ئەم هەواڵە بڵاوبكەوە
FaceBook  Twitter  

رەوەند كەریم / لە كۆبونەوە لەگەڵ فیداییانی خەڵقی ئێران

هاوڕێ (عزیز محەمەد) فەرمووی : دەبێت شیوعییەكان پشتیوانی میللەتی كورد بن..

ساڵی ـ1981ـ ژمارەیەك لە هاوڕێیانی رێكخڕاوی (فیدایانی خەڵقی ئێران ،ئەكسەرییەت) بە میوانی هاتنە لای حزبمان لە (نۆكان)،حزب بارەگایەكی تایبەتی لە نزیك ماڵی مام (رسول) لە سەر روبارەكە بۆیان كردەوە و.. بڕیاردرا لە گەڵیان كار بكەم و بچمە بارەگاكەیان و بە یەكجاری لە گەڵییاندا بژیم،بڕیارەكەم جێ بە جێ كرد و بوومە یەكێك لە هاوڕێیانی (فیدایانی خەڵقی ئێران)،ئەوان ژمارەیان (15) هاوڕێ بوو،رۆژوشەو خەریكی خوێندەوە بوون،هاتنەكەیان بۆ خولی رۆشنبیری بوو،ئەركی بەندە ئەوە بوو كە دەربارەی مێژووی دامەزراندنی حزبمان رۆژانە وانەیەك ئامادە بكەم و پێشكەشیان بكەم ،هەروا سەبارەت بە رێكخراوەكانی یەكێتی گشتی قوتابییان و یەكێتی لاوانی دیموكراتی عێراق و كۆمەڵەی ئافرەتان، بابەتم ئامادە دەكردو باسمان لێوە دەكردن،بایەخی زۆریشم بە مەسەلەی سەندیكای كرێكاران و یەكێتی جوتیاران دەدا. ئەم هاوڕێیانە گەلێك رێك و پێك و،ووریاو وخوێندەواری باش بوون،جوست وچالاكبوون لە ئەنجامدانی ئەركەكانییان،هەموویان كورد بوون،لە ڕادەبەدەر بە سادەیی دەژیان و دژی هەموو شتێك بوون كە شێوەی ژیانی بەرجواژی ،یان پیتی بەرجواژی پێوە دیار بێت و،دژی بەستنی (ریبات،بۆیینباغ) بوون و، لایەنگری جوانكاری ئافرەتان نەبوون ،واتە دژبوون،دەیان ووت ئەم كردەوانە دوورن لە ڕەوشتی پرۆلیتاریا، هەروا سەبارەت بە مەسەلەی كورد و كوردستان لایان گرنگ نەبوو،خەتی (ئیمامی)یان گەلێك بە گرنگ دەزانی، منیش شتێكی وام دەربارەیان نەدەزانی و نەشدەبوو لە گەڵییان نەگونجێم،هەندێ جار بەنەرمی قسەم لەسەر ئەو بابەتانە دەكرد، بەڵام زۆر بە سادەیی لە پێناو ئەوەی بتوانم لە گەڵیاندا بژیم و بەردەوام بم،هاوڕێیانیش بەردەوام داوایان دەكرد كە لە گەڵییاندا نەچمە ناو ئەو بابەتانەی دەبنە هۆی ناتەبایی و جیاوازی لە بۆچوونەكاندا،بۆ ئەوەی زوێر نەبن،دروستكردنی جیاوازی و نەگونجان ئەركی من نەبوو.

لە كۆتایی زستانی ساڵی 1981 هاوڕێ (عزیزمحمد)لە دەرەوە گەڕاوە و گەییشتە (نۆكان وناوزەنگ )وهەواڵی هاتنەوەی هاوڕێ (عزیز)م بە هاوڕێیان راگەیاندو ،هەندێ زانیاریشم دەربارەی هاوڕێ (عزیز) بۆ باسكردن،ئەوان ئارەزووی زۆرییان هەبوو دیدار لە گەڵ هاوڕێ (عزیز )بكەن،بۆ ئەم مەبەستە چوومە لای هاوڕێ و داوام لێكرد كە بێتە سەردانی هاوڕێیانی (فیدایان) لە بەرئەوەی هاوڕێیان پەرۆشی دیدارن لە گەڵیدا و ووتم منیش لەگەڵ ئەوانم،هەروا داوام لێكرد كە قسەیان بۆ بكات،هاوڕێ (عزیز) بیرۆكەكەی گەلێك پێ باش بوو، ووتی دێم بۆ سەردانییان و قسەشیان بۆ دەكەم ،بەڵام لە سەر چ بابەتێك بە باشی دەزانی قسەیان بۆ بكەم ؟ ووتم ئەو هاوڕێیانە ووریانە و خوێندەواری باشن و بەردەوام دەخوێننەوە ،دەیانەوێت دەربارەی ماركەسییەت و ئەحزابی شیوعی و سۆڤییەت و دەوڵەتانی سۆسیالیستی زۆرترین زانیاری كۆبكەنەوە و لە ژیانی حزبییاندا پەیڕەوی بكەن بە‌لا‌‌‌َم سە‌بارە‌ت بە‌ قە‌زییەی گەلی كوردمان جێگای بایەخییان نییە‌ و بە ووشكی وەرییان گرتووە‌ ،بە باشی دەزانم باسی سیاسەتی حزبیان دەربارەی ئەو مەسەلە‌یە بۆ بكەیت ، لەگەڵ هاوڕێ(عزیز) لە سەر كات و رۆژی سەردانەكە رێككەوتین و دواتر ئاگاداری هاوڕێیانم كرد كە‌ هاوڕێ (عزیز) لەم رۆژانە‌ دێتە‌ سەردانمان و لە گەلمَادا كۆدەبێتەوە و دەربارەی هەندێ بابەت كە بە پێویستی بزانێت قسەمان بۆ دەكات ، ئەگەر هەر پرسیار و رایەكتان هەبوو لە گەڵ هاوڕێ (عزیز ) باسی بكەن و پرسیاری ئاراستە بكەن، هاوڕێیان گەلێك شاد بوون.

لە كات و رۆژی دیاریكراودا هاوڕی (عزیز ) گەییشتە لامان و لەلایەن هاوڕێیانەوە زۆر بە گەرمی پێشوازی لێكراو ، هاوڕێ (عزیز ) یەكە یەكەیانی ماچ كردو ،بە رووێكی خۆشەوە دەی ووت ئای بابە لەو گەنجە قۆزانە، دوای ئەوە كۆبووینەوە و هاوڕێیانم بە هاوڕێ ( عزیز) ناساند، ئینجا هاوڕێ(كاوان) بە ناوی هاوڕێیانەوە بە خێرهاتنی هاوڕێ(عزیز)ی كرد و شاد بوونی خۆیانی بە دیدارەكە دەربڕی و داوای لە هاوڕێ (عزیز) كرد ئەگەر هەندێ بابەت و هەواڵییان بۆ باس بكات ...

هاوڕێ (عزیز) وەكو نەریتی خۆی بە رووێكی خۆشەوە هەواڵی یەكە یەكەیانی پرسی و ،هەروا ژیانی رۆژانەیانی بەسەر كردەوە و،ئاماژەی بەوەدا ئەگەر كەم وكورتییەك لە لایەن هاوڕێیانەوە هەبێت چاوی لێ بپۆشن ،لەبەر ئەوەی بارو دۆخی ئەو ناچەیە هەر ئەوەندەی لێ شین دەبێت . دوای ئەو ووتانە ،هاوڕێ (عزیز)باسی لە بزوتنەوەی كۆمۆنیستی جیهان و رۆڵی یەكێتی سۆڤییەت و دەوڵەتانی سۆسیالیستی و گرنگی ئاشتی جیهان كرد و هەروا باسی لە بارو دۆخی ناوچەكە و عێراق و شەڕی نێوان ئێران و عێراقی بۆ رۆنكردینەوە، دوای ئەوە هاتە سەر باسی قەزییەی گەلی كوردمان لە هەر چوار پارچەی كوردستان و چالاكییەكانی پێشمەرگەی كوردستان لە دژی دوژمنانی گەلەكەمان، ووتی دوژمنانی گەلی كوردمان لە هەموو شتێك دژ بە یەكن تەنیا لە دژی داوا رەواكانی گەلی كورد تەباو دۆستن،هاوڕێ (عزیز) لە سەر ئاخاوتن بەردەوام بوو ووتی میللەتی كورد لە هەر چوار پارچەی كوردستان بێ پشت وپەنایە و، دەوڵەتانی دەوروبەر دوژمنمانن ، دەبێت حزبەكانی ئێمە واتە شیوعییەكان بەبێ دوودڵی پشت وپەنای گەلی كوردمان بن ،داكۆیكاری راستەقینەی گەلەكەمان بین، بەردەوام بوو ووتی لە هەر كۆڕ و كۆبوونەوە و كۆنگرەیەكی نێونەتەوەیی بوارم بدەن بە ناوی حزبمان قسە بكەم چواریەكی ووتەكانم بۆ قەزییەی گەلی كوردمان تەرخان دەكەم دەبێت وابین،نابێت گەلی كورد لە بیر بچێت،سەیركەن پێشمەرگەی كوردستان لە هەر چوار پارچەی كوردستان گەلێك لە (فیدایانی فەلەستین) زۆرترن و چالاكی گەورە و كاریگەر ئەنجام دەدەن ، بەڵام لە دونیادا كەس باسمان ناكات،بەڵام لە هەمان كاتدا ئەگەر (فیدایانی فەلەستینی) تەقەیەك لە دوژمن بكەن بۆ بەیانی بە دەیان تۆ بڵێ بە سەدان زوبان باسی لێوە دەكرێت، دەزانن بۆچی ؟ چونكە ئەوان (22) دەوڵەتی عەرەبییان لە پشتە و دیفاعییان لێدەكەن ، بە داخەوە ئێمە دەوڵەتمان نی یە، بۆیە دەبێت ئێمەی شیوعییەكان بەردەوام عەدالەتی قەزییەی گەلی كورد بە ئەحزابی شیوعی و دەوڵەتانی ئیشتراكی لە پێشەوەیان یەكێتی سۆڤییەت بگەیەنین بۆ ئەوەی داكۆكی لە گەلەكەمان بكەن،بەردەوام بوو، ووتی سەیركەن بۆچی دەبێت شاعیرێكی گەورە و بە ناوبانگی شیوعی وەكو (محمود دەروێش) بڵێت (سجلونی انا عربی) راست و دروست گونجاو بێت ، بۆچی بۆ كوردێك گونجاو وپەسەند نەبێت ،بڵێت ناو نووسم بكەن من كوردم. لە كۆتاییدا هیوای ژیانێكی ئاسودەی بۆ خواستن.

هاوڕێیان شاد و دڵخۆش بوون و سوپاسی هاوڕێ (عزیز) یان كرد، نانی نیوەڕۆمان بە یەكەوە خوارد و پاشان هاوڕێ (عزیز) بۆ شوێنی خۆی گەڕایەوە و یەك هاوڕێی لە گەڵدا بوو.