ئەمە بڵاوبكەوە
FaceBook  Twitter  

بەر لە ئەنجامدانی یارییەكەیان بەرامبەر بەرشەلۆنە، ماوریسیۆ پۆچێتینۆ راهێنەری پاریسییەكان دەستی بە هەڕەشەكردن كرد‌و لە ئێستاوە نیازی خۆی بۆ بردنەوە لە بەرامبەر بەرشەلۆنە نیشاندا كە بڕیاروایە رۆژی سێشەممەی داهاتوو لە یاری چوونی قۆناغی 16ـی چامپیۆنزلیگدا رووبەڕووی یەكدی ببنەوە.

پۆچیتینۆ لە لێدوانێكدا سەبارەت بەو یارییە، گوتی "تیپێكی بەهێز چاوەڕوانمان دەكات، بەرشەلۆنە هەر بە بەرشەلۆنە دەمێنێتەوە، هەوڵدەدەین لە ئیسپانیا سەركەوتن بەدەستبێنین".

راهێنەری ئەرجەنتینی، هەروەها گوتی "بەدڵنیاییەوە بۆ ئەو یارییە یاریزانە گرنگەكان لەدەستدەدەین، بەڵام متمانەم بە تیپەكەم هەیە، بێگومان پێمباشبوو هەموو یاریزانەكان ئامادەبن، بەڵام هیچ شوێنێك بۆ بیانووەكان نییە، بە عەقڵییەتی سەركەوتنەوە دەچین بۆ ئەوێ".

لە وەڵامی پرسیارێكدا كە پاریس سانجێرمان بەبێ نەیمار نەیتوانیوە قۆناغی 16ـی چامپییۆنزلیگ ببڕێت؟ پۆچێتینۆ گوتی "ئەوە راستە، ئەوە ئاستەنگە كە ئێمە هەوڵی بۆ دەدەین بەسەریدا زاڵ بین، بەڵام تۆپی پێ بەرەنگارییە، هەوڵدەدەین ئەو راستییە بگۆڕین، بۆیە وەك ئاماژەم پێكرد بۆ بردنەوە دەچینە ئیسپانیا".