ئەم هەواڵە بڵاوبكەوە
FaceBook  Twitter  

تیۆریزه‌كردنی نائومێدی هونه‌رێكی زۆرقورس نیه‌، لانیكه‌م له‌به‌ر سێ هۆكار:

1) دۆخی مرۆڤ تا ئێستا دۆخێكی زۆر ئه‌رێنی و ئایدیاڵی نه‌بووه‌. چركه‌ساتی گه‌ش له‌ مێژوودا هه‌ن، به‌ڵام هێشتا نایه‌كسانی و ته‌نگژه‌ زۆرن. به‌ ده‌ربڕینه‌ فرۆیدییه‌كه‌، هێشتا "گرژییه‌كانی مرۆڤ" له‌ ئاستێكی به‌رزدان. وه‌سفكردنی ئه‌م مێژووه‌، بلیمه‌تییه‌كی زۆری ناوێت. چونكه‌ ئه‌وه‌ی هه‌بووه‌ پێدراوه‌، دراو و داتایه‌، تاقیكراوه‌ بووه‌(لێره‌وه‌یه‌ ماركس له‌ مێژوودا هه‌ر زیندووه‌، چونكه‌ باس له‌ مێژوویه‌كی ڕه‌سه‌ن ده‌كات كه‌ هێشتا تاقینه‌كراوه‌ته‌وه‌ و باس له‌ تایپێك مرۆڤ ده‌كات كه‌ جیایه‌ له‌م تایپه‌ی ناو مێژووی چه‌وسانه‌وه و هێشتا وه‌ك ئاسۆیه‌ك هه‌ر ده‌توانین بیری لێ بكه‌ینه‌وه‌‌)

2) نائومێدی تاڕاده‌یه‌ك له‌ پاڵنه‌ری مه‌رگ-ی فرۆیدییه‌وه‌ نزیكه‌. شتێكی ئاشنایه‌ و ده‌ركه‌وته‌كانی له‌ ژیانی ڕۆژانه‌دا چه‌ندباره‌ ده‌بنه‌وه‌. كۆمه‌ڵگا چینایه‌تییه‌كانی ناو شارستانیه‌تیش پتر ئیشیان له‌سه‌ر پاڵنه‌ری مه‌رگ كردووه‌ و به‌جۆرێك له‌ جۆره‌كان پاشه‌كشه‌ به‌ ئیرۆس و پاڵنه‌ری ژیان كراوه‌(لێره‌وه‌یه‌ ماركۆزه‌ هه‌وڵده‌دات له‌ كتێبی –ئیرۆس و شارستانیه‌ت-دا ڕووبه‌ری نا-سه‌ركوتگه‌رانه‌ی ناو مێژوو و شارستانیه‌ت فراوانبكاته‌وه‌ و ده‌سكاریی ئه‌و پێناسه‌یه‌ی فرۆید بكات كه‌ پێی‌وایه شارستانیه‌ت به‌ره‌نجامی سه‌ركوت و چه‌پاندنه‌‌). له‌ناو شارستانیه‌ت و چینایه‌تی و له‌مڕۆشدا ده‌ركه‌وته‌كانی پاڵنه‌ری مه‌رگ زۆرن وه‌ك: زۆریی ڕووداوی ئۆتۆمبێل، خواردنه‌وه‌ی زۆر، چێژبینین له‌ فیلمی خوێناوی و ڤامپایه‌ر و هتد. به‌م جۆره‌، نوسینی نائومێدكه‌رانه‌ خۆی هاوئاراسته‌یه‌ به‌ ته‌نگژه‌ی شارستانیه‌ت و مێژووی چینایه‌تی.

3) ئه‌و نوسین و به‌رهه‌مانه‌ی كه‌ به‌ناوی ده‌روونناسی و عیرفانی نوێ و ئه‌ده‌بیاتی سقوگ/كه‌وتن و گه‌شه‌پێدانی مرۆییه‌وه‌ بڵاوده‌كرێنه‌وه‌، له‌ڕواڵه‌تدا بانگه‌شه‌ بۆ جووڵه‌ و گه‌شبینی ده‌كه‌ن؛ به‌ڵام له‌قووڵاییدا پێچه‌وانه‌ن. ئه‌وان هه‌وڵده‌ده‌ن شكست وه‌ك شكست نه‌بینین. له‌كاتێكدا شكست مه‌رجێكی سه‌ره‌تایی "دیاله‌كتیك"ـه‌ بۆ گه‌یشتن به‌ دۆخێكی باشتر. ئه‌م جۆره‌ نوسینانه‌ش تێكڕا سه‌ر به‌ سه‌ركوت و پاڵنه‌ری مه‌رگن. شكست، سه‌ركوت ‌و ساڕێژده‌كه‌ن. له‌كاتێكدا، شكست هه‌م تێكشكانی ئه‌زموونێك و دیارده‌یه‌كه‌، هه‌م قڵیش و ڕێگای ده‌رچوونیشه‌.به‌م پێیه‌ نوسینی نائومێدانه‌ زووتر ده‌گات و زووتر گوێگری خۆی ده‌دۆزێته‌وه‌(قه‌ره‌قۆزێكی وه‌ك ئه‌میل سیوران له‌و نمونایه‌)

ئه‌مڕۆ له‌ تێگه‌یشتنی باودا، هه‌وڵده‌درێت ئاوڕ هه‌میشه‌ له‌ ڕابردوو بێت. گوایا ڕابردوو پڕه‌، جێی هیوای تیا نه‌ماوه‌، ئاینده‌ش هه‌روایه‌. گه‌ر باسی ئاینده‌ش بكرێت، دوور نیه‌ تۆمه‌تی ئاخرزه‌مانی و قیامه‌تگه‌را و خه‌یاڵپڵاوی-ت بدرێته‌ پاڵ. له‌م نێوانه‌دا وشه‌یه‌ك هه‌یه‌ و به‌جۆرێك له‌جۆره‌كان له‌بیركراوه‌: ئاسۆ(horizon). ئاسۆ هێڵی نێوان زه‌وی و ئاسمانه‌، دوورترین كه‌نار و خاڵی بینراوه‌ له‌ ئێمه‌وه‌. ئاسۆ نه‌ له‌ڕابردوودایه‌، نه‌ له‌ قیامه‌تیشدا، به‌ڵكوله‌ ئاینده‌ی سه‌رزه‌ویدایه‌. ئاسۆ چه‌مكێكی ماتریاڵیستی و دونیاییه‌. شتێكه‌ ده‌توانین له‌ناو سیسته‌مه‌وه‌، تۆزێك ئه‌ودیوی سیسته‌میشی پێ ببینین. ئه‌م نائومێدییه‌ی چوارده‌ورمان و ئه‌م گه‌شبینییه‌ سه‌ركوتكاره‌ش، له‌ ئه‌نجامی ونبوونی ئاسۆوه‌ هاتوونه‌ته‌ئاراوه‌.

"ئاسۆی ڕزگاری" ڕه‌نگه‌ تۆزێك له‌ ئێمه‌وه‌ دوور ده‌ربكه‌وێت‌، به‌ڵام خاڵی بینینه‌كه‌ی لای هه‌موومانه‌وه‌یه‌ و ناوی "به‌ره‌نگاری"یه‌.