 1-1 گۆڵ یەكسان ببوون، بەمەش یارییەكەی سبەی بۆ هەردوو یانەكە یەكلاكەرەوە دەبێت و كامەیان براوە بێت دەگاتە یاریی كۆتایی جامی شای ئیسپانیا و رووبەڕووی یەكێك لە یانەكانی ریال بیتیس یان ڤالێنسیا دەبێتەوە.