ئەم هەواڵە بڵاوبكەوە
FaceBook  Twitter  

موسڵ بە خوێن قوربانیەکی کەم هاوتاو پاش وێرانکردنی شارەکە لە دەستی داعش ڕزگارکرا... لەلایەکەوە کە دڕندەترین دوژمنی مرۆڤایەتی تیادا شکێنرا مایەی دڵخۆشیە. بەڵام ئاخۆ ئایندەی موسڵ و سەرجەم عێراق لەمەودوا چۆن ئەبێ.

ئەوانەی ـ داعش ـ یان هێنا بۆ عێراق بەمەبەستی هەڵوەشاندنەوەی ئەم دەولەتە پیلانەکەیان ڕێکخستبو. بەڵام دابەزینی ڕوسیا وەک هاوپەیمان لەگەڵ ئێران و پشتیوان بۆ حکومەتی (ئەسەد). بو بەڕێگر لەو پیلانە بەتێکڕایی. واتە هەڵوەشاندنەوەی جوگرافیای خۆرهەڵاتی ناوەڕاست... لەگەڵ ئەوەش دا مەترسیەکە هەر ماوە چونکە:

اـ داعش کەلە مەیدانی جەنگی دەستەو یەخەدا تێک شکا. لەهەردو بواری فکری و وکۆمەڵایەتی دا هەر ماون.

ب ـ سیاسەتی تایەفەگەری و مەزهەب خوازی کە لەم وڵاتەدا بەسەر هەمو سیاسەتێکی تردا زاڵە. بۆ خۆی مایەی سەرهەڵدانی توندو تیژی ودڕندەییە.

ئەگەر بەم شێوەیە بەردەوام بێت یان ئەگەر بێگانە بەتایبەتی ئەوانەی بەتەمای دابەشکردنی عێراق بوون لەسەر خواستی خۆیان بەردەوام بن..

لەم حاڵەتەدا هیچ دور نیە کە پاشماوەی ـ داعش ـ لە وڵاتەکەدا ببێتە هاوکار و هاوپەیمانی خوازیارانی تایەفەگەری و مەزهەب خوازی. بۆ دوبارە نانەوەی ئاژاوە و کوشت و بڕ و کەرت و پەرت کردنی وڵاتەکە بە چەند (ولایەتێکی) ناشەرعیەوە ...!! و زەمینە و هەل و مەرج بڕەخسێنێ بو دابەش کردنی شەرعی!!

بەکورتی و بە کوردی ئەگەر شیعە. کە ئەمڕۆ دەسەڵاتدارە لە عێراق دا ... چەوسێنەرەوەی سونی مەزهەبەکانە. دەست لەو ڕەفتارو زۆرەملێیەی خۆی هەڵنەگرێ و عێراق بە یاساو بە کردەوە نەبێتەوە بەعێراقی هەمو هاووڵاتیان ئەگەر دەسەڵات نەکرێت بە دەسەڵاتی هەمو عێراقیەکان. ئەگەر سامان و داهاتی وڵات نەخرێتە خزمەتی خەڵکی عێراق و ئاوەدانکردنەوەی شارو دێهاتە وێرانکراوەکان و یارمەتی دانی ئاوارەو لێقەوماوەکان. ئەوا بێ گومان ئەوم وڵاتە ئارامی و ئاشتی و خۆشگوزەرانی بەخۆیەوە نابینێ!! بێ گومان خەڵکانێک هەن کە خوازیارن ئەم سیاسەت و هەڵوێستە دروستە سەرنەگرێ و لایەنی دەرەکیش هەیە پشتیوانیان ئەکات بۆ مەرام و مەبەستی خۆی..

وەک ئەبینین, سوننەمەزهەبەکان لە ئێستاوە خەریکی خۆکۆکردنەوەو خۆ تەیارکردنن بۆ زامن کردنی بەشەکەی خۆیان. بە دزی و بەئاشکرا چونکە هەست ناکەن لەلایەن بەرەی شیعەی دەسەڵاتدارەوە هیچ دەست پێش خەریەک هەبێ بۆ مامەڵەکردن لەگەڵیان دا وەک هاووڵاتی.. ئەمەیش لە خۆی دا سەرەتایەکە بۆ دروست بونەوەی کێشە و ململانێ کە ـ پاشماوەی داعش ـ ئاگرەکەی خۆشئەکات!!

لەم کەین وبەینەدا باسی هەلوێستی کورد/ یشئەکرێ. وەک هۆکارێک هەرچەندە کورد وەک نەتەوەیەک نەک تایەفە و مەزهەب خوازێک بە ئاشکراو بە ڕێگەی ئوسوڵی و مەدەنیانە داوای مافی ڕەوای خۆی ئەکات. چونکە ئەو مافە سیاسی و ئیداری و ئابوری و سەرابازیانەی کەلە مادەی ١٤٠ دا چڕکرابونەوە و ئەبوایە تا ساڵی ٢٠٠٧ چارەسەر بکرانایە و کورد شەریکێکی شەرعی و یاسایی بوایە لەم عێراقەدا نەک هیچی جێبەجێنەکرا. بەڵکو کەمەڵێک کێشە و گرفتی تری لەدەور کۆکرایەوە و خەریکە ئەبیتە هۆی دابڕان!!

مەبەستم ئەوەیە کەسان و لایەنێک ئەیانەوێ وای پیشان بدەن کە کورد/ یش بەشێکە لەو کێشەو ململانێیەی لە عێراق دا دروست کراوەو هەڕەشە لە ئایندەی ئەکات..!!

واتە ئەیانەوێ کورد وەک نەیارو ناحەز پیشان بدەن!! ئەو ڕاستیە ڕون و ئاشکرایەیان لەبەر چاون کە گەلی کورد لەم ساڵانەد سەختەدا. بەرانبەر بە دوژمنی داگیرکەر چۆن هەلوێستیکی جوامیرانەو دۆستانە و هاوکارانەیان هەبو تا ئەمرۆیش هەربەردەوامن. نەک تەنها لە مەیدانەکانی جەنگی ـ داعش ـ دا. بەڵکو لە بواری داڵدەو پەنادانی سەدان هەزار ئاوارە و لیقەماوی ناوچە داگیرکراوەکان / یش دا. کە تا ئەمرۆ بەبێ هیچ جیاوازیەک مامەڵەیان لەگەڵ ئەکرێ....

ئەحمەد حامید