ئەم هەواڵە بڵاوبكەوە
FaceBook  Twitter  

یانەی قوە جەویەی عیراقی بە گۆڵێكی خاوێن سەركەوتنی بەرامبەر یانەی ئیستقلال دوشەنبەی تاجیكستانی تۆماركردو نازناوی پاڵەوانێتی جامی یەكێتی ئاسیای بەدەستهێنا.

تاكە گۆڵی یارییەكە عیماد موحسین لەخولەكی 68دا تۆماریكردو بەو تاكە گۆڵەش عیراقییەكان نازناوەكەیان دەستەبەركرد.

لەسەرەتای یارییەكەدا یاریزانانی ئیستقلال باشتر بوون، بەڵام هێڵی بەرگری قوەجەویە تەواوی رێگاكانی داخست و وزەی یاریزانانی تیمی بەرامبەریان هەڵمژی و تایمی یەكەمیش بەبێ گۆڵ كۆتایی هات.

لەتایمی دووەمی یارییەكەدا یاریزانانی قوەجەویە باڵادەستی خۆیان بەسەر یارییەكەدا سەپاند و بەهۆی لێدان لە هومام تاریقەوە لێدانێكی سزایان بۆ ئەژماركرا، بەڵام حەمادی ئەحمەد لێدانەكەی بەهەدەر دا.

لەدەستدانی پەناڵتییەكە كاریگەری لەسەر یاریزانانی جەویە دروستنەكردو لەخولەكی 68دا لەرێگەی عیماد موحسینەوە تاكە گۆڵی یارییەكەیان تۆماركرد.

یاریزانانی جەویە بەو تاكە گۆڵە سەركەوتنیان تۆماركردو بۆ دووەم ساڵی یەكلەدوای یەك نازناوی پاڵەوانێتیەكەیان دەستبەركرد.