ئەم هەواڵە بڵاوبكەوە
FaceBook  Twitter  

دوای ئەوەی ئەمشەو وەزارەتی دەرەوەی ئەمریکا بەیاننامەیەکی لەسەر رەوشی دەوروبەری کەرکوک و ناوچە جێ ناکۆکەکان دەرکرد، وا لەخوارەوە بەخێرایی چەند سەرنج و شیکاری و دەلالەتێک لەبارەی ناوەرۆکەکەیەوە دەخەمەڕوو: 

- لەلایەک بەیاننامەکە دوای بەرگری ئازایانەی پێشمەرگە لەشەڕی پردێ و بەرخۆدانی ئەم چەند رۆژەی خەڵکی کەرکوک و خانقین دێت.

- لەلایەکی تر بەتەواوی و بەووردی حکومەتی بەغدا و حکومەتی هەرێم وەک یەک و بەیەکسانی و وەک یەک ئاست دەدوێنێت، واتا هەرێم بەبچوکتر دانانێت.

- باس لە هەڵوەشاندنەوەی ڕیفراندۆم ناکات ، واتا ڕیفراندۆم سەرکەوتنی بەدەستهێناوە، ئیتر دەمێنێتەوە سەر کورد خۆی کەی و چۆن دەتوانێت بەکاری دەهێنێت؟

سەرنجی تر لەناو کەوانە لەسەر هەر بەشێکی گرنگی ناوەرۆکی بەیاننامەکە لەم دێڕانەی خوارەوەدا دەنووسم:

١) ویلایەتە یەکگرتووەکانی ئەمریکا نیگەرانە سەبارەت بەو راپۆرتانەی باسی پێکدادان لە دەروبەری شاری ئاڵتوون کۆپری لە باکووری عێراق دەکەن. (واتا هەڵوێستی ئەمریکا وەک بەرەنجامی راستەوخۆی توانای بەرگری پێشمەرگە لەشەڕی پردێ هاتووە، بەتایبەتی کە بەچەکی ئەڵمانی چەکی ئەمریکی تێک دەشکا، ئەوەش ئابڕووبەرانەیە بۆ شکۆی سەربازیی ئەمریکا)

٢) داوا لە هەموو لایەنەکان دەکەین کە هەموو تووندوتیژییەک و جووڵەی ئیستیفزازی رابگرن. (هەردووک عێراق و هەرێم بەیەکچاو و وەک دوو لایەنی هاوسەنگ سەیرکراون، ئەمەش ئەو پێگەیەی عێراق دەسڕێتەوە کە دەیگوت شەڕی چەسپاندنی دەستور و شەرعیەت دەکەین)

٣) داواش دەکەین هەماهەنگی بکەن لە جووڵانەوەکانیاندا بۆئەوەی هێمنی بگەڕێننەوە. (هێشتا ئەمریکا ترسی لە شەڕ و بەرگری پێشمەرگە هەیە و دەلالەتە لەسەر ئەوەی کە هەرێم لەپێگەی هێزەوە دەچێتە ناو دانووستانەوە)

٤) بۆئەوەی خۆ لابدرێت لە هەر لێکتێنەگەیشتنێک یان پێکدادانی زۆرتر، هانی حکومەتی ناوەندی دەدەین کە رەوشەکە هێور بکاتەوە، (واتا حکومەتی عێراقی خەتابارە و دەبێت ئەو ئەرکی هێمنی پارێزی بگرێتە ئەستۆ بە دەرکردنی حەشد و پاسداریشەوە)

٥) سنووردارکردنی جووڵەی هێزە فیدراڵییەکان لە ناوچە ناکۆکی لەسەرەکان بۆ تەنیا ئەو جووڵانەی بە هەماهەنگی لەگەڵ حکومەتی هەرێمی کوردستان دەهاویشترێن. (واتا تەنهاو تەنها هێزە فیدراڵیەکان دەبێت لەناوچەکان بمێننەوە و ئەوانیش ناتوانن بەبێ هەماهەنگی لەگەڵ هەرێم لە ناوچە ناکۆکی لەسەرەکان بجوڵێن)

٦) سەپاندنەوەی دەسەڵاتی فیدراڵی بەسەر ناوچە ناکۆکی لەسەرەکان بە هیچ شێوەیەک نابێتە هۆی گۆڕینی ناسنامەی ئەو ناوچانە. واتە ئەو ناوچانە هەر ناوچەی ناکۆکی لەسەر دەمێننەوە تاوەکو ئەوکاتەی چارەنووسیان لەسەر بنەمای دەستووری عێراق یەکلایی دەبنەوە. (دەبێت عێراق ماددەی ١٤٠ جێبەجێ بکات)

٧) تاوەکو ئەوکاتەی لایەنەکان لەسەر ئەوە دەگەنە چارەسەر، هانی تەواوەتیان دەدەین کە لە بواری ئاسایش و بەڕێوەبردندا پێکەوە هەماهەنگی بکەن لەو ناوچانەدا. (لەماوەی دانووستانیشدا و تا جێبەجێ کردنی ماددەی ١٤٠ دەبێت بە هەماهەنگی ئاسایش و ئیدارەی ئەو ناوچانە بکرێن)

٨) ویلایەتە یەکگرتووەکان پابەند دەمێنێتەوە بە عێراقێکی یەکگرتوو و سەقامگیر و دیموکراسی و فیدراڵی. پابەندیش دەمێنێتەوە بە حکومەتی هەرێمی کوردستانەوە وەک پێکهاتەیەکی سەرەکیی عێراق. (ئەمریکا هێشتا بڕوای بەعێراقی یەکگرتوو هەیە، بەڵام گەرەنتی پاراستنی هەرێمی کوردستان وەک قەوارەیەکی سیاسی دەکات لەهەر دەست درێژیەک).