ئەم هەواڵە بڵاوبكەوە
FaceBook  Twitter  

سێ‌ ساڵ بەر لە ئێستا داعش شاری مەخموری داگیركرد، گیرانی مەخمور ترس و تۆقاندن و دڵە راوكێیەكی زۆری خستە دڵی دانیشتوانی هەولێرو بگرە سەراپای كوردستانیش، دوو رۆژ بەر لەوەش هاوڕێ‌ (ئەحمەد شێروانی) بەرپرسی حزب لە هەولێر تەلەفۆنی بۆم كردو داوای كرد بچمە لای لەبارەگای محەلی هەولێر.

ئەوەبوو من و مامۆستا رەوەند و ئەبو دلشاد و ئەحمەد شێروانی و مەكتەبی محەلی لەسەر مەترسییەكانی داعش و لەسەر ئەگەری هێرشی داعش بۆ سەر هەولێر كۆبوونەوەمان كردو گەیشتینە ئەو قەناعەتەی كە مەترسییەكی گەورە لەسەر مەخمورو گوێرو بگرە هەولێریش هەیە، بۆیە شەو سەعات (10) هەر چوار هاوڕێ‌و ژمارەیەك لە ئەندامانی مەكتەبی محەلی و دەستەیەك لە پێشمەرگە دێرین و رێكخستنەكانی هەولێری حزب بەرەو مەخمور بەرێكەوتین، دواتر پێشبینییەكانمان راست دەرچوو، داعش بە هێزێكی گەورە لەچەندین قۆڵەوە هێرشی بۆ سەر دەشتی هەولێر دەست پێكردبوو‌و هەروەها توانیبووی مەخمورو گوێر داگیر بكات، دەبێت بۆ مێژوو ئەوەش بڵێم لە هەموو ئەو شەڕانەی هێزی پێشمەرگە لەو سنورە لە بەرامبەر داعش ئەنجامیدا ئێمەش وەكو هاوڕێیانی حزب رۆلێكی گەورەمان هەبوو، هەم راگرتنی هێزەكانی داعش لە شوێنی خۆی و هەم دواتریش لە ئازادكردنی مەخمور، (هاوڕێ‌ تاهیر) بەرپرسی حزب لە مەخمورو هاوڕێ‌ (عومەر) لە رێكخستنی حزب لەو شارە بە ئیرادەیەكی بەرزو بوێرانە هاوشانی ئێمە توانیمان لەرێگای رووبەڕووبوونەوەی هێزە ترسناك و دڕندەكانی داعش بەشدارییەكی گەورە بكەین لە سەرجەم سەروەرییەكانی بەرگری كردن لەو دەڤەرەو دواتریش ئازادكردنی مەخمور.

بۆیە ئەمڕۆ 10/8 كە ساڵوەگەڕی ئازادكردنی مەخمورە لەدەستی داعش، شانازی بە هاوڕێكانمەوە دەكەم، شانازی بە حزبەكەم دەكەم كە لەهەموو قۆناغە مێژوویەكاندا دڵسۆزو وەفاداری نیشتمان و رۆڵەی رۆژی تەنگانە بوونە.

سڵاو لە گیانی پاكی شەهیدانی كوردستان

هەر سەربەرزو ئاڵا شەكاوە بێت مەخمور شاری خەڵكی مەردو خۆڕاگری