ئەم هەواڵە بڵاوبكەوە
FaceBook  Twitter  

لە ماوەی رابردودا، پارت و كەسایەتیە شیعیەكان، لە عەمار حەكیمی برامانەوە كە شانازی بێ پایان بە هەڵوێستی باپیریانەوە دەكرا، تا حیزبی دەعوە بە هەموو باڵ و لق و كەرتەكانیەوە، بۆ ئایەتوڵا تەقی المودەرسی،دژایەتی خۆیان بۆ پرۆسەی ریفراندۆم و سەربەخۆیی كوردستان راگەیاند، لە كۆتایشیاندا پیاوە لیبراڵەكە دۆستەكەی بارزانی و ئەیاد عەلاوی لە هەموویان نەرم تر رەخنەی خۆی گرت و داوای لە كوردەكان كرد ریفراندۆمەكە رابگرن، گوایە كات لەبار نییە بۆ ئەنجامدانی ئەم پرۆسەیە ؟؟، ئیتر نازانم كام كات بۆ ئەوان لەبار دەبێت، تا نەتەوەی ژێر دەستەیان مافی خۆی رابگەیەنێت ؟؟ لەم نێوەدا تەنها حیزبی شیوعی عێراقی وەك یەكەم پارتی عێراقی پشتیوانی خۆی بۆ ریفراندۆمی كوردستان وەك مافی نەتەوەی ژێر دەست لە دیاریكردنی چارەنسی خۆی دەربڕی و بە مافی كوردستانیانی زانی ئەو مافەی خۆیان پیادە بكەن بێ قەیدو شەرت. 

ئەم هەڵوێستانە، هەڵوێستی باڵە جیاجیاكانی بۆرجوازی عەرەبی شیعەی دەسەڵاتداری عێراقە كە بەسەر چەندین تەوژمی سیاسی دابەش بوونە، رەنگدانەوەی بۆچونێكی نەتەوەیی شۆفینییە، ئەگەر ئەم پارت و كەسایەتیانە ماوەیەك كە خۆیان مرۆڤی پلە دوو بوون لە عێراقدا، بۆ ئەوەی شوێن پێی خۆیان لە كوردستان بكەنەوە، هەندێك مافیان بە ڕەوا زانیبێت بۆ كورد و پێكهاتە ستەمدیدەكانی دیكەی عێراق، ئەوا ئەمرۆ لە پێگەی دەسەڵاتەوە چونەتەوە قاوغی راستەقینەی خۆیان و هەموو مافێك بۆ نەتەوەو پێكهاتەكان رەت دەكەنەوە لەو عێراقەی خۆیان دەسەڵاتدارین. 

دەسەڵاتدارانی ئەمرۆی عێراق وەك بینیمان لە چەند هەفتەی رابردوودا قسەی خۆیان كرد، ئەوانەی بڕیاری عێراقیان بە دەستەوەیە چ خۆیان، یاخود لە رێگای ئێرانەوە نموونە باڵاكەیان پەیامی خۆیان گەیاند، ئیتر ئەم شاندە دەچنە بەغا داوای چی زیاتر دەكەن وەك ئەو هەڵوێستانەی بە فەرمی دەربِردراون، بە نیازی چی زیاترن لە دەسەڵاتدارانی بەغدا بەدەستی بهێنن؟؟، چ تەوەهمێكیان بەم لایەنانە هەیە؟؟، دەیانەوێت لە گفتوگۆكانی سەر سفری رازاوەوە، لە گەڵ قاقای پێكەنینا، مافی ریفراندۆم بە دەست بهێنن و ناوچە دابڕاوەكان بگەڕێننەوە؟؟، دەیانەوێت عێراقی مەلاكان لە ئیسپانیا دیموكراتانەتر هەڵوێست بنوێنن وەك ئەوان بەرامبەر باسك و كەتەلۆنیا دەینوێنن، مافی ریفراندۆم نەك جیابونەوە رەتكەنەوە بۆ ئەو گەلانە؟. 

دەسەڵاتدارانی ئێراق هەڵوێستی خۆیان راگەیاندوە كە هێشتا لە چاوەڕوانی شكست هێنانی پرۆسەكەن بۆ ئەوەی تەقەی خۆشی سەركەوتن رابگەیەنن و ئەنجامەكەی بكەنە بەڵگەنامەی مێژوویی بە دەست خۆیانەوە، ئەگەریش نا لە ترسی ئەمەریكاو كۆمەڵگای نێودەوڵەتی نەبێت، لەمرۆ زوتر نییە فتوا بدەن بە حەشد(بەسیج) تا كوردستان دەگرنەوە قەیتانی پۆستاڵەكانیان نەكەنەوە. 

لە لایەكی دیكەوە هەڵوێستی نموونە باڵاكەی ئەوان كۆماری ئیسلامی ئێرانە بەرامبەر بە گەلی كورد لە رۆژهەڵاتی كوردستان، ئەزموونی زیندوو لە گەڵدا تاقی كراوەتەوە، ئایا بە نیازن ئەمان لە ئیلهام بەخشەكانیان زیاتر بە رەوا بزانن. 

لە بری چون بۆ گفتوگۆ لە گەڵ ئەو هێزانەی گفتوگۆ لەسەر ماف لە ئایدیاو باوەڕیان نییە، بایكۆتی حكومەت و هەڵبژاردنەكانی بەغدا بكەن و نوێنەر و ستافی حكومەت بكشێننەوەو خۆ بۆ ئەگەرەكانی بەردەم جوڵەی حەشدی شەعبی ئامادە بكەن، ئەگەر بە نیازن بەڵێنەكانتان بگەیەننە سەر لە راگەیاندنی سەربەخۆیی دوای پرۆسەی ریفراندۆم.