ئەم هەواڵە بڵاوبكەوە
FaceBook  Twitter  

وادیارە زۆرێک لە دۆستەکانیش داوا ئەکەن کە ڕاپرسی هەرێمی کوردوستان دوابخرێ بۆ کاتیکی گونجاو و لەبارتر. گوایە لەبەر ئەوەی بارودۆخی هەرێم و عێراق و دەوەروبەر هیچ کامیان گونجا و لەبار نین...!!

ئەو پرسیارەی کە ڕاستەوخۆ وە دەست بەجێ ڕوبەڕوی ئەو کەس و لایەنانە ئەبێتەوە ئەڵێ ـ جێگرەوەی ڕاپرسیەکە ئەبێ چی بێت؟

پێشەکی ئەبێ بەو دۆست و لایەنانە بوترێ ـ ئێوە کە هەموتان گوشار ئەخەنە سەر حکومەتی هەرێم کە ئەم پرسە نەتەوەییە ڕەوایە دوابخات. ئەی بۆچی بەهەمان شێوە گوشار ناخەنە سەر حکومەتی بەغداد و لایەنەنەیارەکانی تر کە ئامادەبن بۆ چارەسەرکردنی ئەو کێشەو گرفتە کەڵەکەبوانەی کە چەندین ساڵە پشت گوێیان خستوە و ساڵ لە دوای ساڵ زیاتر گرژ ئەبن و پەنگ ئەخۆنەوە!!

هەموان باش ئەزانن کە ئەو کێشەو داواکاریانە چین و چۆنن و چەند ساڵە دەسی دەسی بە کورد ئەکرێ, لەلایەکی ترەوە حکومەتی هەرێم چەندین جار وەفدی ناردوە بۆ گفت و گۆ و نەفەسی درێژبوە... بەڵام بەرانبەر بەو هەڵوێستەی کورد و حکومەتی نوری مالیکی موچەی سەرجەم فەرمانبەرانی حکومەتی هەرێمی بڕی و دەرگای پەیوەندی و گفت و گۆی داخست. و هێزێکی پڕ چەکی بەناوی هێزی دیجلەوە دامەزراند بۆ پەلاماردانی حکومەتی هەرێم!! خۆ ئەگەر شەڕی داعش نەبوایە. ئەو شەڕی دژی کورد دەست پێ ئەکرد!! بەڵام کە خۆی ئەوەی پێ نەکراو (موسڵ)ی تەسلیم بە داعش کرد. ڕۆڵی ڕاستەوخۆی هەبو کە هێرشەکەی (داعش) ئاڕاستەی (هەرێم) بکرێ. بەرەو هەولێر بۆ هەڵوەشاندنەوەی فیدرالیەکەی هەرێمی کوردوستان!!!

تا ئەمڕۆش سەرەڕای هەڵوێستی جوامێرانەی حکومەتی هەرێم و هێزی پێشمەرگەی قارەمان و هاوکاری کردنی دڵسۆزانە لەگەڵ حکومەتی بەغداد دژی مەترسی تیرۆیستان ئەو کێشەو خواستانەی کورد هەر ماون و زیاتربون و چارەسەر نەکراون!!

باشە بەرانبەر بەم هەڵوێستانەی کورد. حکومەتی بەغداد چی کردوە و ئەبێ چی بکات؟

کورد داوای شەراکەتی ڕاستەقینە ئەکات لە هەمو بوارەکان دا نەک نەتەوەی ژمارە یەک و دو!!نەک ئاغا و نۆکەر !! دیارترینی ئەو کێشانە ئەوەبو لە مادەی (١٤٠) ی دەستوردا کۆکرایەوە. کە ئەبوایە ساڵی ٢٠١٢ کۆتایی بهاتایە. کوا ئەو مادەیە, چی بەسەر هات؟! مالکی ئەیوت کاتی بەسەر چوە!!

دوای هەمو ئەوانە کورد ئەبێ هەڵوێستی چی بێت؟ شەڕ بکات یان داوای جیابونەوەیەکی ئاشتیانە و دۆستانە و مرۆڤانە بکات؟

ئەو دۆست و کەس و لایەنانە کە داوای سەبرو دان بەخۆداگرتن لە کورد ئەکەن. ئەبێ خۆیان وەڵامی ئەم پرسیارە بدەنەوە. ئەبێ گوشار بخەنە سەر حکومەتی بەغداد کە ئەو کێشە کەڵەکە بوانە چارەسەر بکات کە شەریکایەتیەکە بە کردەوە بکات بە ڕاست..

ئەی بۆ حساب بۆ ئەوە ناکەن کە ئەمە چوار ساڵە خەڵکی هەرێمی کوردوستان لە قەیرانێکی ئابوری خنکاودا ئەژین. بێ موچە, برسێتی, بێ کاری, دواکەوتن لە هەمو بوارە ئابوریەکان ... نەک کۆچ بەڵکو ڕەوکردنی بە کۆمەڵ/ ی خەڵک بەرەو هەندەران...هتد.

ئەمانەیە شەریکایەتی, هاونیشتمانیەتی حکومەتەکانی بەغداد؟!!

دەبا ئەو دەوڵەت و لایەن و کەسانە گوشاری جدی بخەنە سەر حکومەتی بەغداد بۆ جێبەجێکردنی ئەو کێشەو داخوازیە کۆن و نوێ یانە. با هاوکارمان بن بۆ چارەسەرکردنیان لە ماوەیەکی دیاری کراودا, بەڵێ لە ڕۆژی دو شەممەی ڕابوردوەوە وەفدی هەرێم لە بەغدایە فەرمون بە کردەوە هاوکاربن بۆ پێکهاتن.

لە کۆتاییدا ئەڵێم دواخستنی ڕاپرسی بەرانبەر بەچی و هەتاکەی؟ یان ئەیانەوێ وەک مادەی (١٤٠) ی بەسەر بێت. کە دو حەوت ساڵی بەسەر (موعد) ەکەیدا تێپەری کردو جێبەجێ نەکرا!!

پێشینان وتویانە ـ ئەگەر جارێک منت هەڵخەڵەتاند خوا بتگرێ بەڵام جاری دوەم خوا خۆم بگرێ!!