ئەم هەواڵە بڵاوبكەوە
FaceBook  Twitter  

سەرەڕای شەپۆلێکی پان و بەرین , ئامۆژگاری و وریاکردنەوە و هەڕەشەی دەرەکی و خۆوڵاتی. سەرەڕای هەڵوێستی هەندێک لایەنی نەیار لەناو خودی هەرێم دا. ڕاپرسیەکە سەرکەوتوانە و بەشێوەیەکی ئاشتیانە ئەنجام درا. پێم وایە وەک ڕوداوێکی ناودێر لە مێژوی گەلی کوردا ئەنوسرێ. چونکە هەرچەندە ئەم ڕاپرسیە تەنها لە کوردوستانی عێراق دا جێبەجێ کرا بەڵام لە هەمو بەشەکانی تری کوردوستاندا, باکور و خۆرئاوا و خۆرهەڵات دەنگی دایەوە مایەی یەک دەنگی بو...

جگە لەمەیش گرنگیەکەی لەوەدا بو کە هاونیشتمانیانی کورد لە ناوچە دابڕێنراوەکان دا زۆر بە گەرمی هاتن بە پیر دەنگ دانەوە و سەلماندیان کە شارو ناوچە و گوندەکانیان بەزۆرملێ لە هەرێمی کوردوستان دابڕێنراون. لە گەوهەریش دا مەبەست دەنگی ئەوان بو. چونکە خەڵکانێک وابەتەمابون ئەنجامی ئەو شوێنانە دەنگ دانەکە بە پێچەوانەوە بێـت....

دوای ئەم سەرکەوتنەی ڕاپرسیەکە, بەتایبەتی لەوناوچانەدا کە هێشتا لەژێر دەسەڵاتی حکومەتی بەغداد؟دایە. ئاخۆ کاربەدەستانی حزب و لیست و گروپە جیاجیاكانی عەرەبی عێراق مل كەچی ئەم واقعە زەقە ئەبن. یان لەسەر هەڵوێستی پێشووی خۆیان ئەمێننەوە؟

كورد بریاری خوی دا و پاشەڕۆژی خۆی دیاریکرد کە دامەزراندنی دەوڵەتی سەربەخۆیە لە ئایندەدا و ئەم هەڵوێستەی بە هەمو جیهان ڕاگەیاند و کاردانەوەکەیشی لە بەرژەوەندی گەلی کورد ئەبێ ئەمڕۆ یا سبەی..

حکومەتی هەرێم و سەرکردایەتی کورد پێش ڕاپرسیەکە و ئێستاش بەردەوامن کە گفت و گۆ لەگەڵ بەغداد بکەن سەبارەت بە ئایندەی ئەم ڕاپرسیە و ئامادەن ئاشتیانە و دۆستانە بگەنە ئەنجام و زۆرجار دوبارەیان کردۆتەوە کە (استفتا‌و) مانای جیا کردنەوەی دەست بەجێی سنور نیە. مانای دامەزراندنی دەست بەجێی حکومەتی سەربەخۆی کورد نیە. چونکە واقع بینانە ئەڕواننە بارودۆخەکە چ لەناوخۆ و چ لە دەرەوە لێک ئەدەنەوە هەروەها ئەزانن دامەزراندنی ئەم دەوڵەتە کۆمەڵێک هەل و مەرج و پێداویستی تایبەتی پێ ئەوێ بەڵام لەگەڵ ئەوەش دا هەڵوێستی حکومەتی بەغداد بە واتا یەکی تر (شیعە) ڕێچکە کە دیاری ئەکات دور یان نزیک.

وەکو دەرئەکەوێ زۆرێک لەکەس و کۆمەڵ و گروپە سیاسیەکانی ناوخۆیش گەیونەتە ئەو ڕایەی کە (کۆنفیدرالی) لەم بارو دۆخەدا باشترین ئەنجام و ئامانجە. واتە دو حکومەتی هاو دەسەڵات لە چوارچێوەی دەوڵەتی عێراق دا ئەبێتە زامنی چارەسەرکردنی کێشەکان و پێکەوەژیان بە ئاشتی... هەتا ئەو کاتەی زەمینەی لەبارو هەل و مەرجی پێویست ئەرەخسێ بۆ جیابونەوە و دامەزراندنی دەوڵەتی خوازراو. ئەمیش بەدەر نیە لە سیاسەت و هەڵوێستی دەوڵەتە زلهێزەکان.